Kochi, 31 മെയ് (H.S.)

കൊച്ചി: മലയാള ചലച്ചിത്ര താരങ്ങളുടെ സംഘടനയായ 'അമ്മ'യ്ക്കുള്ളിലെ (AMMA) ആഭ്യന്തര തർക്കങ്ങളും വിവാദങ്ങളും പുതിയ നിയമപോരാട്ടങ്ങളിലേക്ക് വഴിമാറുന്നു. നടി അൻസിബ ഹസൻ നൽകിയ പരാതിയുടെ അടിസ്ഥാനത്തിൽ, നടി ലക്ഷ്മിപ്രിയയോട് ചോദ്യം ചെയ്യലിനായി ഹാജരാകാൻ പോലീസ് നിർദേശിച്ചു. തിങ്കളാഴ്ച രാവിലെ 11.30-ന് തൃക്കാക്കര അസിസ്റ്റന്റ് കമ്മീഷണർ (ACP) ഓഫീസിൽ ഹാജരാകാനാണ് ലക്ഷ്മിപ്രിയയ്ക്ക് പോലീസ് നോട്ടീസ് നൽകിയിരിക്കുന്നത്.

നേരത്തെ, ലക്ഷ്മിപ്രിയയും തൃപ്പൂണിത്തുറ വനിതാ സെല്ലിലെ സബ് ഇൻസ്പെക്ടർ (SI) രേഷ്മയും ചേർന്ന് തനിക്കെതിരെ ഗൂഢാലോചന നടത്തുകയും സ്റ്റേഷനിൽ വെച്ച് അധിക്ഷേപിക്കുകയും ചെയ്തതായി കാണിച്ച് അൻസിബ മുഖ്യമന്ത്രി പിണറായി വിജയനും ഡിജിപിക്കും പരാതി നൽകിയിരുന്നു. ഈ പരാതിയിന്മേലുള്ള പ്രാഥമിക അന്വേഷണത്തിന്റെ ഭാഗമായാണ് നിലവിലെ പോലീസ് നടപടികൾ.

തൃക്കാക്കര എ.സി.പി ഓഫീസിൽ അൻസിബ മൊഴി നൽകി

തനിക്ക് നേരിടേണ്ടി വന്ന ദുരനുഭവത്തെക്കുറിച്ച് വിശദീകരിക്കാൻ നടി അൻസിബ ഹസൻ ഇന്ന് രാവിലെ തൃക്കാക്കര എ.സി.പി ഓഫീസിലെത്തി വിശദമായ മൊഴി രേഖപ്പെടുത്തി. മുഖ്യമന്ത്രിയുടെ ഓഫീസിൽ നിന്ന് ലഭിച്ച പരാതി തുടർന്നുള്ള അന്വേഷണങ്ങൾക്കായി കൊച്ചി സിറ്റി പോലീസിന് കൈമാറുകയായിരുന്നു. എ.സി.പി ഓഫീസിലെത്തി മൊഴി നൽകിയ ശേഷം മാധ്യമങ്ങളോട് സംസാരിച്ച അൻസിബ, പോലീസിന് മുന്നിൽ തനിക്കുണ്ടായ മാനസിക പീഡനങ്ങളെക്കുറിച്ച് കൃത്യമായി കാര്യങ്ങൾ വിശദീകരിച്ചിട്ടുണ്ടെന്ന് വ്യക്തമാക്കി. മറ്റുള്ള കക്ഷികളുടെ ഭാഗം കൂടി കേട്ട ശേഷം വിഷയത്തിൽ കൃത്യമായ നടപടിയുണ്ടാകുമെന്ന് എ.സി.പി ഉറപ്പുനൽകിയതായും അൻസിബ കൂട്ടിച്ചേർത്തു.

വിവാദങ്ങളുടെ തുടക്കവും അൻസിബയുടെ ആരോപണങ്ങളും

താരസംഘടനയായ 'അമ്മ'യുടെ ജോയിന്റ് സെക്രട്ടറിയായിരുന്ന അൻസിബ ഹസൻ, സംഘടനയ്ക്കുള്ളിൽ തനിക്കെതിരെ ചിലർ ബോധപൂർവ്വം പ്രചാരണം നടത്തുന്നുവെന്ന് ആരോപിച്ച് അടുത്തിടെ രാജി വെച്ചിരുന്നു. ഇതിന് പിന്നാലെയാണ് ലക്ഷ്മിപ്രിയ തനിക്കെതിരെ വ്യാജ പരാതി നൽകിയതെന്ന് അൻസിബ ആരോപിക്കുന്നത്.

അൻസിബയുടെ പരാതിയിലെ പ്രധാന വിവരങ്ങൾ:

-

നടി ലക്ഷ്മിപ്രിയ തനിക്കെതിരെ ഹിൽപ്പാലസ് വനിതാ സെല്ലിൽ തികച്ചും വ്യാജമായ ഒരു പരാതി നൽകി.

-

ഈ പരാതി പരിശോധിക്കാനെന്ന പേരിൽ വിളിച്ചുവരുത്തി തൃപ്പൂണിത്തുറ വനിതാ സെൽ എസ്.ഐ രേഷ്മ മൂന്ന് മണിക്കൂറിലധികം സ്റ്റേഷനിൽ അനധികൃതമായി തടഞ്ഞുവെച്ചു.

-

ഒരു വ്യക്തി എന്ന നിലയിൽ തനിക്ക് ലഭിക്കേണ്ട യാതൊരു മാനുഷിക പരിഗണനയും നൽകാതെ എസ്.ഐയും ലക്ഷ്മിപ്രിയയും ചേർന്ന് മാനസികമായി പീഡിപ്പിക്കുകയും വ്യക്തിഹത്യ നടത്തുകയും ചെയ്തു.

മതപരമായ കാര്യങ്ങൾ ലക്സിപ്രിയയുടെ പരാതിയിലേക്ക് വലിച്ചിഴച്ച് തന്നെ ഒരു 'ജിഹാദി'യായി ചിത്രീകരിക്കാൻ ബോധപൂർവ്വമായ ശ്രമം നടന്നതായും അൻസിബ മാധ്യമങ്ങൾക്ക് മുന്നിൽ ആരോപിച്ചു. വ്യക്തിവൈരാഗ്യം തീർക്കാൻ തന്റെ പേര് മാത്രം നോക്കി ലക്ഷ്യം വെക്കുകയായിരുന്നുവെന്നും താരം തുറന്നടിച്ചു.

ടിനി ടോമിനെതിരെയും രൂക്ഷവിമർശനം

മൊഴി നൽകാൻ എത്തിയ വേളയിൽ നടൻ ടിനി ടോമിനെതിരെയും അൻസിബ കടുത്ത വിമർശനങ്ങളാണ് ഉന്നയിച്ചത്. ടിനി ടോം ഒരു സാമൂഹിക വിപത്താണെന്നും തനിക്കെതിരെ വർഗീയ പരാമർശങ്ങൾ നടത്തിയതിൽ കുറ്റക്കാരനായ അദ്ദേഹത്തെ സംഘടനയിലെ ചിലർ സംരക്ഷിക്കുകയാണെന്നും അൻസിബ പറഞ്ഞു. കുറ്റാരോപിതർ തന്നെ നേതൃത്വത്തിലിരുന്ന് നീതി നടപ്പാക്കാൻ ശ്രമിക്കുന്ന വിചിത്രമായ കാഴ്ചയാണ് 'അമ്മ' സംഘടനയിൽ കാണുന്നതെന്നും, അതിനാൽ നിലവിലെ എക്സിക്യൂട്ടീവ് കമ്മിറ്റിയിൽ തനിക്ക് വിശ്വാസമില്ലെന്നും അൻസിബ വ്യക്തമാക്കി. രമേശ് പിഷാരടി, ധ്യാൻ ശ്രീനിവാസൻ, മാലാ പാർവതി എന്നിവരടങ്ങുന്ന ഒരു നിഷ്പക്ഷ സമിതി ഈ വിഷയങ്ങൾ അന്വേഷിക്കണമെന്നാണ് തന്റെ ആവശ്യമെന്നും താരം ആവശ്യപ്പെട്ടു.

അതേസമയം, വാട്സാപ്പ് സന്ദേശവുമായി ബന്ധപ്പെട്ട വ്യക്തിപരമായ ഒരു തർക്കമാണ് ഇതെന്നും അൻസിബയുടെ സന്ദേശം തന്റെ കുടുംബജീവിതത്തെ ബാധിച്ചപ്പോഴാണ് പോലീസിൽ പരാതി നൽകിയതെന്നുമാണ് ലക്ഷ്മിപ്രിയയുടെ മുൻപത്തെ വിശദീകരണം. തിങ്കളാഴ്ച ലക്ഷ്മിപ്രിയയും വനിതാ എസ്.ഐയും എ.സി.പിക്ക് മുന്നിൽ ഹാജരാകുന്നതോടെ ഈ കേസിൽ കൂടുതൽ വ്യക്തത വരുമെന്നാണ് പോലീസ് വൃത്തങ്ങൾ സൂചിപ്പിക്കുന്നത്.

---------------

Hindusthan Samachar / Roshith K