Ernakulam , 27 മെയ് (H.S.)

എറണാകുളം-പാലക്കാട് റൂട്ടിലെ മെമു സർവീസുകളുടെ യാത്രാശേഷി വർധിപ്പിക്കാൻ നടപടിയുമായി റെയില്വെ. നിലവില് സർവീസ് നടത്തുന്ന 8 കോച്ചുകളുള്ള ട്രെയിനുകള്ക്ക് പകരം 12 കോച്ചുകളുള്ള പുതിയ റേക്കുകള് ഉപയോഗിക്കും.

ബുധനാഴ്ച മുതല് പുതിയ ക്രമീകരണം പ്രാബല്യത്തില് വരും.

ദക്ഷിണ റെയില്വേയുടെ ചീഫ് പാസഞ്ചർ ട്രാൻസ്പോർട്ടേഷൻ മാനേജർ (സിപിടിഎം) നല്കിയ നിർദ്ദേശത്തിന്റെ അടിസ്ഥാനത്തിലാണ് പുതിയ തീരുമാനം. പാലക്കാട്-എറണാകുളം, പാലക്കാട്-പൊള്ളാച്ചി റൂട്ടുകളില് സർവീസ് നടത്തുന്ന ട്രെയിൻ നമ്പർ 66609, 66610, 66623, 66624 എന്നീ മെമു സർവീസുകളിലാണ് 12 കോച്ചുകളുള്ള റേക്കുകള് വിന്യസിക്കുന്നത്. ചൊവ്വാഴ്ച പാലക്കാട് മെമു ഷെഡില് പുതിയ റേക്കുകളുടെ അറ്റകുറ്റപ്പണികളും സാങ്കേതിക പരിശോധനകളും നടത്തി.

യാത്രക്കാരുടെ നീണ്ടകാല ആവശ്യമായിരുന്നു ഇത്. ഓഫീസ് സമയങ്ങളിലെ അമിത തിരക്ക്, ചികിത്സ ആവശ്യങ്ങള്ക്കായി യാത്ര ചെയ്യുന്നവർ നേരിടുന്ന ബുദ്ധിമുട്ടുകള്, ദിവസേന യാത്ര ചെയ്യുന്ന വിദ്യാർത്ഥികളും തൊഴിലാളികളും അനുഭവിക്കുന്ന പ്രയാസങ്ങള് എന്നിവ പരിഗണിച്ചാണ് ശേഷി വർധനവ് നടപ്പാക്കുന്നത്.

'പൊള്ളാച്ചിയില് നിന്ന് എറണാകുളത്തേക്കുള്ള ട്രെയിനുകളില് രാവിലെയും വൈകുന്നേരവും അതിയായ തിരക്കാണ് അനുഭവപ്പെടുന്നത്. ഓഫീസ് ജീവനക്കാർ, വിദ്യാർത്ഥികള്, ചികിത്സയ്ക്കായി വലിയ മെഡിക്കല് സെന്ററുകളിലേക്ക് പോകുന്ന രോഗികള് തുടങ്ങി നിരവധി ആളുകള് ഈ സർവീസുകളെ ആശ്രയിച്ചാണ് യാത്ര ചെയ്യുന്നത്. 12 കോച്ചുകളാക്കിയത് സ്വാഗതാർഹമാണെങ്കിലും എല്ലാ റീജിയണല് പാസഞ്ചർ ട്രെയിനുകളും 16 കോച്ചുകളുള്ള മെമു സർവീസുകളാക്കി മാറ്റണമെന്ന ആവശ്യം ഞങ്ങള് തുടർന്നും ഉന്നയിക്കും',ഡിവിഷണല് റെയില്വേ യൂസേഴ്സ് കണ്സള്ട്ടേറ്റീവ് കമ്മിറ്റി അംഗം പി കൃഷ്ണകുമാർ പറഞ്ഞു.

പുതുക്കിയ സമയക്രമം അനുസരിച്ച്, ട്രെയിൻ നമ്പർ 66609 പാലക്കാട് ജംക്ഷനില് നിന്ന് രാവിലെ 7.20-ന് പുറപ്പെട്ട് ചൊവ്വാഴ്ച ഒഴികെ എല്ലാ ദിവസവും രാവിലെ 11.15-ന് എറണാകുളം ജംക്ഷനിലെത്തും. മടക്ക സർവീസായ ട്രെയിൻ നമ്പർ 66610 ഉച്ചയ്ക്ക് 2.45-ന് എറണാകുളം ജംക്ഷനില് നിന്ന് പുറപ്പെട്ട് വൈകുന്നേരം 6.35-ന് പാലക്കാട് ജംക്ഷനിലെത്തും.

പൊള്ളാച്ചി ലിങ്ക് സർവീസുകളില്, ട്രെയിൻ നമ്പർ 66623 എല്ലാ ദിവസവും വൈകുന്നേരം 7-ന് പാലക്കാട് നിന്ന് പുറപ്പെട്ട് രാത്രി 9.10-ന് പൊള്ളാച്ചിയിലെത്തും. ട്രെയിൻ നമ്പർ 66624 തിങ്കളും ചൊവ്വയും ഒഴികെ എല്ലാ ദിവസവും രാവിലെ 5.15-ന് പൊള്ളാച്ചിയില് നിന്ന് പുറപ്പെട്ട് രാവിലെ 7.10-ന് പാലക്കാട് എത്തും.

അതേസമയം യാത്രക്കാരുടെ ശക്തമായ പ്രതിഷേധവും പരാതികളും പരിഗണിച്ച് പാലരുവി എക്സ്പ്രസിന്റെ കോച്ചുകളുടെ എണ്ണവും വീണ്ടും 18 ആക്കി പുനഃസ്ഥാപിച്ചിട്ടുണ്ട്. നേരത്തെ കോച്ചുകളുടെ എണ്ണം കുറച്ചതിനെ തുടർന്ന് യാത്രക്കാർ കടുത്ത പ്രതിഷേധം ഉയർത്തിയിരുന്നു. പ്രത്യേകിച്ച് അവധി ദിവസങ്ങളിലും തിരക്കേറിയ സീസണുകളിലും ട്രെയിനില് കയറാൻ പോലും ബുദ്ധിമുട്ടുണ്ടായിരുന്നുവെന്നാണ് യാത്രക്കാരുടെ പരാതി.

പരമ്പരാഗത പാസഞ്ചർ റേക്കുകള്ക്ക് പകരം ആധുനിക മെമു റേക്കുകള് കൊണ്ടുവരുന്നത് ദക്ഷിണ റെയില്വേയുടെ ദീർഘകാല പദ്ധതിയുടെ ഭാഗമാണെന്ന് റെയില്വേ ഉദ്യോഗസ്ഥർ വ്യക്തമാക്കി. കൂടുതല് യാത്രക്കാരെ ഉള്ക്കൊള്ളാൻ കഴിയുന്ന രൂപകല്പ്പന, കോച്ചുകള്ക്കുള്ളിലെ തുറന്ന സജ്ജീകരണം, വേഗത്തില് സ്റ്റാർട്ട് ചെയ്യാനും സ്റ്റേഷനുകള്ക്കിടയില് സമയം ലാഭിക്കാനുമുള്ള കഴിവ് എന്നിവയാണ് മെമു ട്രെയിനുകളുടെ പ്രധാന സവിശേഷതകള്.

എന്നാല് പുതിയ റേക്കുകളുടെ ലഭ്യത കുറവാണ് ഈ പദ്ധതി വേഗത്തില് നടപ്പാക്കുന്നതിന് പ്രധാന തടസ്സമായതെന്ന് ഒരു മുതിർന്ന റെയില്വേ ഉദ്യോഗസ്ഥനെ ഉദ്ധരിച്ച് ടൈംസ് ഓഫ് ഇന്ത്യ റിപ്പോർട്ട് ചെയ്തു. ചെന്നൈയിലെ ഇന്റഗ്രല് കോച്ച് ഫാക്ടറിയുടെ (ICF) ഉത്പാദന ശേഷിയുടെ വലിയൊരു വിഹിതം ഇപ്പോള് വന്ദേ ഭാരത് ട്രെയിനുകളുടെ നിർമ്മാണത്തിനായി മാറ്റിവെച്ചിരിക്കുന്നതും മെമു റേക്കുകളുടെ ലഭ്യതയെ ബാധിച്ചുവെന്ന് ഉദ്യോഗസ്ഥർ വിശദീകരിച്ചു.

---------------

Hindusthan Samachar / CHANDHU CHANDRASEKHAR