Alapuzha , 24 മെയ് (H.S.)

ആലപ്പുഴ: നവകേരള സദസ്സിനിടെ ആലപ്പുഴയിൽ വെച്ച് യൂത്ത് കോൺഗ്രസ് പ്രവർത്തകരെ ക്രൂരമായി മർദിച്ച സംഭവത്തിൽ മുഖ്യമന്ത്രി പിണറായി വിജയന്റെ സുരക്ഷാ ഉദ്യോഗസ്ഥർക്കെതിരെ കടുത്ത നടപടിക്ക് ഒരുങ്ങി ആഭ്യന്തര വകുപ്പ്. മുഖ്യമന്ത്രിയുടെ നിലവിലുള്ള ഗൺമാൻ അനിൽകുമാർ ഉൾപ്പെടെയുള്ള അഞ്ച് പൊലീസുകാരെ സർവീസിൽ നിന്ന് സസ്പെൻഡ് ചെയ്യും. പ്രതികളായ ഉദ്യോഗസ്ഥർ ഗുരുതരമായ ചട്ടലംഘനം നടത്തിയതായി കേസ് അന്വേഷിക്കുന്ന പ്രത്യേക അന്വേഷണ സംഘം (SIT) കണ്ടെത്തിയതിനെ തുടർന്നാണ് അടിയന്തര നടപടി.

അന്വേഷണ സംഘത്തലവനായ എസ്പി എ.പി. ഷൗക്കത്തലി, പൊലീസുകാരുടെ ഭാഗത്തുനിന്നുണ്ടായ വീഴ്ചകളും ചട്ടലംഘനങ്ങളും സംബന്ധിച്ച വിവരങ്ങൾ ഡിജിപിയെ വാക്കാൽ അറിയിച്ചിട്ടുണ്ട്. ഇതുമായി ബന്ധപ്പെട്ട ഔദ്യോഗിക റിപ്പോർട്ട് ഇന്നും നാളെയുമായി ഡിജിപിക്ക് സമർപ്പിക്കും. വകുപ്പുതല അച്ചടക്ക നടപടിയുടെ ആദ്യഘട്ടമെന്ന നിലയിലാണ് ഉദ്യോഗസ്ഥരെ സസ്പെൻഡ് ചെയ്യാൻ തീരുമാനിച്ചിരിക്കുന്നത്. സസ്പെൻഷൻ ഉത്തരവ് പുറത്തിറങ്ങിയതിന് പിന്നാലെ പ്രതികളുടെ അറസ്റ്റ് ഉൾപ്പെടെയുള്ള തുടർ നിയമനടപടികളും ഉണ്ടായേക്കുമെന്നാണ് ഉന്നത വൃത്തങ്ങളിൽ നിന്നുള്ള സൂചന.

എസ്ഐടിയുടെ കണ്ടെത്തലുകൾ

നവകേരള സദസ്സിന്റെ ഭാഗമായി മുഖ്യമന്ത്രിയും മന്ത്രിമാരും സഞ്ചരിച്ച ബസ് കടന്നുപോകുമ്പോൾ ആലപ്പുഴയിൽ വെച്ച് യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച് പ്രതിഷേധിച്ചിരുന്നു. ഈ സമയത്ത് പ്രതിഷേധക്കാരെ കസ്റ്റഡിയിലെടുത്ത പൊലീസിന്റെ കൈകളിൽ നിന്നും വാങ്ങി, മുഖ്യമന്ത്രിയുടെ ഗൺമാൻ അനിൽകുമാറും മറ്റ് സുരക്ഷാ ഉദ്യോഗസ്ഥരും ചേർന്ന് ലാത്തി ഉപയോഗിച്ച് ക്രൂരമായി മർദിക്കുകയായിരുന്നു.

കേസ് അന്വേഷിച്ച പ്രത്യേക അന്വേഷണ സംഘം സംഭവസ്ഥലത്തുണ്ടായിരുന്ന ദൃശ്യങ്ങളും സാക്ഷിമൊഴികളും വിശദമായി പരിശോധിച്ചു. പ്രതിഷേധക്കാരെ നിയന്ത്രിക്കേണ്ടത് അതത് സ്ഥലത്തെ ക്രമസമാധാന ചുമതലയുള്ള പൊലീസുകാരാണെന്നിരിക്കെ, മുഖ്യമന്ത്രിയുടെ സുരക്ഷാ ഉദ്യോഗസ്ഥർ വാഹനം നിർത്തി പുറത്തിറങ്ങി മർദനം അഴിച്ചുവിട്ടത് നിയമവിരുദ്ധവും ഗുരുതരമായ അധികാര ദുർവിനിയോഗവുമാണെന്ന് എസ്ഐടി വിലയിരുത്തി. ഉദ്യോഗസ്ഥരുടെ ഭാഗത്തുനിന്നുണ്ടായത് ഒരു തരത്തിലും ന്യായീകരിക്കാൻ കഴിയാത്ത ചട്ടലംഘനമാണെന്ന് റിപ്പോർട്ടിൽ വ്യക്തമാക്കുന്നുണ്ട്.

പ്രതിരോധത്തിലായി ആഭ്യന്തര വകുപ്പ്

സംഭവം നടന്ന സമയത്ത്, പ്രതിഷേധക്കാർക്ക് നേരെ ഉണ്ടായ അക്രമത്തെ മുഖ്യമന്ത്രി പിണറായി വിജയൻ പരസ്യമായി ന്യായീകരിച്ചിരുന്നു. ജീവൻ രക്ഷാപ്രവർത്തനമാണ് സുരക്ഷാ ജീവനക്കാർ നടത്തിയതെന്നായിരുന്നു അന്ന് മുഖ്യമന്ത്രി വാർത്താസമ്മേളനത്തിൽ പറഞ്ഞിരുന്നത്. എന്നാൽ കോടതി ഇടപെടലിനെ തുടർന്ന് കേസെടുക്കാൻ പൊലീസ് നിർബന്ധിതരാവുകയായിരുന്നു. ഇപ്പോൾ സ്വന്തം അന്വേഷണ സംഘം തന്നെ ഉദ്യോഗസ്ഥർ കുറ്റക്കാരാണെന്ന് കണ്ടെത്തിയതോടെ ആഭ്യന്തര വകുപ്പും സർക്കാരും കടുത്ത പ്രതിരോധത്തിലായിരിക്കുകയാണ്.

പ്രതിഷേധിച്ചവരെ ക്രൂരമായി മർദിക്കുന്ന ദൃശ്യങ്ങൾ മാധ്യമങ്ങളിലൂടെ പുറത്തുവന്നത് പൊലീസിന്റെ പ്രതിച്ഛായയ്ക്ക് വലിയ മങ്ങലേൽപ്പിച്ചിരുന്നു. ഈ സാഹചര്യത്തിൽ ഉദ്യോഗസ്ഥർക്കെതിരെ കർശന നടപടി സ്വീകരിക്കാതെ സർക്കാരിന് മുന്നോട്ട് പോകാൻ കഴിയില്ലെന്ന അവസ്ഥയാണുള്ളത്.

അറസ്റ്റിലേക്ക് നീങ്ങുമോ?

സസ്പെൻഷൻ നടപടികൾ പൂർത്തിയാകുന്നതോടെ കേസിൽ പ്രതികളായ അനിൽകുമാർ അടക്കമുള്ള അഞ്ച് പൊലീസുകാരുടെയും അറസ്റ്റ് രേഖപ്പെടുത്താനുള്ള സാധ്യതയും അന്വേഷണ സംഘം പരിശോധിക്കുന്നുണ്ട്. കോടതിയുടെ കർശന നിരീക്ഷണത്തിലുള്ള കേസ് ആയതിനാൽ നിയമനടപടികളിൽ യാതൊരുവിധ വീഴ്ചയും വരുത്തരുതെന്ന് എസ്ഐടിക്ക് നിർദ്ദേശമുണ്ട്. വരും ദിവസങ്ങളിൽ ഈ കേസിൽ കൂടുതൽ നിർണായകമായ നീക്കങ്ങൾ ഉണ്ടാകുമെന്നാണ് കരുതുന്നത്.

---------------

Hindusthan Samachar / Roshith K