Bengaluru, 27 മെയ് (H.S.)

ബെംഗളൂരു: കർണാടക കോൺഗ്രസിൽ വൻ രാഷ്ട്രീയ അഴിച്ചുപണിക്കുള്ള സാധ്യതകൾ ശക്തമാകുന്നു. സംസ്ഥാനത്ത് നേതൃമാറ്റം ഉണ്ടാകുമെന്ന സൂചനകൾക്കിടെ, പട്ടികജാതി (SC), മറ്റ് പിന്നാക്ക വിഭാഗങ്ങൾ (OBC), വനിതകൾ എന്നിവരെ പ്രതിനിധീകരിച്ച് മൂന്ന് പുതിയ ഉപമുഖ്യമന്ത്രിമാരെ നിയമിക്കാൻ കോൺഗ്രസ് ഹൈക്കമാൻഡ് ആലോചിക്കുന്നതായി റിപ്പോർട്ടുകൾ പുറത്തുവന്നു. നിലവിലെ മുഖ്യമന്ത്രി സിദ്ധരാമയ്യയോട് പദവി ഒഴിയാൻ പാർട്ടി നേതൃത്വം ആവശ്യപ്പെട്ടതായും ഇതിന് പകരമായി അദ്ദേഹത്തിന് ദേശീയ തലത്തിൽ വലിയ സംഘടനാ ചുമതലയും രാജ്യസഭാ സീറ്റും വാഗ്ദാനം ചെയ്തതായും വിശ്വസനീയമായ കേന്ദ്രങ്ങൾ വ്യക്തമാക്കുന്നു.

നേതൃമാറ്റ ചർച്ചകൾ സജീവമായതോടെ, കർണാടക മുഖ്യമന്ത്രി സിദ്ധരാമയ്യ മേയ് 28 വ്യാഴാഴ്ച ഗവർണർ താവർചന്ദ് ഗെഹ്ലോട്ടുമായി കൂടിക്കാഴ്ചയ്ക്ക് സമയം തേടിയിട്ടുണ്ട്. വ്യാഴാഴ്ച അദ്ദേഹം തന്റെ രാജി സമർപ്പിച്ചേക്കുമെന്നാണ് മുഖ്യമന്ത്രിയുടെ ഓഫീസുമായി (CMO) അടുത്ത വൃത്തങ്ങൾ നൽകുന്ന സൂചന. സിദ്ധരാമയ്യ രാജിവെക്കുന്നതോടെ നിലവിലെ ഉപമുഖ്യമന്ത്രി ഡി.കെ. ശിവകുമാർ അടുത്ത കർണാടക മുഖ്യമന്ത്രിയായി ചുമതലയേൽക്കാനാണ് വഴിതെളിയുന്നത്.

രാഹുൽ ഗാന്ധിയിൽ നിന്ന് നേരിട്ട് നിർദ്ദേശം ലഭിച്ച പശ്ചാത്തലത്തിലാണ് 77-കാരനായ സിദ്ധരാമയ്യ പദവി ഒഴിയാൻ തയ്യാറായതെന്നാണ് വിവരം. പദവി ഒഴിഞ്ഞ ശേഷം ദേശീയ രാഷ്ട്രീയത്തിലേക്ക് മാറാനുള്ള ഹൈക്കമാൻഡിന്റെ ഓഫർ അദ്ദേഹം പെട്ടെന്ന് സ്വീകരിച്ചിട്ടില്ലെങ്കിലും, പാർട്ടി താല്പര്യം മുൻനിർത്തി വഴങ്ങുകയായിരുന്നു. പുതിയ രാഷ്ട്രീയ സാഹചര്യങ്ങളുടെ പശ്ചാത്തലത്തിൽ വ്യാഴാഴ്ച രാവിലെ തന്റെ കാബിനറ്റ് സഹപ്രവർത്തകർക്കായി സിദ്ധരാമയ്യ ഔദ്യോഗിക വസതിയിൽ വിരുന്ന് (Breakfast Meeting) ഒരുക്കിയിട്ടുണ്ട്. ഡൽഹിയിലുള്ള ഡി.കെ. ശിവകുമാറും വ്യാഴാഴ്ച ബെംഗളൂരുവിൽ തിരിച്ചെത്തി ഈ യോഗത്തിൽ പങ്കെടുത്തേക്കും.

അധികാര തർക്കവും 2.5 വർഷത്തെ ഫോർമുലയും

2023-ലെ കർണാടക നിയമസഭാ തിരഞ്ഞെടുപ്പ് വിജയത്തിന് ശേഷം സിദ്ധരാമയ്യയും ഡി.കെ. ശിവകുമാറും തമ്മിൽ മുഖ്യമന്ത്രി പദവിയെച്ചൊല്ലി കടുത്ത തർക്കമുണ്ടായിരുന്നു. ആദ്യത്തെ രണ്ടര വർഷം സിദ്ധരാമയ്യയും ബാക്കി കാലാവധി ഡി.കെ. ശിവകുമാറും മുഖ്യമന്ത്രിയാകും എന്ന ധാരണയുടെ പുറത്താണ് അന്ന് തർക്കങ്ങൾ പരിഹരിച്ചിരുന്നത്. ഈ കാലാവധി പൂർത്തിയാകുന്നതിന് മുന്നോടിയായി, മുഖ്യമന്ത്രി പദവിക്കായുള്ള അവകാശവാദവുമായി ശിവകുമാർ ക്യാമ്പ് ഹൈക്കമാൻഡിന് മേൽ കടുത്ത സമ്മർദ്ദം ചെലുത്തിവരികയായിരുന്നു.

പാർട്ടി അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി എന്നിവർ സിദ്ധരാമയ്യയുമായും ശിവകുമാറുമായും ഡൽഹിയിൽ വെച്ച് വിശദമായ ചർച്ചകൾ നടത്തിയിരുന്നു. അടുത്ത മാസം നടക്കാനിരിക്കുന്ന രാജ്യസഭാ, ലെജിസ്ലേറ്റീവ് കൗൺസിൽ തിരഞ്ഞെടുപ്പുകൾക്ക് ശേഷം നേതൃമാറ്റത്തിൽ അന്തിമ പ്രഖ്യാപനം ഉണ്ടായേക്കുമെന്നാണ് കോൺഗ്രസ് കേന്ദ്രങ്ങൾ ആദ്യം സൂചിപ്പിച്ചിരുന്നതെങ്കിലും, രാഷ്ട്രീയ നീക്കങ്ങൾ അതിവേഗത്തിലാണ് മുന്നോട്ട് പോകുന്നത്.

അതേസമയം, കർണാടകയിലെ നേതൃമാറ്റ വാർത്തകൾ വെറും അഭ്യൂഹങ്ങൾ മാത്രമാണെന്ന് കോൺഗ്രസ് ഔദ്യോഗികമായി പ്രതികരിച്ചു. ഡൽഹിയിൽ നടന്ന ചർച്ചകൾ വരാനിരിക്കുന്ന തിരഞ്ഞെടുപ്പുകളെക്കുറിച്ച് മാത്രമായിരുന്നു എന്നാണ് കോൺഗ്രസ് വക്താക്കൾ അവകാശപ്പെടുന്നത്. എന്നാൽ ഗവർണറെ കാണാൻ സമയം ചോദിച്ചതും കാബിനറ്റ് യോഗം വിളിച്ചതും കർണാടക രാഷ്ട്രീയത്തിൽ വലിയൊരു മാറ്റത്തിന്റെ തുടക്കമാണെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. മൂന്ന് ഉപമുഖ്യമന്ത്രിമാരെ കൊണ്ടുവരുന്നതിലൂടെ വരാനിരിക്കുന്ന തിരഞ്ഞെടുപ്പുകളിൽ വിവിധ വിഭാഗങ്ങളുടെ പിന്തുണ ഉറപ്പാക്കാനും അതോടൊപ്പം പാർട്ടിയിലെ ആഭ്യന്തര കലഹങ്ങൾ പരിഹരിക്കാനുമാണ് ഹൈക്കമാൻഡ് ലക്ഷ്യമിടുന്നത്.

---------------

Hindusthan Samachar / Roshith K