Enter your Email Address to subscribe to our newsletters
Kasargode, 01 ജൂണ് (H.S.)
എസ്എഫ്ഐ മുന് സംസ്ഥാന സെക്രട്ടറിയും സിപിഎം നേതാവുമായ പി.എം. ആര്ഷോയും മുന് എസ്എഫ്ഐ നേതാവ് കെ. വിദ്യയും വിവാഹിതരായി. തൃക്കരിപ്പൂര് റജിസ്ട്രാര് ഓഫിസിലായിരുന്നു വിവാഹം. വിദ്യ കാസര്കോട് തൃക്കരിപ്പൂര് സ്വദേശിയാണ്. പാലക്കാട് കാഞ്ഞിരപ്പുഴ സ്വദേശിയായ ആര്ഷോ സിപിഎം ജില്ലാ കമ്മിറ്റി അംഗമാണ്. ഇരുവരും ഏറെ നാളായി പ്രണയത്തിലായിരുന്നു.
അടുത്ത സുഹൃത്തുക്കളും ബന്ധുക്കളും മാത്രമാണ് ലളിതമായ ചടങ്ങില് പങ്കെടുത്തത്. എസ്എഫ്ഐ മുന് അഖിലേന്ത്യാ പ്രസിഡന്റ് വി.പി. സാനു, എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്, എസ്എഫ്ഐ സംസ്ഥാന പ്രസിഡന്റ് എം. ശിവപ്രസാദ്, എസ്എഫ്ഐ മുന് സംസ്ഥാന പ്രസിഡന്റും കണ്ണൂര് ജില്ലാ പഞ്ചായത്ത് മെംബറുമായ കെ. അനുശ്രീ തുടങ്ങിയവര് പങ്കെടുത്തു. പയ്യന്നൂരിലെ ഹോട്ടലിലാണ് ഭക്ഷണം ക്രമീകരിച്ചിരിക്കുന്നത്. തുടര്ന്ന് ആര്ഷോയും വിദ്യയും പാലക്കാട്ടേക്ക് പോകും.
എറണാകുളം മഹാരാജാസ് കോളജിന്റെ പേരില് വ്യാജ സര്ട്ടിഫിക്കറ്റ് ചമച്ച കേസില് പൂര്വവിദ്യാര്ഥിനിയായ കെ. വിദ്യയ്ക്കെതിരെ 2023ല് പൊലീസ് കേസെടുത്തിരുന്നു. പാലക്കാട് അട്ടപ്പാടി രാജീവ് ഗാന്ധി മെമ്മോറിയല് ആര്ട്സ് കോളജിലെ മലയാളം ഗെസ്റ്റ് ലക്ചറര് തസ്തികയില് നിയമനം ലഭിക്കാന് എറണാകുളം മഹാരാജാസ് കോളജിന്റെ പേരിലുള്ള വ്യാജ സര്ട്ടിഫിക്കറ്റ് ഹാജരാക്കിയെന്നാണു കേസ്. കരിന്തളം ഗവ. കോളജ് അധികൃതര് നല്കിയ പരാതിയിലും വിദ്യക്കെതിരെ കേസെടുത്തിരുന്നു. വിദ്യയെ സിപിഎം സംരക്ഷിക്കുന്നുവെന്ന് യുഡിഎഫ് ആരോപണം ഉന്നയിച്ചതോടെ കേസ് വലിയ വിവാദത്തിലായിരുന്നു.
---------------
Hindusthan Samachar / Sreejith S
