Changanassery, 06 മെയ് (H.S.)

ചങ്ങനാശ്ശേരി: കേരള നിയമസഭാ തിരഞ്ഞെടുപ്പിൽ യുഡിഎഫ് നേടിയ വൻ വിജയത്തിന് പിന്നാലെ മുഖ്യമന്ത്രി പദത്തെച്ചൊല്ലിയുള്ള ചർച്ചകളിൽ നിർണ്ണായക ഇടപെടലുമായി എൻഎസ്എസ് ജനറൽ സെക്രട്ടറി ജി. സുകുമാരൻ നായർ. രമേശ് ചെന്നിത്തല മുഖ്യമന്ത്രിയാകാൻ തികച്ചും യോഗ്യനാണെന്നും, വി.ഡി. സതീശൻ മാപ്പ് പറയേണ്ട സമയമൊക്കെ കഴിഞ്ഞുവെന്നും അദ്ദേഹം തുറന്നടിച്ചു. തിരഞ്ഞെടുപ്പ് ഫലം പുറത്തുവന്നതിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം.

രമേശ് ചെന്നിത്തലയ്ക്ക് പിന്തുണ

മുഖ്യമന്ത്രി സ്ഥാനത്തേക്ക് കോൺഗ്രസിലെ മുതിർന്ന നേതാക്കൾ വരുന്നതാണ് നല്ലതെന്ന് സുകുമാരൻ നായർ അഭിപ്രായപ്പെട്ടു. മുഖ്യമന്ത്രിയാകാൻ രമേശ് ചെന്നിത്തല യോഗ്യനാണ്. എന്നാൽ ഇക്കാര്യത്തിൽ അന്തിമ തീരുമാനമെടുക്കേണ്ടത് കോൺഗ്രസ് നേതൃത്വമാണ്. അനുഭവസമ്പത്തുള്ളവർ ഭരണനേതൃത്വത്തിലേക്ക് വരണമെന്നാണ് എൻഎസ്എസ് ആഗ്രഹിക്കുന്നത്, അദ്ദേഹം പറഞ്ഞു. പണ്ട് വിവാദമായ 'താക്കോൽ സ്ഥാന' പ്രസ്താവന പ്രത്യേക സാഹചര്യത്തിൽ നടത്തിയതാണെന്നും, സമുദായപരമായ ആവശ്യങ്ങൾ ചിലർ ഉന്നയിച്ചപ്പോൾ അതിനെ പ്രതിരോധിക്കാനാണ് അന്ന് അങ്ങനെ പറയേണ്ടി വന്നതെന്നും അദ്ദേഹം വിശദീകരിച്ചു.

വി.ഡി. സതീശനെതിരെ വിമർശനം

വി.ഡി. സതീശനുമായി എൻഎസ്എസ് പുലർത്തുന്ന അകൽച്ച മാറ്റമില്ലാതെ തുടരുമെന്ന സൂചനയാണ് സുകുമാരൻ നായരുടെ വാക്കുകൾ നൽകുന്നത്. സതീശൻ മാപ്പ് പറയേണ്ട കാലം കഴിഞ്ഞുവെന്നും അദ്ദേഹത്തെ മുഖ്യമന്ത്രിയാക്കണോ വേണ്ടയോ എന്നത് കോൺഗ്രസിന്റെ മാത്രം തീരുമാനമാണെന്നും അദ്ദേഹം പറഞ്ഞു. സമുദായ സംഘടനകളെ തള്ളിപ്പറഞ്ഞ സതീശന്റെ മുൻകാല നിലപാടുകളോടുള്ള അതൃപ്തി അദ്ദേഹം വീണ്ടും പ്രകടമാക്കി.

ജനം മാറ്റം ആഗ്രഹിച്ചു

യുഡിഎഫിന്റേത് ജനാധിപത്യത്തിന്റെ വിജയമാണെന്ന് അദ്ദേഹം വിലയിരുത്തി. പിണറായി സർക്കാരിന്റെ ഭരണത്തിൽ ജനങ്ങൾ പൊറുതിമുട്ടിയിരുന്നുവെന്നും ആ മാറ്റത്തിനായാണ് കേരളം വോട്ട് ചെയ്തതെന്നും അദ്ദേഹം കൂട്ടിച്ചേർത്തു.

-

സമദൂര നിലപാട്: എൻഎസ്എസ് ഇപ്പോഴും സമദൂര നിലപാടിൽ തന്നെയാണ് ഉറച്ചുനിൽക്കുന്നത്.

-

ബിജെപിയുടെ മുന്നേറ്റം: കൂടുതൽ സീറ്റുകളിൽ ബിജെപി വിജയിച്ചത് അവരുടെ നേട്ടമായി കാണുന്നു.

-

ഗണേഷ് കുമാറിന്റെ തോൽവി: എൻഎസ്എസുമായുള്ള പ്രശ്നങ്ങൾ കെ.ബി. ഗണേഷ് കുമാറിന് തിരിച്ചടിയായെന്നും അദ്ദേഹം നിരീക്ഷിച്ചു.

മുഖ്യമന്ത്രി ചർച്ചകൾ നീളരുത്

ഭരണമാറ്റം ആഗ്രഹിച്ച ജനവിധി മാനിക്കപ്പെടണമെങ്കിൽ മുഖ്യമന്ത്രിയെ നിശ്ചയിക്കുന്ന കാര്യത്തിൽ കോൺഗ്രസ് അനാവശ്യ കാലതാമസം വരുത്തരുത്. ചർച്ചകൾ നീണ്ടുപോകുന്നത് പാർട്ടിക്കും മുന്നണിക്കും നല്ലതല്ലെന്ന് അദ്ദേഹം ഓർമ്മിപ്പിച്ചു. വെള്ളാപ്പള്ളി നടേശനെ എൽഡിഎഫ് കരുതി നിൽക്കണമായിരുന്നുവെന്നും സമുദായ സംഘടനകളെ അവഗണിക്കുന്നത് തിരിച്ചടിയാകുമെന്നും അദ്ദേഹം പറഞ്ഞു. അടുത്ത സർക്കാരിൽ നിന്ന് എൻഎസ്എസിന് അർഹമായ പരിഗണന ലഭിക്കുമെന്നാണ് പ്രതീക്ഷിക്കുന്നതെന്നും സുകുമാരൻ നായർ വ്യക്തമാക്കി.

---------------

Hindusthan Samachar / Roshith K