Thiruvananthapuram, 28 മെയ് (H.S.)

തിരുവനന്തപുരം:

വിവാദമായ സി.എം.ആർ.എൽ–എക്സാലോജിക് ദുരൂഹ സാമ്പത്തിക ഇടപാട് കേസിൽ മുൻ മുഖ്യമന്ത്രിയുടെ മകൾ വീണ വിജയനെ ചോദ്യം ചെയ്യാനായി എൻഫോഴ്സ്മെന്റ് ഡയറക്ടറേറ്റ് (ഇ.ഡി) ഉടൻ സമൻസ് അയക്കും. കഴിഞ്ഞ ദിവസം തിരുവനന്തപുരത്ത് പരിശോധനയ്ക്കെത്തിയ കേന്ദ്ര അന്വേഷണ ഉദ്യോഗസ്ഥർക്കും അവരുടെ വാഹനങ്ങൾക്കും നേരെ സി.പി.എം പ്രവർത്തകരിൽ നിന്നും ഉണ്ടായ ആക്രമണത്തെ അതീവ ഗൗരവത്തോടെയാണ് കേന്ദ്ര ഏജൻസി കാണുന്നത്. ഈ അക്രമ സംഭവം വീണ വിജയനെതിരെ നിയമപരമായി ശക്തമായ ആയുധമാക്കാനാണ് ഇ.ഡിയുടെ നീക്കം.

സമൻസിനെതിരെ വീണ വിജയൻ കോടതിയെ സമീപിക്കാനുള്ള സാധ്യത മുന്നിൽക്കണ്ട് ഇ.ഡി ഇതിനോടകം തന്നെ പ്രതിരോധ തന്ത്രങ്ങൾ മെനഞ്ഞു കഴിഞ്ഞു. കോടതിയിൽ വെല്ലുവിളികൾ ഉണ്ടായാൽ, ഉദ്യോഗസ്ഥരുടെ സുരക്ഷയെ ബാധിക്കുന്ന തരത്തിൽ സംസ്ഥാനത്തുണ്ടായ ഈ അക്രമ സംഭവങ്ങൾ ചൂണ്ടിക്കാട്ടി കടുത്ത നിലപാടായിരിക്കും ഇ.ഡി സ്വീകരിക്കുക. അന്വേഷണത്തോട് സഹകരിക്കാതെ ക്രമസമാധാന പ്രശ്നങ്ങൾ ഉണ്ടാക്കാൻ ശ്രമിക്കുന്നു എന്ന വാദം കോടതിയിൽ ഉയർത്താനാണ് ഇ.ഡിയുടെ തീരുമാനം.

242 അക്കൗണ്ടുകൾ മരവിപ്പിച്ചു; 18.36 കോടിയുടെ നിക്ഷേപം ലോക്ക് ചെയ്തു

കേസുമായി ബന്ധപ്പെട്ട് കഴിഞ്ഞ ദിവസങ്ങളിൽ നടന്ന വിപുലമായ റെയ്ഡുകൾക്ക് പിന്നാലെ ഇ.ഡി കടുത്ത സാമ്പത്തിക നടപടികളിലേക്ക് കടന്നിരിക്കുകയാണ്. വീണ വിജയന്റേത് ഉൾപ്പെടെ കേസുമായി ബന്ധമുള്ള വ്യക്തികളുടെയും സ്ഥാപനങ്ങളുടെയും 242 ബാങ്ക് അക്കൗണ്ടുകളിലായി കിടന്നിരുന്ന 18.36 കോടി രൂപയാണ് ഇ.ഡി ഒരൊറ്റയടിക്ക് മരവിപ്പിച്ചത്. ഇതിൽ വീണ വിജയന്റെ പേരിലുള്ള എച്ച്.ഡി.എഫ്.സി ബാങ്ക് അക്കൗണ്ടും സ്ഥിരനിക്ഷേപ രേഖകളും ഉൾപ്പെടുന്നുണ്ടെന്നാണ് വിവരം.

കണ്ടെത്തിയ ഡിജിറ്റൽ തെളിവുകളുടെയും ബാങ്ക് രേഖകളുടെയും അടിസ്ഥാനത്തിൽ പണത്തിന്റെ ഉറവിടം വ്യക്തമാക്കാനാണ് ഇ.ഡി ആവശ്യപ്പെടുന്നത്.

അന്വേഷണത്തിന്റെ പശ്ചാത്തലം: യാതൊരുവിധ ഐ.ടി സേവനങ്ങളും നൽകാതെ സി.എം.ആർ.എൽ എന്ന സ്വകാര്യ കരിമണൽ കമ്പനിയിൽ നിന്നും വീണ വിജയന്റെ ഉടമസ്ഥതയിലുള്ള എക്സാലോജിക് സൊല്യൂഷൻസ് കോടിക്കണക്കിന് രൂപ കൈപ്പറ്റി എന്നതാണ് കേസ്. ഇത് കേവലമൊരു സേവന കരാറല്ലെന്നും മറിച്ച് അവിഹിത പണമിടപാടാണെന്നും (Money Laundering) കണ്ടെത്തിയതിനെ തുടർന്നാണ് ഇ.ഡി അന്വേഷണം ഊർജ്ജിതമാക്കിയത്.

രാഷ്ട്രീയ പ്രതിരോധവുമായി സി.പി.എം

അതേസമയം, രാഷ്ട്രീയ പ്രേരിതമായാണ് കേന്ദ്ര ഏജൻസികൾ മുൻ മുഖ്യമന്ത്രിയെയും കുടുംബത്തെയും ലക്ഷ്യമിടുന്നതെന്നാണ് സി.പി.എം ആരോപിക്കുന്നത്. റെയ്ഡ് നടന്ന തിരുവനന്തപുരത്തെ വസതിക്ക് മുന്നിൽ സംഘടിച്ച സി.പി.എം–ഡി.വൈ.എഫ്.ഐ പ്രവർത്തകർ ഇ.ഡി ഉദ്യോഗസ്ഥരുടെ വാഹനങ്ങൾക്ക് നേരെ കല്ലേറും അക്രമവും അഴിച്ചുവിട്ടിരുന്നു. ഇത് വലിയ ക്രമസമാധാന പ്രശ്നങ്ങൾക്ക് വഴിമാറുകയും ചെയ്തു.

ഈ അക്രമ സംഭവത്തിൽ പങ്കെടുത്തവർക്കെതിരെ വധശ്രമം ഉൾപ്പെടെയുള്ള ജാമ്യമില്ലാ വകുപ്പുകൾ ചുമത്തി പോലീസ് കേസെടുത്തിട്ടുണ്ട്. എങ്കിലും, സംസ്ഥാനത്ത് രാഷ്ട്രീയ പ്രതിരോധം ശക്തമാക്കാനാണ് ഇടതുമുന്നണിയുടെ തീരുമാനം. എന്നാൽ ഈ പ്രതിഷേധങ്ങളെല്ലാം തന്നെ വരുംദിവസങ്ങളിൽ കോടതിയിൽ വീണ വിജയന് കനത്ത തിരിച്ചടിയാകുമെന്നാണ് നിയമവിദഗ്ധർ വിലയിരുത്തുന്നത്. ചോദ്യം ചെയ്യൽ നടപടികൾക്കായി വീണയെ കേരളത്തിന് പുറത്തേക്ക് വിളിച്ചുവരുത്താനുള്ള സാധ്യതയും ഇ.ഡി തള്ളിക്കളയുന്നില്ല.

---------------

Hindusthan Samachar / Roshith K