Enter your Email Address to subscribe to our newsletters
New delhi, 30 മെയ് (H.S.)
ഇന്ത്യയും അമേരിക്കയും തമ്മിലുള്ള ഇടക്കാല വ്യാപാര കരാറിനായുള്ള ചര്ച്ചകള് 99 ശതമാനം പൂര്ത്തിയായതായും ബാക്കി ഉടന് പരിഹരിക്കപ്പെടുമെന്നും യുഎസ് അംബാസഡര് സെര്ജിയോ ഗോര് അറിയിച്ചു. ഡല്ഹി ഐഐടിയില് സംഘടിപ്പിച്ച 'യുഎസ് ഇന്ത്യ ട്രസ്റ്റ് ഇനിഷ്യേറ്റീവ്' എന്ന പരിപാടിയില് സംസാരിക്കവെയാണ് ഇരുരാജ്യങ്ങളും തമ്മിലുള്ള സാമ്പത്തികബന്ധത്തിന്റെ പുതിയ ദിശയെക്കുറിച്ച് അദ്ദേഹം വെളിപ്പെടുത്തിയത്. വരും ആഴ്ചകളില് തന്നെ ഈ സുപ്രധാന കരാറില് ഇരുരാജ്യങ്ങളും ഒപ്പുവെക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു.
കരാറിന്റെ ബാക്കി കാര്യങ്ങള് ചര്ച്ച ചെയ്യുന്നതിനായി അമേരിക്കന് ചീഫ് ട്രേഡ് നെഗോഷ്യേറ്ററുടെ നേതൃത്വത്തിലുള്ള ഉന്നതതല സംഘം ജൂണ് ഒന്നു മുതല് നാല് വരെ ഇന്ത്യ സന്ദര്ശിക്കുമെന്ന് ഗോര് പറഞ്ഞു. കഴിഞ്ഞ ഏപ്രിലില് അമേരിക്കയില് വെച്ച് ഇരുരാജ്യങ്ങളിലെയും ഉദ്യോഗസ്ഥര് തമ്മില് നടത്തിയ വ്യാപാര ചര്ച്ചകളുടെ തുടര്ച്ചയാണിത്. വിപണി ലഭ്യത, കസ്റ്റംസ് നടപടിക്രമങ്ങള്, താരിഫ് ഇതര തടസ്സങ്ങള്, വ്യാപാര സൗകര്യം, സാമ്പത്തിക സുരക്ഷാ സഹകരണം തുടങ്ങിയ നിര്ണ്ണായക വിഷയങ്ങളിലാണ് നിലവില് ചര്ച്ചകള് പുരോഗമിക്കുന്നത്.
കഴിഞ്ഞ രണ്ട് പതിറ്റാണ്ടിനിടെ ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാരത്തില് വന് വര്ദ്ധനവാണ് ഉണ്ടായിരിക്കുന്നത്. ചരക്ക് സേവന മേഖലകളിലായി 20 ബില്യണ് ഡോളറില് നിന്ന് 220 ബില്യണ് ഡോളറിലേക്കാണ് ഈ വ്യാപാര ബന്ധം വളര്ന്നതെന്ന് ഗോര് ചൂണ്ടിക്കാട്ടി. അമേരിക്കന് ബിസിനസുകള്ക്കും തൊഴിലാളികള്ക്കും കൂടുതല് അവസരങ്ങള് സൃഷ്ടിക്കുന്ന രീതിയില് വ്യാപാരം വിപുലീകരിക്കാനാണ് പ്രസിഡന്റ് ഡൊണാള്ഡ് ട്രംപ് ലക്ഷ്യമിടുന്നത്. ഇന്ത്യ അമേരിക്കയുടെ ഏറ്റവും പ്രധാനപ്പെട്ട വ്യാപാര പങ്കാളികളിലൊന്നാണെന്നും അദ്ദേഹം പറഞ്ഞു.
ആര്ട്ടിഫിഷ്യല് ഇന്റലിജന്സ്, ഡിജിറ്റല് വ്യാപാരം, അഡ്വാന്സ്ഡ് മാനുഫാക്ചറിങ്, ഊര്ജ്ജം തുടങ്ങിയ നൂതന സാങ്കേതിക മേഖലകളിലെ സഹകരണത്തിനും ഇരുരാജ്യങ്ങളും വലിയ പ്രാധാന്യം നല്കുന്നു. പ്രധാനമന്ത്രി നരേന്ദ്ര മോദിയും പ്രസിഡന്റ് ട്രംപും ചേര്ന്ന് ഈ വര്ഷം തുടക്കം കുറിച്ച 'ട്രസ്റ്റ്' പദ്ധതി വഴി തന്ത്രപ്രധാനമായ സാങ്കേതിക വിദ്യകളില് നൂതനത്വം പ്രോത്സാഹിപ്പിക്കുകയാണ് ലക്ഷ്യം. ഇതിന്റെ ഭാഗമായി ഇന്ത്യയിലേക്ക് അത്യാധുനിക എഐ ചിപ്പുകളുടെ കൈമാറ്റം അമേരിക്കന് വാണിജ്യ വകുപ്പ് പുനരാരംഭിച്ചിട്ടുണ്ട്.
ഔഷധ മേഖലയിലും ബഹിരാകാശ രംഗത്തും ഇരുരാജ്യങ്ങളും തമ്മിലുള്ള ബന്ധം അതിശക്തമാണെന്ന് അംബാസഡര് വ്യക്തമാക്കി. അമേരിക്കയ്ക്ക് ആവശ്യമായ ജനറിക് മരുന്നുകളുടെ 40 ശതമാനവും ഇന്ത്യയില് നിന്നാണ് ഇറക്കുമതി ചെയ്യുന്നത്. വരും വര്ഷത്തില് ഔഷധ മേഖലയില് ഉള്പ്പെടെ ഏകദേശം 20.5 ബില്യണ് ഡോളറിന്റെ നിക്ഷേപ വാഗ്ദാനങ്ങള് ഉറപ്പാക്കാന് യുഎസ് ഡിപ്ലോമാറ്റിക് മിഷനുകള്ക്ക് സാധിച്ചിട്ടുണ്ട്. കൂടാതെ, കയറ്റുമതി നിയന്ത്രണ സംവിധാനങ്ങള് ആധുനികീകരിക്കുന്നതിലൂടെ സാങ്കേതിക സഹകരണം കൂടുതല് ദൃഢമാക്കാനാണ് ഇന്ത്യയും യുഎസും ലക്ഷ്യമിടുന്നതെന്നും അദ്ദേഹം സൂചിപ്പിച്ചു.
---------------
Hindusthan Samachar / Sreejith S
