Alappuzha, 16 മെയ് (H.S.)

ആലപ്പുഴ: സംസ്ഥാന രാഷ്ട്രീയത്തിൽ പുതിയ ഭരണമാറ്റവും മന്ത്രിസഭാ രൂപീകരണ ചർച്ചകളും സജീവമായിരിക്കെ, നിർണായക പ്രതികരണവുമായി മുതിർന്ന നേതാവും അമ്പലപ്പുഴയിൽ നിന്നുള്ള നിയുക്ത എം.എൽ.എയുമായ ജി. സുധാകരൻ. വരാനിരിക്കുന്ന പുതിയ മന്ത്രിസഭയിലേക്ക് തന്നെ പരിഗണിക്കുകയാണെങ്കിൽ ആ പദവി സ്വീകരിക്കാൻ തയ്യാറാണെന്ന് അദ്ദേഹം വ്യക്തമാക്കി. നിയമസഭാ തെരഞ്ഞെടുപ്പിൽ അമ്പലപ്പുഴ മണ്ഡലത്തിൽ നിന്നും യു.ഡി.എഫ് പിന്തുണയോടെ സ്വതന്ത്ര സ്ഥാനാർത്ഥിയായി മത്സരിച്ച് വൻ വിജയം നേടിയതിന് പിന്നാലെയാണ് മന്ത്രിസ്ഥാനത്തെക്കുറിച്ചുള്ള ജി. സുധാകരന്റെ ഈ തുറന്നുപറച്ചിൽ.

എന്നാൽ, മന്ത്രിസ്ഥാനവുമായി ബന്ധപ്പെട്ട് യു.ഡി.എഫ് നേതൃത്വത്തിൽ നിന്ന് ആരും തന്നെ ഇതുവരെ ഔദ്യോഗികമായി വന്ന് സംസാരിച്ചിട്ടില്ലെന്ന് അദ്ദേഹം വ്യക്തമാക്കി. മാധ്യമങ്ങളിൽ ഉയരുന്ന വാർത്തകൾ കേവലം ചർച്ചകൾ മാത്രമാണെന്നും മുന്നണി നേതൃത്വം താനുമായി ഇതേവരെ ആശയവിനിമയം നടത്തിയിട്ടില്ലെന്നും അദ്ദേഹം കൂട്ടിച്ചേർത്തു.

ആവശ്യപ്പെട്ടിട്ടല്ല മുൻപ് മന്ത്രിയായത്

താൻ ഒരിക്കലും പദവികൾക്ക് പുറകെ പോകുന്ന ആളല്ലെന്നും ഇപ്പോഴും ആരോടും മന്ത്രിസ്ഥാനം ആവശ്യപ്പെട്ടിട്ടില്ലെന്നും ജി. സുധാകരൻ മാധ്യമങ്ങളോട് പറഞ്ഞു. മുൻകാലങ്ങളിൽ താൻ കൈകാര്യം ചെയ്ത മന്ത്രിപദവികളെക്കുറിച്ച് ഓർമ്മിപ്പിച്ചുകൊണ്ടായിരുന്നു അദ്ദേഹത്തിന്റെ പ്രതികരണം.

ഞാൻ ആരോടും മന്ത്രിസ്ഥാനം ആവശ്യപ്പെട്ടിട്ടില്ല. മുൻപ് ഞാൻ മന്ത്രിയായപ്പോഴൊന്നും ആരോടും ചോദിച്ചു വാങ്ങിയതല്ല. പാർട്ടി ചുമതലപ്പെടുത്തിയത് കൊണ്ടാണ് ആ പദവികളെല്ലാം നിർവ്വഹിച്ചത്. ഇപ്പോഴും ഞാൻ ഒരു പദവിയും ചോദിക്കുന്നില്ല. എന്നാൽ, എന്നെ മന്ത്രിസ്ഥാനത്തേക്ക് പരിഗണിക്കാൻ പുതിയ സർക്കാർ തയ്യാറാകുകയാണെങ്കിൽ, ജനങ്ങളെ സേവിക്കാനുള്ള ആ ഉത്തരവാദിത്തം ഞാൻ പൂർണ്ണ മനസ്സോടെ സ്വീകരിക്കും, ജി. സുധാകരൻ വ്യക്തമാക്കി.

യു.ഡി.എഫുമായി തർക്കങ്ങളില്ല, പിന്തുണയ്ക്ക് നന്ദി

ദീർഘകാലത്തെ സി.പി.എം ബന്ധം അവസാനിപ്പിച്ചാണ് ജി. സുധാകരൻ ഇത്തവണ അമ്പലപ്പുഴയിൽ സ്വതന്ത്രനായി ജനവിധി തേടിയത്. യു.ഡി.എഫ് തങ്ങൾക്ക് സ്ഥാനാർത്ഥിയെ നിർത്താതെ സുധാകരന് പൂർണ്ണ പിന്തുണ പ്രഖ്യാപിക്കുകയായിരുന്നു. യു.ഡി.എഫിലെ ഘടകകക്ഷികളായ കോൺഗ്രസും മുസ്ലിം ലീഗും ഒരുപോലെ അദ്ദേഹത്തിന്റെ വിജയത്തിനായി സജീവമായി രംഗത്തുണ്ടായിരുന്നു. കഴിഞ്ഞ ദിവസം പാണക്കാട് തങ്ങളെയും പി.കെ കുഞ്ഞാലിക്കുട്ടിയെയും സന്ദർശിച്ച് അദ്ദേഹം നന്ദി അറിയിക്കുകയും ചെയ്തിരുന്നു.

സ്വതന്ത്ര എം.എൽ.എയായി നിയമസഭയിൽ തുടരുമ്പോഴും വികസന കാര്യങ്ങളിൽ മുന്നണിയുമായി ചേർന്നുപോകുമെന്നാണ് അദ്ദേഹം നൽകുന്ന സൂചന. പദവികൾക്കായി യാതൊരുവിധ സമ്മർദ്ദ തന്ത്രങ്ങൾക്കും താനില്ലെന്നും എന്നാൽ രാഷ്ട്രീയ പരിചയസമ്പത്ത് നാടിന്റെ നന്മയ്ക്കായി ഉപയോഗിക്കാൻ മന്ത്രിസ്ഥാനം നൽകിയാൽ മാറിനിൽക്കില്ലെന്നുമാണ് സുധാകരൻ വ്യക്തമാക്കുന്നത്.

ഭരണരംഗത്തെ അദ്ദേഹത്തിന്റെ ദീർഘകാലത്തെ പരിചയസമ്പത്ത് കണക്കിലെടുത്ത് യു.ഡി.എഫ് നേതൃത്വം അദ്ദേഹത്തെ മന്ത്രിസഭയിലേക്ക് പരിഗണിക്കുമോ അതോ സ്വതന്ത്രനായി തന്നെ നിയമസഭയിൽ നിലനിർത്തുമോ എന്നാണ് ഇനി അറിയേണ്ടത്. വരും ദിവസങ്ങളിൽ തിരുവനന്തപുരത്ത് നടക്കുന്ന മന്ത്രിസഭാ രൂപീകരണ ചർച്ചകളിൽ ജി. സുധാകരന്റെ പേര് സജീവമായി ഉയർന്നുവരുമെന്ന് തന്നെയാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.

---------------

Hindusthan Samachar / Roshith K