Thiruvananthapuram, 19 മെയ് (H.S.)

തിരുവനന്തപുരം: നിയമസഭാ തിരഞ്ഞെടുപ്പിലേറ്റ വൻ തകർച്ചയ്ക്ക് പിന്നാലെ സിപിഎമ്മിൽ ആഭ്യന്തര കലഹവും പരസ്യവിമർശനങ്ങളും കനക്കുന്നു. തിരഞ്ഞെടുപ്പ് അവലോകനത്തിനായി ചേർന്ന സിപിഎം തിരുവനന്തപുരം ജില്ലാ നേതൃയോഗങ്ങളിൽ സംസ്ഥാന നേതൃത്വത്തിനെതിരെ അതിരൂക്ഷമായ വിമർശനങ്ങളാണ് ഉയർന്നത്. പാർട്ടിക്ക് സംസ്ഥാനത്താകെ ഉണ്ടായ കനത്ത പരാജയത്തിന് കാരണം കണ്ണൂർ പാർട്ടിയിലെ ആഭ്യന്തര പ്രശ്നങ്ങളാണെന്ന് കുറ്റപ്പെടുത്തിയ തിരുവനന്തപുരം ജില്ലാ കമ്മിറ്റി, കണ്ണൂർ ജില്ലാ കമ്മിറ്റി അടിയന്തരമായി പിരിച്ചുവിടണമെന്ന് ആവശ്യപ്പെട്ടു.

സംസ്ഥാന സെക്രട്ടറി എം.വി. ഗോവിന്ദൻ നേരിട്ട് പങ്കെടുത്ത യോഗത്തിലാണ് നേതാക്കളെ സാക്ഷിനിർത്തി പ്രതിനിധികൾ കടുത്ത ഭാഷയിൽ വിമർശനം ഉന്നയിച്ചത്. തിരഞ്ഞെടുപ്പിലെ കനത്ത തിരിച്ചടിയുടെ പശ്ചാത്തലത്തിൽ സംസ്ഥാനത്തുടനീളം ജില്ലാ യോഗങ്ങൾ നടക്കുമ്പോൾ നേതൃത്വത്തിനെതിരെ ഇത്രയും ശക്തമായ അതൃപ്തി ഉയരുന്നത് ഇതാദ്യമായാണ്.

എം.വി. ഗോവിന്ദനെ സെക്രട്ടറി സ്ഥാനത്തുനിന്ന് മാറ്റണം

പാർട്ടിയുടെ രാഷ്ട്രീയവും നയപരവുമായ തീരുമാനങ്ങളിൽ വ്യക്തത കുറവുണ്ടായതായി പ്രതിനിധികൾ യോഗത്തിൽ ചൂണ്ടിക്കാട്ടി. സംസ്ഥാന സെക്രട്ടറി എം.വി. ഗോവിന്ദന്റെ പ്രവർത്തന ശൈലിക്കെതിരെ വലിയ രീതിയിലുള്ള വിമർശനമാണ് ഉയർന്നത്.

-

സ്വജനപക്ഷപാത ആരോപണം: നയപരമായ കാര്യങ്ങളിൽ വ്യക്തത പുലർത്താൻ സെക്രട്ടറിക്ക് കഴിയുന്നില്ലെന്നും, സ്വന്തം നിലപാടുകൾ മാത്രം അടിച്ചേൽപ്പിച്ച് പാർട്ടിയിൽ സ്വജനപക്ഷപാതം നടപ്പിലാക്കാനാണ് അദ്ദേഹം ശ്രമിച്ചതെന്നും പ്രതിനിധികൾ കുറ്റപ്പെടുത്തി.

-

സ്വാധീനമില്ലായ്മ: സ്വന്തം മണ്ഡലത്തിലോ ജില്ലയിലോ പോലും പാർട്ടിക്ക് അനുകൂലമായ സ്വാധീനം ചെലുത്താൻ സെക്രട്ടറിക്ക് കഴിഞ്ഞിട്ടില്ല. ജനങ്ങളോട് നയസമീപനങ്ങൾ വിശദീകരിക്കുന്നതിലും പരാജയപ്പെട്ടു. ഈ സാഹചര്യത്തിൽ അദ്ദേഹത്തെ സിപിഎം സംസ്ഥാന സെക്രട്ടറി സ്ഥാനത്തുനിന്ന് മാറ്റണമെന്നും യോഗത്തിൽ ആവശ്യമുയർന്നു.

-

പിണറായി വിജയന്റെ ശൈലിക്കെതിരെയും കടുത്ത വിമർശനം

പാർട്ടി സെക്രട്ടറിക്കൊപ്പം മുഖ്യമന്ത്രി പിണറായി വിജയന്റെ ഭരണശൈലിയും വോട്ടർമാരെ പാർട്ടിയിൽ നിന്ന് അകറ്റിയതായി ജില്ലാ കമ്മിറ്റി വിലയിരുത്തി. മുഖ്യമന്ത്രിയുടെ ശൈലി ജനങ്ങൾക്കിടയിൽ വലിയ തോതിലുള്ള അതൃപ്തി ഉണ്ടാക്കിയിട്ടുണ്ട്. ഭരണവിരുദ്ധ വികാരത്തോടൊപ്പം ഈ ശൈലിയും ചേർന്നതാണ് തിരഞ്ഞെടുപ്പിൽ പാർട്ടിയെ വലിയ തകർച്ചയിലേക്ക് തള്ളിവിട്ടതെന്നും യോഗത്തിൽ വിമർശനമുണ്ടായി.

കണ്ണൂർ പാർട്ടിയിൽ നിന്നുണ്ടായ പ്രശ്നങ്ങളാണ് സംസ്ഥാനത്തുടനീളം പ്രതിഫലിച്ചത്. അവിടെയുണ്ടായ തർക്കങ്ങളും വിവാദങ്ങളും പരിഹരിക്കാൻ കേന്ദ്ര-സംസ്ഥാന നേതൃത്വങ്ങൾക്ക് സാധിച്ചില്ല. അതിനാൽ ഈ പരാജയത്തിന്റെ ഉത്തരവാദിത്തത്തിൽ നിന്ന് കണ്ണൂർ ജില്ലാ ഘടകത്തിന് ഒഴിഞ്ഞുമാറാനാകില്ല. ആ കമ്മിറ്റിക്ക് ഇനി തുടരാൻ അർഹതയില്ല. - യോഗത്തിൽ പ്രതിനിധികൾ ആവശ്യപ്പെട്ടു.

'ഭയമില്ലാതെ സംസാരിക്കാൻ' നേതൃത്വത്തിന്റെ ആഹ്വാനം

നേരത്തെ, നേതാക്കൾക്കെതിരെ ഉയർന്നുവരുന്ന വിമർശനങ്ങൾ ഉൾക്കൊള്ളാൻ നേതൃത്വം തയ്യാറാകണമെന്ന് പാർട്ടിയിൽ നിർദ്ദേശമുണ്ടായിരുന്നു. മുൻവിധികളില്ലാതെ വിമർശനങ്ങൾ കേൾക്കാൻ നേതൃത്വം തയ്യാറാണെന്നും പ്രതിനിധികൾക്ക് ഭയമില്ലാതെ കാര്യങ്ങൾ തുറന്നുപറയാമെന്നും അറിയിച്ചതിന് പിന്നാലെയാണ് തിരുവനന്തപുരം ജില്ലാ കമ്മിറ്റിയിൽ ഇത്രയും കടുത്ത നിലപാടുകൾ ഉയർന്നുവന്നത്.

സംസ്ഥാന സെക്രട്ടറി എം.വി. ഗോവിന്ദനെ മുന്നിലിരുത്തി തന്നെയാണ് അദ്ദേഹത്തെ മാറ്റണമെന്ന ആവശ്യവും കണ്ണൂർ ലോബിക്കെതിരെയുള്ള നീക്കങ്ങളും അണികൾ ശക്തമാക്കിയത്. വരും ദിവസങ്ങളിൽ മറ്റ് ജില്ലകളിലും അവലോകന യോഗങ്ങൾ നടക്കാനിരിക്കെ, പാർട്ടിക്കുള്ളിലെ ഈ പോര് വരും ദിവസങ്ങളിൽ കൂടുതൽ ശക്തമാകാനാണ് സാധ്യത.

---------------

Hindusthan Samachar / Roshith K