Thiruvananthapuram , 28 മെയ് (H.S.)

സംസ്ഥാനത്ത് മഴ മുന്നറിയിപ്പില് മാറ്റം. ഇന്ന് ഏഴ് ജില്ലകളില് യെല്ലോ അലേര്ട്ട് പ്രഖ്യാപിച്ചിട്ടുണ്ട്.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് യെല്ലോ അലേര്ട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റർ മുതല് 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

കേരളത്തില് ഇത്തവണ മണ്സൂണ് എത്തുന്നത് പ്രതീക്ഷിച്ചതിനേക്കാള് വൈകുമെന്ന് സൂചന. മെയ് 26-ഓടെ കാലവർഷം സംസ്ഥാനത്ത് പ്രവേശിക്കുമെന്നായിരുന്നു ഇന്ത്യൻ കാലാവസ്ഥാ വകുപ്പിന്റെ (IMD) നേരത്തെ പ്രവചനം. സാധാരണ ജൂണ് ഒന്നിന് എത്തുന്ന മണ്സൂണ് ഇത്തവണ അഞ്ച് ദിവസം മുൻപേ എത്തുമെന്ന വിലയിരുത്തലും ഉണ്ടായിരുന്നു. എന്നാല് ബംഗാള് ഉള്ക്കടലില് രൂപപ്പെട്ട ചുഴലിക്കാറ്റും അതിനെ പടിഞ്ഞാറന് കാറ്റ് ദുര്ബലമായതുമാണ് കാലവർഷം വൈകാൻ കാരണമായത്.

എന്നിരുന്നാലും നിലവിലെ സാഹചര്യം വലിയ ആശങ്കയ്ക്ക് ഇടയാക്കുന്നതല്ലെന്നാണ് കാലാവസ്ഥാ നിരീക്ഷകരുടെ വിലയിരുത്തല്. പ്രാരംഭ ഘട്ടത്തിലെ മന്ദഗതിക്ക് ശേഷം തെക്കുപടിഞ്ഞാറൻ മണ്സൂണ് വീണ്ടും ശക്തിപ്രാപിക്കുന്നതിന്റെ സൂചനകളാണ് ഇപ്പോള് ലഭിക്കുന്നത്. അറബിക്കടല്, ലക്ഷദ്വീപ്, ബംഗാള് ഉള്ക്കടല്, ആൻഡമാൻ കടല് എന്നിവിടങ്ങളിലേക്ക് മണ്സൂണ് വ്യാപിച്ചതായി ഇന്ത്യൻ കാലാവസ്ഥാ വകുപ്പ് അറിയിച്ചു.

മെയ് 27 ബുധനാഴ്ച പുറത്തിറക്കിയ ഏറ്റവും പുതിയ അപ്ഡേറ്റില്, അടുത്ത രണ്ട് മുതല് മൂന്ന് ദിവസത്തിനുള്ളില് മണ്സൂണ് കൂടുതല് അറബിക്കടലിലേക്കും ബംഗാള് ഉള്ക്കടലിലേക്കും മുന്നേറാൻ അനുകൂലമായ അന്തരീക്ഷ, സമുദ്ര സാഹചര്യങ്ങള് രൂപപ്പെട്ടതായി ഐ.എം.ഡി വ്യക്തമാക്കി. നിലവില് തെക്ക്-പടിഞ്ഞാറൻ അറബിക്കടല് മുതല് ബംഗാള് ഉള്ക്കടല് വഴിയായി മ്യാൻമർ വരെയാണ് മണ്സൂണ് വ്യാപിച്ചിരിക്കുന്നത്.

മണ്സൂണ് മുന്നേറ്റം രേഖപ്പെടുത്തുന്ന ഐ.എം.ഡി മാപ്പ് പ്രകാരം, തെക്കൻ ബംഗാള് ഉള്ക്കടലിലും ആൻഡമാൻ കടലിലും മഴ സജീവമായിട്ടുണ്ട്. അവിടെ നിന്ന് മണ്സൂണ് ഇപ്പോള് വടക്കുപടിഞ്ഞാറൻ ദിശയിലേക്ക് നീങ്ങുകയാണ്. നിലവിലെ പാത സാധാരണ മണ്സൂണ് ഗതിപാതയോട് ചേർന്നുനില്ക്കുന്നതാണെങ്കിലും, നേരത്തെ പ്രവചിച്ചതിനെക്കാള് അല്പം പിന്നിലാണെന്ന് കാലാവസ്ഥാ വിദഗ്ധർ ചൂണ്ടിക്കാട്ടുന്നു.

കേരളത്തില് കാലവർഷം വൈകുന്നതിന്റെ പശ്ചാത്തലത്തില് ഉത്തരേന്ത്യയിലും മഴ എത്തുമോ എന്ന ആശങ്ക ഉയരുന്നുണ്ടെങ്കിലും, ഇപ്പോഴത്തെ സാഹചര്യത്തില് വലിയ കാലതാമസം ഉണ്ടാകില്ലെന്ന സൂചനയാണ് ഐ.എം.ഡി നല്കുന്നത്. കടുത്ത ചൂടില് വലയുന്ന ഡല്ഹി ഉള്പ്പെടെയുള്ള ഉത്തരേന്ത്യൻ സംസ്ഥാനങ്ങളിലെ ജനങ്ങള് ഇപ്പോള് പ്രതീക്ഷയോടെ കാത്തിരിക്കുന്നത് മണ്സൂണിന്റെ വരവിനെയാണ്.

ചരിത്രപരമായി ഡല്ഹിയില് ജൂണ് 27-ഓടെയാണ് തെക്കുപടിഞ്ഞാറൻ മണ്സൂണ് എത്തുന്നത്. പുതിയ വിലയിരുത്തലുകള് പ്രകാരം ഇത്തവണയും ജൂണ് 25 മുതല് 30 വരെ കാലയളവിനിടെ മണ്സൂണ് ഡല്ഹിയിലെത്തുമെന്നാണ് പ്രതീക്ഷിക്കുന്നത്. തുടക്കത്തിലെ മന്ദഗതിക്ക് ശേഷം മണ്സൂണ് അതിവേഗം മുന്നേറാനുള്ള സാധ്യതയും വിദഗ്ധർ ചൂണ്ടിക്കാട്ടുന്നു.

അതേസമയം, ഡല്ഹിയിലും എൻ.സി.ആർ മേഖലയിലും വരും ദിവസങ്ങളില് ഇടിമിന്നലോടുകൂടിയ കാറ്റിനും ഒറ്റപ്പെട്ട മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഇത് നിലവിലെ ഉഷ്ണതരംഗത്തില് നിന്ന് താല്ക്കാലിക ആശ്വാസം നല്കുമെങ്കിലും, യഥാർത്ഥ മണ്സൂണ് മഴയായിരിക്കില്ല.

കേരളത്തില് കാലവർഷം വൈകുന്നത് കർഷകരെയും സാധാരണ ജനങ്ങളെയും ഒരുപോലെ ആശങ്കയിലാക്കിയിട്ടുണ്ട്. അതേസമയം, മണ്സൂണ് വീണ്ടും ശക്തിപ്രാപിക്കുന്നതിന്റെ സൂചനകള് ലഭിക്കുന്നതിനാല് അടുത്ത ദിവസങ്ങളില് മഴ സജീവമാകുമെന്ന പ്രതീക്ഷയിലാണ് കാലാവസ്ഥാ വിദഗ്ധരും സംസ്ഥാനവും.

---------------

Hindusthan Samachar / CHANDHU CHANDRASEKHAR