Kannur, 27 മെയ് (H.S.)

കണ്ണൂർ: മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയന്റെ വീട്ടിൽ എൻഫോഴ്സ്മെന്റ് ഡയറക്ടറേറ്റ് (ഇഡി) നടത്തിയ റെയ്ഡ് കേന്ദ്ര സർക്കാരിന്റെ മുൻകൂട്ടി തയാറാക്കിയ ആസൂത്രിത നീക്കമാണെന്ന് സിപിഐഎം കണ്ണൂർ ജില്ലാ സെക്രട്ടറി കെ.കെ രാഗേഷ് ആരോപിച്ചു. പിണറായി വിജയനെയും അദ്ദേഹത്തിന്റെ കുടുംബത്തെയും കള്ളക്കേസുകളിൽ കുടുക്കി, കേരളത്തിലെ ഇടതുപക്ഷ പ്രസ്ഥാനത്തെയും സിപിഐഎമ്മിനെയും തകർക്കാനാണ് പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ശ്രമം നടക്കുന്നതെന്ന് അദ്ദേഹം കുറ്റപ്പെടുത്തി. കണ്ണൂരിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.

ഡൽഹി മുഖ്യമന്ത്രി അരവിന്ദ് കേജ്രിവാളിനെതിരെ കേന്ദ്ര ഏജൻസികളെ ഉപയോഗിച്ച് നടത്തിയ രാഷ്ട്രീയ വേട്ടയാടലിന് സമാനമായ നടപടികളാണ് ഇപ്പോൾ കേരളത്തിലും അരങ്ങേറുന്നത്. രാഷ്ട്രീയ എതിരാളികളെ കേന്ദ്ര ഏജൻസികളെ ഉപയോഗിച്ച് നിശ്ശബ്ദരാക്കുക എന്ന ബിജെപിയുടെ സ്ഥിരം കുതന്ത്രമാണിത്. ഫാസിസ്റ്റ് ശൈലിയിലുള്ള ഇത്തരം ഭീഷണികൾക്ക് മുന്നിൽ സിപിഐഎം വഴങ്ങില്ലെന്നും രാഷ്ട്രീയമായും നിയമപരമായും ഇതിനെ ശക്തമായി നേരിടുമെന്നും കെ.കെ രാഗേഷ് വ്യക്തമാക്കി.

ബിജെപി - കോൺഗ്രസ് സംയുക്ത ഗൂഢാലോചന

ഇടതുപക്ഷത്തെ തകർക്കാൻ ബിജെപിയും കോൺഗ്രസും ഒത്തുകളിക്കുകയാണെന്ന് രാഗേഷ് ആരോപിച്ചു. ഇത് ഇരു പാർട്ടികളും ചേർന്നുള്ള ഒരു 'സംയുക്ത ഓപ്പറേഷൻ' ആണ്.

മുഖ്യമന്ത്രി വി.ഡി. സതീശൻ ഡൽഹിയിൽ പോയി പ്രധാനമന്ത്രി നരേന്ദ്ര മോദിയെയും ആഭ്യന്തര മന്ത്രി അമിത് ഷായെയും നേരിട്ട് കണ്ടതിന് തൊട്ടുപിന്നാലെയാണ് ഇത്തരമൊരു റെയ്ഡ് ഉണ്ടായിരിക്കുന്നത് എന്നത് അതീവ ഗൗരവകരമാണ്. ബിജെപിക്ക് വേണ്ടി ഒത്താശ ചെയ്യുന്ന നേതാവായി വി.ഡി. സതീശൻ മാറിയിരിക്കുന്നു.

—

കെ.കെ. രാഗേഷ്

കേരളത്തിൽ കോൺഗ്രസും ബിജെപിയും ഒരേ അച്ചുതണ്ടായി പ്രവർത്തിക്കുകയാണ്. പിണറായി വിജയനെ ജയിലിലടയ്ക്കണമെന്ന് നിരന്തരം ആവശ്യപ്പെടുന്നത് കോൺഗ്രസ് നേതാക്കളാണ്. ബിജെപിയുടെ രാഷ്ട്രീയ താല്പര്യങ്ങൾക്ക് കേരളത്തിൽ കോൺഗ്രസ് കുടപിടിക്കുകയാണെന്നും അദ്ദേഹം കൂട്ടിച്ചേർത്തു.

പ്രതിഷേധവുമായി പാർട്ടി പ്രവർത്തകർ

മുഖ്യമന്ത്രിയുടെ മകൾ ടി. വീണയുടെ ഉടമസ്ഥതയിലുണ്ടായിരുന്ന എക്സാലോജിക് കമ്പനിയും സിഎംആർഎല്ലും തമ്മിലുള്ള സാമ്പത്തിക ഇടപാടുകളുമായി ബന്ധപ്പെട്ടാണ് ഇഡി റെയ്ഡ് നടത്തിയത്. റെയ്ഡ് വാർത്ത പുറത്തുവന്നതോടെ കണ്ണൂരിലെ പിണറായി വിജയന്റെ വസതിക്ക് മുന്നിലേക്ക് വൻതോതിൽ സിപിഐഎം പ്രവർത്തകർ പ്രതിഷേധവുമായി ഒഴുകിയെത്തി. കേന്ദ്ര സർക്കാരിനെതിരായും ഇഡിക്കെതിരായും ശക്തമായ മുദ്രാവാക്യങ്ങൾ മുഴക്കിയ പ്രവർത്തകർ സ്ഥലത്ത് തടിച്ചുകൂടി.

പ്രതിഷേധം ശക്തമായതിനെ തുടർന്ന് സ്ഥലത്ത് വൻ പൊലീസ് സന്നാഹത്തെയാണ് വിന്യസിച്ചിരിക്കുന്നത്. മുതിർന്ന നേതാക്കളായ പി. ജയരാജൻ, കെ.കെ രാഗേഷ് എന്നിവർ നേരിട്ടെത്തിയാണ് പ്രതിഷേധങ്ങൾക്ക് നേതൃത്വം നൽകുന്നത്.

പാർലമെന്റ് തെരഞ്ഞെടുപ്പിലെ തിരിച്ചടികൾക്ക് പിന്നാലെ പാർട്ടിയെ പ്രതിരോധത്തിലാക്കാമെന്നത് കേന്ദ്രത്തിന്റെ വ്യാമോഹം മാത്രമാണെന്നും, ത്രിപുരയിലും മറ്റ് സംസ്ഥാനങ്ങളിലും ബിജെപി പയറ്റിയ അതേ തന്ത്രം കേരളത്തിൽ വിലപ്പോവില്ലെന്നും നേതാക്കൾ മുന്നറിയിപ്പ് നൽകി. ജനങ്ങളെ അണിനിരത്തി ഈ രാഷ്ട്രീയ വേട്ടയാടലിനെതിരെ ശക്തമായ പ്രതിരോധം തീർക്കാനാണ് പാർട്ടി തീരുമാനം.

---------------

Hindusthan Samachar / Roshith K