Thiruvananthapuram , 25 മെയ് (H.S.)

ഹേമ കമ്മിറ്റി റിപ്പോർട്ട് ഉപയോഗിച്ച് ബ്ലാക്ക് മെയിലിംഗ് നടന്നതായി സംശയിക്കുന്നുവെന്നും ഇതിൽ സർക്കാർ ഇടപെടണമെന്നുമുള്ള ആവശ്യവുമായി സംവിധായകൻ വിനയൻ. സമൂഹ മാധ്യമമായ ഫേസ്ബുക്കിൽ പങ്കു വച്ച കുറിപ്പിലാണ് അദ്ദേഹം തന്റെ ആവശ്യം മുന്നോട്ട് വച്ചത്.

മലയാള സിനിമാരംഗത്ത് അടുത്ത കാലത്ത് ശരിക്കും വിപ്ലവകരമായ ചർച്ചക്കു കാരണമായ ഒന്നാണ് ജസ്റ്റീസ് ഹേമക്കമ്മിറ്റി റിപ്പോർട്ട്..

ആ റിപ്പോർട്ട് കഴിഞ്ഞ സർക്കാർ പൂഴ്ത്തിവയ്കാൻ ശ്രമിച്ചെന്ന ആരോപണവും കോടതി ഇടപെടലും ഒക്കെ വലിയ ഒച്ചപ്പാടുണ്ടാക്കിയ സംഭവമായിരുന്നു..

ആ റിപ്പോർട്ട് വച്ച് ചില ബ്ളാക് മെയിലിംഗ് നടന്നെന്നു വരെ ആക്ഷേപം ഉയർന്നിരുന്നു..

മുഖ്യ മന്ത്രി ശ്രീ വി ഡി സതീശൻ പ്രതിപക്ഷ നേതാവെന്ന നിലയിൽ അന്ന് അതിനെതിരെ ശക്തമായി പ്രതികരിക്കുകയും ചെയ്തിരുന്നു..

ഇന്ന് സിനിമാരംഗം നവീകരിക്കാനായുള്ള സിഗ്നേച്ചർ ഇടുമ്പോൾ ഹേമക്കമ്മിറ്റി റിപ്പോർട്ടിനു വലിയ പ്രസക്തിയുണ്ട്..

കാരണം ജസ്റ്റീസ് ഹേമയും മുതിർന്ന നടി ശാരദയും ശ്രീമതി വത്സല IAS തുടങ്ങിയവർ ചേർന്ന് എഴുതിയ ആ റിപ്പോർട്ട് യാതൊരു രാഷ്ട്രീയ ഇടപെടലില്ലാത്തതും നിഷ്പക്ഷവുമാണന്നാണ് പറയുന്നത്..

പൊതുജനത്തിന്റെ നികുതിപ്പണത്തീന്ന് ഒരു കോടിയിലധികം രൂപ ചെലവിട്ടതുമാണ് അതിനു വേണ്ടി..

ഹേമക്കമ്മറ്റി റിപ്പോർട്ടിൽ എന്തു നടന്നു എന്ന് പരിശോധിക്കുമെന്ന് പുതിയ സാംസ്കാരിക മന്ത്രി ശ്രീ വിഷ്ണുനാഥും ഇന്നലെ ടിവിയിൽ പറയുന്നതു കേട്ടു..

ആശാവഹമാണ് ആ തീരുമാനം..

വിനയൻ തന്റെ ഫേസ് ബുക്ക് പേജിൽ കുറിച്ചു.

ജസ്റ്റിസ് ഹേമ കമ്മിറ്റി റിപ്പോർട്ട് മലയാള ചലച്ചിത്ര മേഖലയിലെ ലൈംഗികാതിക്രമങ്ങൾ, ലിംഗവിവേചനം, ചൂഷണം എന്നിവ വ്യക്തമാക്കുന്ന സുപ്രധാനമായ ഒരു രേഖയാണ്. 2017-ൽ ഒരു പ്രമുഖ നടിക്ക് നേരെയുണ്ടായ ആക്രമണത്തെ തുടർന്ന് കേരള സർക്കാരാണ് ഈ കമ്മിറ്റി രൂപീകരിച്ചത്. 2019-ൽ സമർപ്പിച്ച റിപ്പോർട്ട്, സ്വകാര്യ വിവരങ്ങൾ ഒഴിവാക്കി (Redacted) 2024 ഓഗസ്റ്റ് 19-നാണ് പൊതുജനങ്ങൾക്ക് ലഭ്യമാക്കിയത്.

പ്രധാന കണ്ടെത്തലുകൾ

• വ്യവസ്ഥാപിതമായ ലൈംഗിക ചൂഷണം: സിനിമയിൽ അവസരങ്ങൾ ലഭിക്കുന്നതിനായി ശക്തരായ പുരുഷന്മാർ (നടന്മാർ, സംവിധായകർ, നിർമ്മാതാക്കൾ) ലൈംഗികാവശ്യങ്ങൾ മുന്നോട്ട് വെക്കുന്നതായും, വിസമ്മതിക്കുന്നവരെ മാറ്റിനിർത്തുന്നതായും കമ്മിറ്റി കണ്ടെത്തി.

• പവർ ഗ്രൂപ്പ് (Power Grid): സിനിമയിൽ ആർക്കൊക്കെ അവസരം നൽകണം, ആരെ വിലക്കണം എന്ന് തീരുമാനിക്കുന്നത് 10 മുതൽ 15 വരെ ശക്തരായ പുരുഷന്മാർ അടങ്ങുന്ന ഒരു അനൗദ്യോഗിക സംഘമാണെന്ന് റിപ്പോർട്ടിൽ പറയുന്നു.

• മോശം തൊഴിൽ സാഹചര്യങ്ങൾ: വനിതാ ജീവനക്കാർക്ക് (നടിമാർ, മേക്കപ്പ് ആർട്ടിസ്റ്റുകൾ, മറ്റ് സാങ്കേതിക വിദഗ്ധർ) സെറ്റുകളിൽ സുരക്ഷിതമായ വസ്ത്രം മാറുന്ന മുറികളോ ശൗചാലയങ്ങളോ പോലെയുള്ള അടിസ്ഥാന സൗകര്യങ്ങൾ പോലും ലഭിക്കാറില്ല.

• നിശ്ശബ്ദതയുടെ സംസ്കാരം: സിനിമയിൽ നിന്ന് വിലക്കപ്പെടുമെന്ന ഭയം കാരണം ഇരകൾ പലപ്പോഴും ചൂഷണങ്ങൾ പുറത്തുപറയാതെ സഹിക്കുകയാണ് ചെയ്യുന്നത്.

പശ്ചാത്തലം

വിമൻ ഇൻ സിനിമ കളക്ടീവ് (WCC) നൽകിയ നിവേദനത്തെ തുടർന്നാണ് ഈ മൂന്നംഗ സമിതി രൂപീകരിച്ചത്. റിട്ട. ജസ്റ്റിസ് കെ. ഹേമ അധ്യക്ഷയായ സമിതിയിൽ മുൻ നടി ശാരദ, മുൻ ഐ.എ.എസ് ഉദ്യോഗസ്ഥ കെ.ബി. വത്സലകുമാരി എന്നിവരായിരുന്നു മറ്റ് അംഗങ്ങൾ.

റിപ്പോർട്ട് വാർത്തകളിൽ നിറഞ്ഞത് എന്തുകൊണ്ട്?

2019 ഡിസംബറിൽ റിപ്പോർട്ട് സമർപ്പിച്ചെങ്കിലും, മൊഴി നൽകിയവരുടെ സ്വകാര്യത മുൻനിർത്തി സർക്കാർ ഇത് രഹസ്യമായി സൂക്ഷിച്ചു. പിന്നീട് വിവരാവകാശ കമ്മീഷണറുടെയും കേരള ഹൈക്കോടതിയുടെയും ഇടപെടലുകളെ തുടർന്ന് 2024-ൽ 233 പേജുകളുള്ള റിപ്പോർട്ട് പുറത്തുവിട്ടു. ഇത് വലിയ പൊതുജനപ്രതിഷേധത്തിന് കാരണമാവുകയും, ഉയർന്നുവന്ന ക്രിമിനൽ പരാതികൾ അന്വേഷിക്കാൻ സർക്കാർ പ്രത്യേക അന്വേഷണ സംഘത്തെ (SIT) നിയമിക്കുകയും ചെയ്തു.

---------------

Hindusthan Samachar / Roshith K