Mangalore , 31 മെയ് (H.S.)

മംഗളൂരു-സൂറത്ത് പ്രത്യേക ട്രെയിൻ സർവീസ് ഇന്ത്യൻ റെയില്വേ സ്ഥിരപ്പെടുത്തി. ഈ റൂട്ടിലെ 09057/09058 നമ്പർ പ്രത്യേക ട്രെയിനാണ് ഇനി മുതല് 19057/19058 നമ്പർ ബൈ-വീക്ക്ലി എക്സ്പ്രസ് ആയി സർവീസ് നടത്തുക.

പുതിയ ക്രമീകരണം അനുസരിച്ച്, ജൂണ് 3 മുതല് സൂറത്തില് നിന്നും ജൂണ് 4 മുതല് മംഗളൂരു ജംഗ്ഷനില് നിന്നും സർവീസുകള് ആരംഭിക്കും.

19057 നമ്പർ സൂറത്ത്-മംഗളൂരു ജംഗ്ഷൻ ബൈ-വീക്ക്ലി എക്സ്പ്രസ് എല്ലാ ബുധനാഴ്ചയും ഞായറാഴ്ചയും വൈകുന്നേരം 7:35-ന് സൂറത്തില് നിന്ന് പുറപ്പെടും. പിറ്റേദിവസം വൈകുന്നേരം 7:45-ന് മംഗളൂരു ജംഗ്ഷനില് എത്തിച്ചേരും.

മറുവശത്ത്, 19058 നമ്പർ മംഗളൂരു ജംഗ്ഷൻ-സൂറത്ത് ബൈ-വീക്ക്ലി എക്സ്പ്രസ് എല്ലാ വ്യാഴാഴ്ചയും തിങ്കളാഴ്ചയും രാത്രി 10:30-ന് മംഗളൂരു ജംഗ്ഷനില് നിന്ന് യാത്ര തുടങ്ങും. ട്രെയിൻ പിറ്റേദിവസം രാത്രി 11:45-ന് സൂറത്തില് എത്തും.

ഈ ട്രെയിനിന് ഉധ്ന, വാല്സാദ്, വാപി, വസായി റോഡ്, പൻവേല്, രോഹ, ചിപ്ലൂണ്, രത്നഗിരി, സിന്ധുദുർഗ്, സാവന്ത്വാടി റോഡ്, തിവിം, മഡ്ഗാവ്, കാർവാർ, അങ്കോള, ഗോകർണ റോഡ്, കുമ്ത, മുരുഡേശ്വർ, ഭട്കല്, മൂകാംബിക റോഡ് ബൈന്ദൂർ, കുന്ദാപുര, ഉടുപ്പി, മുല്ക്കി, സുരത്കല് തുടങ്ങി നിരവധി പ്രധാന സ്റ്റേഷനുകളില് സ്റ്റോപ്പുണ്ടാകും.

മൊത്തം 20 കോച്ചുകളാണ് ഈ ട്രെയിനിലുണ്ടാവുക. ഇതില് ഒരു എ.സി. 2-ടയർ കോച്ച്, ഏഴ് എ.സി. 3-ടയർ കോച്ചുകള്, ആറ് സ്ലീപ്പർ ക്ലാസ് കോച്ചുകള്, നാല് ജനറല് കോച്ചുകള്, രണ്ട് എസ്.എല്.ആർ/ഡി കോച്ചുകള് എന്നിവ ഉള്പ്പെടുന്നു. ഇത് വിവിധതരം യാത്രക്കാർക്ക് സൗകര്യപ്രദമായ യാത്രാനുഭവം നല്കാൻ സഹായിക്കും.

അതേസമയം, യശ്വന്ത്പൂര്-വിജയപുര സ്പെഷ്യല് എക്സ്പ്രസ് ട്രെയിന് ഇനി ആഴ്ചയില് രണ്ട് ദിവസം സര്വീസ് നടത്തും. ഇതുവരെ ആഴ്ചയില് ഒരു സര്വീസ് ആയിരുന്നു. ജൂണ് ഒന്ന് മുതല് പുതിയ സര്വീസ് ആരംഭിക്കും. എന്നാല് സ്റ്റോപ്പുകളിലും സമയത്തിലും മാറ്റമുണ്ടാകില്ല. യശ്വന്ത്പൂരില് നിന്ന് എല്ലാ ശനിയാഴ്ചകളിലും തിങ്കളാഴ്ചകളിലുമാണ് ട്രെയിന് പുറപ്പെടുക. മടക്കയാത്ര ഞായറാഴ്ചകളിലും ചൊവ്വാഴ്ചകളിലുമാണ്.

യശ്വന്ത്പൂരില് നിന്ന് വൈകുന്നേരം 4.15നാണ് പുറപ്പെടുക. തൊട്ടടുത്ത ദിവസം രാവിലെ 5.15ന് വിജയപുരയില് എത്തിച്ചേരും. വൈകുന്നേരം അഞ്ച് മണിക്ക് വിജയപുരയില് നിന്ന് പുറപ്പെട്ട് തൊട്ടടുത്ത ദിവസം രാവിലെ 4.10ന് യശ്വന്ത്പൂരില് എത്തിച്ചേരും. ബെംഗളൂരുവില് നിന്ന് വടക്കന് കര്ണാടകയിലേക്കുള്ള യാത്രക്കാര്ക്ക് ഈ സര്വീസ് ഗുണം ചെയ്യും.

---------------

Hindusthan Samachar / CHANDHU CHANDRASEKHAR