Thiruvananthapuram, 08 മെയ് (H.S.)

ഭരണമാറ്റത്തിന് പിന്നാലെ കേരളത്തിന്റെ സാംസ്കാരിക മേഖലയിൽ നിർണ്ണായകമായ ചുവടുമാറ്റങ്ങൾ. പ്രമുഖ കവിയും ചിന്തകനുമായ കെ. സച്ചിദാനന്ദൻ കേരള സാഹിത്യ അക്കാദമി അധ്യക്ഷ സ്ഥാനം രാജിവെച്ചു. അദ്ദേഹത്തോടൊപ്പം അക്കാദമി വൈസ് പ്രസിഡന്റ് അശോകൻ ചരുവിലും സ്ഥാനമൊഴിഞ്ഞിട്ടുണ്ട്. സാംസ്കാരിക വകുപ്പ് സെക്രട്ടറിക്ക് ഇമെയിൽ വഴിയാണ് ഇരുവരും രാജി സമർപ്പിച്ചത്.

ഭരണമാറ്റം സ്വാഭാവികം; രാഷ്ട്രീയ നിലപാടിൽ മാറ്റമില്ല

സംസ്ഥാനത്ത് നടന്ന നിയമസഭാ തിരഞ്ഞെടുപ്പിൽ ഭരണമാറ്റം ഉണ്ടായ പശ്ചാത്തലത്തിലാണ് രാജി. ഒരു സർക്കാർ മാറുമ്പോൾ ഇത്തരം സ്ഥാനങ്ങളിൽ ഇരിക്കുന്നവർ ഒഴിയുന്നത് സ്വാഭാവികമായ മര്യാദയാണെന്ന് സച്ചിദാനന്ദൻ മാധ്യമങ്ങളോട് പ്രതികരിച്ചു. മെയ് 31 വരെ കാലാവധി ബാക്കിയുണ്ടായിരുന്നെങ്കിലും, പുതിയ സർക്കാർ ചുമതലയേൽക്കുന്ന സാഹചര്യത്തിൽ താൻ സ്ഥാനമൊഴിയാൻ തീരുമാനിക്കുകയായിരുന്നുവെന്ന് അദ്ദേഹം വ്യക്തമാക്കി.

ഭരണത്തുടർച്ചയെ സംബന്ധിച്ച തന്റെ മുൻനിലപാടുകളിൽ സച്ചിദാനന്ദൻ ഉറച്ചുനിന്നു.

തുടർഭരണത്തെക്കുറിച്ച് എനിക്കിനി ഒന്നും പറയാനില്ല. ജനാധിപത്യത്തിൽ ഭരണമാറ്റം അനിവാര്യമാണ്. ഇപ്പോൾ പത്തു വർഷം കഴിഞ്ഞപ്പോൾ എൽ.ഡി.എഫ് പോകേണ്ടി വന്നതുപോലെ, പത്തു വർഷം കഴിഞ്ഞാൽ കോൺഗ്രസും ഇതുപോലെ പോകേണ്ടി വരും.

സച്ചിദാനന്ദൻ പറഞ്ഞു.

വിവാദമായ ഫേസ്ബുക്ക് പോസ്റ്റും രാഷ്ട്രീയ വിമർശനവും

തിരഞ്ഞെടുപ്പ് ഫലം വന്നതിന് പിന്നാലെ ഇടതുപക്ഷത്തിന്റെ പരാജയത്തെക്കുറിച്ച് സച്ചിദാനന്ദൻ നടത്തിയ നിരീക്ഷണങ്ങൾ വലിയ ചർച്ചയായിരുന്നു. ഇത്തവണത്തെ തിരഞ്ഞെടുപ്പിൽ കേരളം കണ്ടത് രണ്ട് വലതുപക്ഷ ശക്തികൾ തമ്മിലുള്ള മത്സരമാണെന്ന് യഥാർത്ഥ ഇടതുപക്ഷക്കാർ തിരിച്ചറിഞ്ഞുവെന്ന് അദ്ദേഹം അഭിപ്രായപ്പെട്ടിരുന്നു. ഇടതുപക്ഷം അതിന്റെ അടിസ്ഥാന വർഗ താൽപ്പര്യങ്ങളിൽ നിന്നും ആശയങ്ങളിൽ നിന്നും വ്യതിചലിച്ചതാണ് പരാജയത്തിന് കാരണമെന്നും അദ്ദേഹം ചൂണ്ടിക്കാട്ടി.

പാർട്ടികൾ തങ്ങളുടെ പ്രവർത്തനശൈലിയിലും വർഗപരമായ നിലപാടുകളിലും വലിയ തോതിലുള്ള അഴിച്ചുപണി നടത്തിയാൽ മാത്രമേ രാഷ്ട്രീയമായ ഒരു തിരിച്ചുവരവ് സാധ്യമാകൂ എന്നും അദ്ദേഹം മുന്നറിയിപ്പ് നൽകി. തുടർച്ചയായ ഭരണം ലഭിക്കുമ്പോൾ പാർട്ടിയിലേക്ക് അനഭിലഷണീയമായ ഘടകങ്ങൾ കടന്നുകൂടുമെന്നും അത് പ്രസ്ഥാനത്തെ ദോഷകരമായി ബാധിക്കുമെന്നും സച്ചിദാനന്ദൻ നേരത്തെയും തുറന്നു പറഞ്ഞിരുന്നു.

അക്കാദമിയിലെ പടിയിറക്കം

2022 മാർച്ചിലാണ് സച്ചിദാനന്ദൻ സാഹിത്യ അക്കാദമി അധ്യക്ഷനായി ചുമതലയേറ്റത്. മൂന്ന് വർഷത്തെ കാലാവധി പൂർത്തിയാക്കിയ ശേഷം സർക്കാർ ഇവർക്ക് ഒരു വർഷം കൂടി നീട്ടി നൽകുകയായിരുന്നു. അദ്ദേഹത്തോടൊപ്പം വൈസ് പ്രസിഡന്റ് അശോകൻ ചരുവിലും ഒഴിഞ്ഞതോടെ അക്കാദമിയുടെ നേതൃത്വത്തിൽ വലിയ മാറ്റത്തിനാണ് വഴിതുറന്നിരിക്കുന്നത്. സാഹിത്യ അക്കാദമിക്ക് പുറമെ സംഗീത നാടക അക്കാദമി, ലളിതകലാ അക്കാദമി തുടങ്ങിയ സാംസ്കാരിക സ്ഥാപനങ്ങളിലെ ഭാരവാഹികളും ഭരണമാറ്റത്തിന്റെ പശ്ചാത്തലത്തിൽ വരും ദിവസങ്ങളിൽ സ്ഥാനമൊഴിയുമെന്നാണ് സൂചന.

സാംസ്കാരിക സ്ഥാപനങ്ങളിൽ നിലനിൽക്കുന്ന സാമ്പത്തിക പ്രതിസന്ധിയും, ഗ്രാന്റുകൾ കൃത്യമായി ലഭിക്കാത്തതും പ്രവർത്തനങ്ങളെ ബാധിച്ചിരുന്നതായി നേരത്തെ ആക്ഷേപങ്ങൾ ഉയർന്നിരുന്നു. ഈ സാഹചര്യത്തിലാണ് സാംസ്കാരിക നായകരുടെ കൂട്ടായ പടിയിറക്കം എന്നത് ശ്രദ്ധേയമാണ്.

---------------

Hindusthan Samachar / Roshith K