Kannur, 31 മെയ് (H.S.)

കണ്ണൂർ: എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശനുമായി നടത്തിയ കൂടിക്കാഴ്ചയെച്ചൊല്ലി സംസ്ഥാന വനിത-ശിശുക്ഷേമ വകുപ്പ് മന്ത്രി ബിന്ദു കൃഷ്ണക്കെതിരെ രാഷ്ട്രീയ വൃത്തങ്ങളിലും സമൂഹമാധ്യമങ്ങളിലും കടുത്ത വിമർശനവും അമർഷവും ഉയരുന്നു. വെള്ളാപ്പള്ളി നടേശന്റെ വസതിയിലെത്തി മന്ത്രി നടത്തിയ സന്ദർശനത്തിന്റെ ചിത്രങ്ങൾ പുറത്തുവന്നതിന് പിന്നാലെയാണ് മന്ത്രിക്കെതിരെ പ്രതിപക്ഷ സംഘടനകളും അണികളും രംഗത്തെത്തിയത്.

സമൂഹത്തിൽ നിരന്തരം വർഗീയവും വിഭജനപരവുമായ പരാമർശങ്ങൾ നടത്തുന്ന ഒരു നേതാവിനെ ഔദ്യോഗിക പദവിയിലിരിക്കുന്ന ഒരു മന്ത്രി സന്ദർശിച്ചത് രാഷ്ട്രീയ മാന്യതയ്ക്ക് നിരക്കാത്തതാണെന്ന് ചൂണ്ടിക്കാട്ടി യൂത്ത് കോൺഗ്രസ് ജനറൽ സെക്രട്ടറി വി. പി. ദുൽഖിഫിൽ കടുത്ത ഭാഷയിൽ പ്രതികരിച്ചു. സമൂഹത്തിൽ വിഭജനം ഉണ്ടാക്കാൻ ശ്രമിക്കുന്ന ഇത്തരം വ്യക്തികളെയും ശക്തികളെയും അകറ്റി നിർത്താൻ ഭരണാധികാരികൾക്ക് കഴിയണമെന്നും ദുൽഖിഫിൽ കൂട്ടിച്ചേർത്തു.

വിവാദത്തിന് തിരിതെളിച്ച ഫേസ്ബുക്ക് ചിത്രം

വെള്ളാപ്പള്ളി നടേശന്റെ ഔദ്യോഗിക ഫേസ്ബുക്ക് പേജിലൂടെ പുറത്തുവിട്ട ചിത്രങ്ങളാണ് പുതിയ രാഷ്ട്രീയ വിവാദങ്ങൾക്ക് വഴിമരുന്നിട്ടത്. വെള്ളാപ്പള്ളിയുടെ മുന്നിൽ മന്ത്രി ബിന്ദു കൃഷ്ണ കൈകൂപ്പി നിൽക്കുന്നതും അദ്ദേഹം തലയിൽ കൈവെച്ച് അനുഗ്രഹിക്കുന്നതുമായ ചിത്രങ്ങൾ പുറത്തുവന്നതോടെ യു.ഡി.എഫ് ക്യാമ്പുകളിൽ നിന്നും വൻ പ്രതിഷേധമാണ് ഉയരുന്നത്.

സംസ്ഥാന വനിതാ-ശിശുക്ഷേമ, തൊഴിൽ വകുപ്പ് മന്ത്രി ബിന്ദു കൃഷ്ണ വെള്ളാപ്പള്ളിയുടെ കണിച്ചുകുളങ്ങരയിലെ വസതിയിലെത്തി ദീർഘനേരം സൗഹൃദപരമായി ആശയവിനിമയം നടത്തിയെന്നും സാമൂഹിക, സാംസ്കാരിക, വികസന വിഷയങ്ങൾ കൂടിക്കാഴ്ചയിൽ ചർച്ചയായെന്നുമാണ് സന്ദർശനത്തെ അനുകൂലിക്കുന്നവർ വ്യക്തമാക്കുന്നത്. എന്നാൽ, ഈ വിശദീകരണം രാഷ്ട്രീയ അണികൾക്കിടയിലെ പ്രതിഷേധം തണുപ്പിക്കാൻ പര്യാപ്തമായിട്ടില്ല.

വോട്ട് ചെയ്ത ജനങ്ങളെ നാണംകെടുത്തുന്ന നടപടി

മന്ത്രി ബിന്ദു കൃഷ്ണയുടെ നടപടിക്കെതിരെ സമൂഹമാധ്യമങ്ങളിലും കടുത്ത വിമർശനമാണ് ഉയരുന്നത്. വിദ്വേഷ പരാമർശങ്ങൾ നടത്തിയ വെള്ളാപ്പള്ളി നടേശനെപ്പോലുള്ളവരെ കൂടെനിർത്തിയതിനെതിരെ കൂടിയാണ് നിയമസഭാ തെരഞ്ഞെടുപ്പിൽ ജനങ്ങൾ വിധി എഴുതിയതെന്നും മന്ത്രി അത് മറക്കരുതെന്നും വിമർശകർ ഓർമ്മിപ്പിക്കുന്നു.

ജനപ്രതിനിധികളുടെ കടമ സമുദായ നേതാക്കളുടെ വസതികൾ തോറും കയറി അനുഗ്രഹം വാങ്ങലല്ല, മറിച്ച് തങ്ങളെ വിശ്വസിച്ച് വോട്ട് ചെയ്ത ജനങ്ങളുടെ അവകാശങ്ങൾ സംരക്ഷിക്കലാണ്. ഇത്തരം നിലപാടുകൾ മന്ത്രിസഭയുടെ ശോഭ കെടുത്തുന്നതാണ്. വോട്ട് ചെയ്ത ജനങ്ങളെയും പാർട്ടിയുടെ രാഷ്ട്രീയ നിലപാടുകളെയും പരിഹസിക്കുന്നതിന് തുല്യമാണ് ഈ സന്ദർശനം. - സോഷ്യൽ മീഡിയയിലെ പൊതുവികാരം.

ചില കോൺഗ്രസ് പ്രവർത്തകർ ഫേസ്ബുക്കിലും മറ്റ് പ്ലാറ്റ്ഫോമുകളിലും മന്ത്രിയുടെ നടപടിയെ കടുത്ത ഭാഷയിൽ വിമർശിച്ച് രംഗത്തെത്തിയിട്ടുണ്ട്. പക്വതയില്ലാത്ത ഇത്തരം സന്ദർശനങ്ങൾ സർക്കാരിന്റെ മുഖച്ഛായയ്ക്ക് കോട്ടമുണ്ടാക്കുമെന്നും, വർഗീയത പറയുന്നവരുടെ മുന്നിൽ കൈകൂപ്പി നിൽക്കുന്നതിനേക്കാൾ ഭേദം പദവികൾ ഒഴിയുന്നതാണെന്നും കടുത്ത പ്രതികരണങ്ങൾ ഉയരുന്നുണ്ട്.

രാഷ്ട്രീയ വൃത്തങ്ങളിൽ പുകയുന്ന അസംതൃപ്തി

മന്ത്രി ബിന്ദു കൃഷ്ണ വെള്ളാപ്പള്ളി നടേശനെ സന്ദർശിച്ച സംഭവം വരും ദിവസങ്ങളിൽ യു.ഡി.എഫ് നേതൃത്വത്തിനുള്ളിൽ വലിയ രാഷ്ട്രീയ ചർച്ചകൾക്കും അസ്വാരസ്യങ്ങൾക്കും വഴിവെക്കുമെന്നാണ് സൂചന. കോൺഗ്രസ് നേതൃത്വത്തെയും പ്രത്യേകിച്ച് മറ്റ് ഘടകകക്ഷികളെയും ഈ സന്ദർശനം വലിയ പ്രതിരോധത്തിലാക്കിയിട്ടുണ്ട്. വരും ദിവസങ്ങളിൽ കെ.പി.സി.സി നേതൃത്വവും മുന്നണി നേതൃത്വവും ഈ വിഷയത്തിൽ ഔദ്യോഗിക പ്രതികരണങ്ങൾ നടത്താൻ നിർബന്ധിതരായേക്കും.

വർഗീയ നിലപാടുകളോട് യാതൊരു തരത്തിലും വിട്ടുവീഴ്ചയില്ലെന്ന് പ്രഖ്യാപിക്കുന്ന ഒരു മുന്നണിയുടെ മന്ത്രി തന്നെ ഇത്തരമൊരു നിലപാട് സ്വീകരിച്ചത് അണികളിൽ വലിയ ആശയക്കുഴപ്പത്തിനും നിരാശയ്ക്കും കാരണമായിട്ടുണ്ട്. വിഭജന രാഷ്ട്രീയത്തെ ശക്തമായി ചെറുക്കേണ്ടവർ തന്നെ അതിന് കുടപിടിക്കുന്നു എന്ന ആക്ഷേപമാണ് ഇപ്പോൾ ശക്തമായിരിക്കുന്നത്

---------------

Hindusthan Samachar / Roshith K