Newdelhi, 16 മെയ് (H.S.)

ന്യൂഡൽഹി: നീറ്റ്-യുജി (NEET-UG 2026) പരീക്ഷയുടെ ചോദ്യപേപ്പർ ചോർന്നതിനെത്തുടർന്ന് പരീക്ഷ റദ്ദാക്കിയ പശ്ചാത്തലത്തിൽ, ദേശീയ പരീക്ഷാ ഏജൻസിക്കെതിരെ (NTA) ഡൽഹിയിൽ പ്രതിഷേധം ഇരമ്പുന്നു. കോൺഗ്രസിന്റെ വിദ്യാർത്ഥി സംഘടനയായ നാഷണൽ സ്റ്റുഡന്റ്സ് യൂണിയൻ ഓഫ് ഇന്ത്യ (NSUI) പ്രവർത്തകർ ന്യൂഡൽഹിയിലെ എൻ.ടി.എ ഓഫീസിന് പുറത്ത് ശക്തമായ പ്രതിഷേധ പ്രകടനം നടത്തി. കനത്ത പോലീസ് സുരക്ഷാ വലയത്തിലാണ് എൻ.എസ്.യു.ഐ പ്രവർത്തകർ പ്രതിഷേധവുമായി എത്തിയത്. ചോദ്യപേപ്പർ ചോർച്ചയ്ക്ക് കാരണക്കാരായ എൻ.ടി.എ നിരോധിക്കണമെന്നും കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ അടിയന്തരമായി രാജിവെക്കണമെന്നും പ്രതിഷേധക്കാർ ആവശ്യപ്പെട്ടു.

എൻ.ടി.എ ഓഫീസിന് പൂട്ടുമിടുമെന്ന് പ്രഖ്യാപിച്ച് പ്രതീകാത്മകമായി പൂട്ടും ചങ്ങലകളുമായാണ് വിദ്യാർത്ഥി നേതാക്കൾ എത്തിയത്. കേന്ദ്ര സർക്കാരിന്റെയും എൻ.ടി.എയുടെയും പരാജയമാണ് ഈ ക്രമക്കേടുകൾക്ക് പിന്നിലെന്ന് അവർ ആരോപിച്ചു. പ്രധാനമന്ത്രിക്കെതിരെയും കേന്ദ്ര വിദ്യാഭ്യാസ മന്ത്രിക്കെതിരെയും ശക്തമായ മുദ്രാവാക്യങ്ങളാണ് പ്രതിഷേധത്തിൽ ഉയർന്നത്. പ്രതിഷേധം അക്രമാസക്തമായതോടെ പോലീസും പ്രവർത്തകരും തമ്മിൽ ഉന്തും തള്ളുമുണ്ടായി. തുടർന്ന് നിരവധി എൻ.എസ്.യു.ഐ പ്രവർത്തകരെ പോലീസ് കസ്റ്റഡിയിലെടുത്തു.

ദേശീയ പരീക്ഷാ ഏജൻസി (NTA) എന്നത് യഥാർത്ഥത്തിൽ 'ദേശീയ അഴിമതി ഏജൻസി' (National Corruption Agency) ആയി മാറിയിരിക്കുകയാണെന്ന് പ്രതിഷേധത്തിൽ പങ്കെടുത്ത ഒരു വിദ്യാർത്ഥി നേതാവ് മാധ്യമങ്ങളോട് പറഞ്ഞു. എൻ.ടി.എ നടത്തുന്ന എല്ലാ പരീക്ഷകളും ചോദ്യപേപ്പർ ചോർച്ചയിലാണ് അവസാനിക്കുന്നത്. വർഷങ്ങളോളം കഠിനാധ്വാനം ചെയ്ത് പരീക്ഷ എഴുതുന്ന ലക്ഷക്കണക്കിന് വിദ്യാർത്ഥികളുടെ ഭാവിയാണ് ഇവർ തകർക്കുന്നത്. പരീക്ഷകൾ റദ്ദാക്കപ്പെടുമ്പോൾ കടുത്ത നിരാശയിലായി രാജ്യത്ത് പലയിടത്തും വിദ്യാർത്ഥികൾ ജീവനൊടുക്കുന്നു. ഈ മരണങ്ങൾക്ക് കേന്ദ്ര സർക്കാരും വിദ്യാഭ്യാസ മന്ത്രിയുമാണ് ഉത്തരവാദികൾ. ധർമ്മേന്ദ്ര പ്രധാൻ ധാർമ്മിക ഉത്തരവാദിത്തം ഏറ്റെടുത്ത് രാജിവെക്കണമെന്നും വിദ്യാർത്ഥികൾ ആവശ്യപ്പെട്ടു.

രാജസ്ഥാനിലെ ബി.ജെ.പി പ്രവർത്തകർക്കാണ് ചോദ്യപേപ്പർ ചോർച്ചയിൽ പങ്കുള്ളതെന്ന് മാധ്യമങ്ങൾ വഴി പുറത്തുവന്നിട്ടുണ്ടെന്ന് മറ്റൊരു പ്രതിഷേധക്കാരൻ ആരോപിച്ചു. ബി.ജെ.പി സർക്കാർ വെറും പ്രസംഗങ്ങൾ മാത്രമാണ് നടത്തുന്നത്, കുറ്റക്കാർക്കെതിരെ യാതൊരു നടപടിയും ഉണ്ടാകുന്നില്ല. വിദ്യാർത്ഥികളുടെ കഠിനാധ്വാനവും കോച്ചിങ്ങിനായി രക്ഷിതാക്കൾ ചിലവഴിച്ച ലക്ഷക്കണക്കിന് രൂപയുമാണ് ഒരു നിമിഷം കൊണ്ട് ഇല്ലാതായത്. പരീക്ഷാ ഫീസ് ഒഴിവാക്കിയത് കൊണ്ട് മാത്രം വിദ്യാർത്ഥികളുടെ നഷ്ടപ്പെട്ട വർഷങ്ങൾ തിരികെ ലഭിക്കില്ലെന്ന് അവർ ചൂണ്ടിക്കാട്ടി. കഴിഞ്ഞ പത്ത് വർഷത്തിനിടെ നാല് തവണയാണ് നീറ്റ് പരീക്ഷയുമായി ബന്ധപ്പെട്ട് ക്രമക്കേടുകൾ ഉണ്ടാകുന്നത്.

അതേസമയം, നീറ്റ് പരീക്ഷാ ചോർച്ചയുമായി ബന്ധപ്പെട്ട കേസ് അന്വേഷിക്കുന്ന സി.ബി.ഐ, സംഭവത്തിലെ മുഖ്യസൂത്രധാരനെ അറസ്റ്റ് ചെയ്തതായി വെള്ളിയാഴ്ച അറിയിച്ചിരുന്നു. നാഷണൽ ടെസ്റ്റിംഗ് ഏജൻസിക്ക് വേണ്ടി പരീക്ഷാ മേൽനോട്ട ചുമതലകളിൽ പങ്കാളിയായിരുന്ന കെമിസ്ട്രി ലക്ചറർ പി.വി കുൽക്കർണിയാണ് അറസ്റ്റിലായത്. ഇയാൾക്ക് ചോദ്യപേപ്പറുകളിലേക്ക് നേരിട്ട് പ്രവേശനമുണ്ടായിരുന്നു എന്നാണ് സി.ബി.ഐ കണ്ടെത്തൽ. ഇയാൾക്കൊപ്പം മനീഷ വാഗ്മറെ എന്ന സ്ത്രീയും അറസ്റ്റിലായിട്ടുണ്ട്. പരീക്ഷയ്ക്ക് മുൻപ് തന്റെ വീട്ടിൽ വെച്ച് തിരഞ്ഞെടുത്ത കുറച്ചു വിദ്യാർത്ഥികൾക്ക് ഇയാൾ പ്രത്യേക കോച്ചിങ് ക്ലാസ് നൽകിയതായും യഥാർത്ഥ ചോദ്യപേപ്പറിലെ ചോദ്യങ്ങൾ അതേപടി വിദ്യാർത്ഥികൾക്ക് എഴുതി നൽകിയതായും സി.ബി.ഐ അന്വേഷണത്തിൽ വ്യക്തമായി. വരും ദിവസങ്ങളിൽ രാജ്യവ്യാപകമായി അന്വേഷണവും പ്രതിഷേധങ്ങളും കൂടുതൽ ശക്തമാകുമെന്നാണ് റിപ്പോർട്ടുകൾ സൂചിപ്പിക്കുന്നത്.

---------------

Hindusthan Samachar / Roshith K