Riyad, 26 മെയ് (H.S.)

റിയാദ്: ഇരുപത് വർഷത്തെ നീണ്ട കാത്തിരിപ്പിനും പ്രാർത്ഥനകൾക്കും ഒടുവിൽ കോഴിക്കോട് സ്വദേശി അബ്ദുൾ റഹീം ജയിൽ മോചിതനാകുന്നു. സൗദി ജയിലിൽ കഴിയുന്ന റഹീമിന്റെ ഔദ്യോഗിക മോചന ഉത്തരവിൽ ബന്ധപ്പെട്ട അധികൃതർ ഒപ്പുവെച്ചതായി റഹീം നിയമസഹായ സമിതി ഭാരവാഹികൾ അറിയിച്ചു. പ്രവാസി മലയാളി സമൂഹം ഒത്തൊരുമിച്ച് നടത്തിയ ചരിത്രപരമായ കാരുണ്യ പ്രവർത്തനത്തിന്റെ ഫലമായാണ് റഹീം മരണവക്ത്രത്തിൽ നിന്നും ജീവിതത്തിലേക്ക് തിരികെ നടക്കുന്നത്. ഇനി അവശേഷിക്കുന്ന ചില എമിഗ്രേഷൻ നടപടികൾ കൂടി പൂർത്തിയായാൽ ഏതുസമയവും റഹീമിന് നാട്ടിലേക്ക് തിരിക്കാനാകുമെന്നാണ് പ്രതീക്ഷയെന്ന് സഹായ സമിതി വ്യക്തമാക്കി.

കഴിഞ്ഞ ഇരുപത് വർഷമായി സൗദി അറേബ്യയിലെ ജയിലിൽ കഴിയുന്ന അബ്ദുൾ റഹീമിന്റെ ശിക്ഷാ കാലാവധി പൂർത്തിയായിരുന്നു. തുടർന്ന് കോടതി നടപടികളും ദയാധനമായ 'ബ്ലഡ് മണി' (രക്തപ്പണം) കൈമാറുന്ന പ്രക്രിയയും വിജയകരമായി പൂർത്തിയായതോടെയാണ് മോചന ഉത്തരവ് ഇറങ്ങാനുള്ള അവസാന തടസ്സങ്ങളും നീങ്ങിയത്. റിയാദിലെ ബന്ധപ്പെട്ട സർക്കാർ കാര്യാലയങ്ങളിൽ നിന്നും മോചന ഉത്തരവ് ഒപ്പുവെച്ച വിവരമാണ് ഇപ്പോൾ പുറത്തുവന്നിരിക്കുന്നത്. ഇനി ജയിൽ മോചനത്തിന് ശേഷമുള്ള എമിഗ്രേഷൻ, വിസ കാൻസലേഷൻ തുടങ്ങിയ സാങ്കേതിക നടപടിക്രമങ്ങൾ മാത്രമാണ് പൂർത്തിയാകാനുള്ളത്.

കൊലക്കുറ്റത്തിന് സൗദി കോടതി വധശിക്ഷയ്ക്ക് വിധിച്ച അബ്ദുൾ റഹീമിനെ രക്ഷിക്കാൻ മലയാളികൾ ലോകമെമ്പാടുമുള്ള പ്രവാസികളുടെ സഹായത്തോടെ സമാഹരിച്ചത് 34 കോടി രൂപയായിരുന്നു. സഊദി പൗരന്റെ കുടുംബം ആവശ്യപ്പെട്ട ഭീമമായ തുക ചുരുങ്ങിയ ദിവസങ്ങൾ കൊണ്ടാണ് കേരളക്കരയും പ്രവാസി സമൂഹവും ചേർന്ന് സമാഹരിച്ചത്. തുടർന്ന് ഈ തുക സൗദി വിദേശകാര്യ മന്ത്രാലയം വഴി കോടതിയിൽ നിക്ഷേപിക്കുകയും വധശിക്ഷ റദ്ദാക്കിക്കൊണ്ടുള്ള വിധി സമ്പാദിക്കുകയും ചെയ്യുകയായിരുന്നു.

റഹീമിന്റെ മോചന വാർത്ത അറിഞ്ഞതോടെ കോഴിക്കോട്ടെ അദ്ദേഹത്തിന്റെ വീട്ടിലും നാട്ടുകാരിലും വലിയ സന്തോഷമാണ് അലയടിക്കുന്നത്. ഇരുപത് വർഷമായി മകനെ കാത്തിരിക്കുന്ന വൃദ്ധയായ അമ്മയുടെയും കുടുംബത്തിന്റെയും കണ്ണീരിനാണ് ഇതോടെ വിരാമമാകുന്നത്. എമിഗ്രേഷൻ നടപടികൾ വേഗത്തിലാക്കാൻ റിയാദിലെ ഇന്ത്യൻ എംബസിയും ഒപ്പം റഹീം സഹായ സമിതി പ്രവർത്തകരും സജീവമായി രംഗത്തുണ്ട്. നിയമപരമായ എല്ലാ നടപടികളും പൂർത്തിയാക്കി അടുത്ത ദിവസങ്ങളിൽ തന്നെ റഹീം ജന്മനാട്ടിലേക്ക് വിമാനം കയറുമെന്നാണ് റിയാദിൽ നിന്നുള്ള വിവരങ്ങൾ സൂചിപ്പിക്കുന്നത്.

---------------

Hindusthan Samachar / Roshith K