Kochi, 24 മെയ് (H.S.)

കൊച്ചി: കേരളത്തിൽ പരക്കെ മഴ ശക്തമായതിനെ തുടർന്ന് എറണാകുളം ജില്ലയിലെ ഭൂതത്താൻകെട്ട് ബാരേജിന്റെ ഷട്ടറുകൾ ഉയർത്താൻ തീരുമാനം. കഴിഞ്ഞ ഏതാനും ദിവസങ്ങളായി തുടരുന്ന കനത്ത മഴയെത്തുടർന്ന് ബാരേജിലേക്കുള്ള നീരൊഴുക്ക് വർധിച്ച സാഹചര്യത്തിലാണ് അധികൃതർ ഈ മുൻകരുതൽ നടപടി സ്വീകരിക്കുന്നത്. ബാരേജിന്റെ ഷട്ടറുകൾ തുറക്കുന്നതോടെ പെരിയാറിലെ ജലനിരപ്പ് ഗണ്യമായി ഉയരാൻ സാധ്യതയുണ്ടെന്ന് അധികൃതർ വ്യക്തമാക്കി.

ഇതേത്തുടർന്ന്, നദിയുടെ ഇരുതീരങ്ങളിലും താഴ്ന്ന പ്രദേശങ്ങളിലും താമസിക്കുന്നവരോട് അതീവ ജാഗ്രത പാലിക്കാൻ ജില്ലാ ഭരണകൂടവും ദുരന്തനിവാരണ അതോറിറ്റിയും നിർദേശം നൽകിയിട്ടുണ്ട്. ആവശ്യമായ സാഹചര്യങ്ങളിൽ മാറിത്താമസിക്കാൻ ജനങ്ങൾ തയ്യാറാകണമെന്നും നദികളിൽ ഇറങ്ങുന്നതിനോ മീൻപിടിക്കുന്നതിനോ തുനിയരുതെന്നും മുന്നറിയിപ്പുണ്ട്.

എറണാകുളത്ത് ഓറഞ്ച് അലർട്ട്; 11 ജില്ലകളിൽ യെല്ലോ മുന്നറിയിപ്പ്

സംസ്ഥാനത്ത് മഴക്കെടുതി രൂക്ഷമാകുന്ന പശ്ചാത്തലത്തിൽ കേന്ദ്ര കാലാവസ്ഥാ വകുപ്പ് വിവിധ ജില്ലകളിൽ ശക്തമായ മഴ മുന്നറിയിപ്പ് പുറപ്പെടുവിച്ചിട്ടുണ്ട്. ഏറ്റവും പുതിയ പ്രവചനപ്രകാരം എറണാകുളം ജില്ലയിൽ ഓറഞ്ച് അലർട്ട് (Orange Alert) പ്രഖ്യാപിച്ചു. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് ജില്ലയിൽ പ്രവചിച്ചിരിക്കുന്നത്. 24 മണിക്കൂറിൽ 115.6 മില്ലിമീറ്റർ മുതൽ 204.4 മില്ലിമീറ്റർ വരെ മഴ ലഭിക്കാൻ സാധ്യതയുള്ളതിനാലാണ് എറണാകുളത്ത് അതീവ ജാഗ്രതാ നിർദേശം നൽകിയിട്ടുള്ളത്.

എറണാകുളത്തിന് പുറമെ സംസ്ഥാനത്തെ മറ്റ് പതിനൊന്ന് ജില്ലകളിൽ യെല്ലോ അലർട്ടും (Yellow Alert) പ്രഖ്യാപിച്ചിട്ടുണ്ട്. വയനാട്, പാലക്കാട് എന്നീ രണ്ട് ജില്ലകൾ ഒഴികെയുള്ള മറ്റെല്ലാ ജില്ലകളിലുമാണ് നിലവിൽ മഞ്ഞ മുന്നറിയിപ്പുള്ളത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, തൃശൂർ, മലപ്പുറം, കോഴിക്കോട്, കണ്ണൂർ, കാസർഗോഡ് എന്നീ ജില്ലകളിലാണ് ശക്തമായ മഴയ്ക്കുള്ള സാധ്യത പ്രവചിച്ചിരിക്കുന്നത്. ഈ ജില്ലകളിൽ 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെയുള്ള ശക്തമായ മഴയ്ക്ക് സാധ്യതയുണ്ട്.

മുൻകരുതലുകളും നിർദേശങ്ങളും

ബംഗാൾ ഉൾക്കടലിലും തെക്കൻ അറബിക്കടലിലും നിലനിൽക്കുന്ന ചക്രവാതച്ചുഴിയുടെ സ്വാധീനമാണ് സംസ്ഥാനത്ത് മഴ ഇത്രത്തോളം ശക്തമാകാൻ കാരണം. കനത്ത മഴയ്ക്കൊപ്പം ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ പൊതുജനങ്ങൾ സുരക്ഷാ നിർദേശങ്ങൾ കർശനമായി പാലിക്കണമെന്ന് അധികൃതർ ഓർമ്മിപ്പിച്ചു.

പ്രധാന നിർദേശങ്ങൾ:

-

പെരിയാറിന്റെ തീരത്തുള്ളവർ ജലനിരപ്പ് ഉയരുന്നത് നിരന്തരം നിരീക്ഷിക്കുകയും ഉദ്യോഗസ്ഥരുടെ നിർദേശങ്ങൾക്കനുസരിച്ച് പ്രവർത്തിക്കുകയും ചെയ്യുക.

-

മലയോര മേഖലകളിലേക്കുള്ള രാത്രി യാത്രകൾ പൂർണ്ണമായും ഒഴുവാക്കുക.

-

ശക്തമായ കാറ്റിൽ മരങ്ങൾ കടപുഴകി വീഴാനും മരക്കൊമ്പുകൾ ഒടിഞ്ഞുവീഴാനും സാധ്യതയുള്ളതിനാൽ വാഹനങ്ങൾ മരങ്ങൾക്ക് താഴെ പാർക്ക് ചെയ്യാതിരിക്കാൻ ശ്രദ്ധിക്കുക.

-

താഴ്ന്ന പ്രദേശങ്ങളിൽ വെള്ളപ്പൊക്ക സാധ്യതയുള്ളതിനാൽ കൺട്രോൾ റൂമുകൾ സജ്ജമാക്കാൻ തദ്ദേശ സ്ഥാപനങ്ങൾക്ക് നിർദേശം നൽകിയിട്ടുണ്ട്.

വരും ദിവസങ്ങളിലും സംസ്ഥാനത്ത് കനത്ത മഴ തുടരുമെന്നാണ് കാലാവസ്ഥാ പ്രവചനം. അടിയന്തര സാഹചര്യങ്ങൾ നേരിടാൻ റവന്യൂ, പൊലീസ്, ഫയർഫോഴ്സ് എന്നീ വിഭാഗങ്ങൾ പൂർണ്ണ സജ്ജമാണെന്ന് എറണാകുളം ജില്ലാ കളക്ടർ അറിയിച്ചു. കൺട്രോൾ റൂമുകൾ 24 മണിക്കൂറും പ്രവർത്തനസജ്ജമായിരിക്കും.

---------------

Hindusthan Samachar / Roshith K