Thiruvananthapuram, 01 ജൂണ് (H.S.)

തിരുവനന്തപുരം: വേനലവധിക്ക് ശേഷം സംസ്ഥാനത്തെ വിദ്യാലയങ്ങൾ തുറന്നു. പുത്തൻ വസ്ത്രങ്ങളും ബാഗുകളുമായി അറിവിന്റെ ലോകത്തേക്ക് ചുവടുവെച്ച കുരുന്നുകളെ വരവേറ്റ് നാടെങ്ങും പ്രവേശനോത്സവങ്ങൾ സംഘടിപ്പിച്ചു. തിരുവനന്തപുരം പട്ടം ഗവ. മോഡൽ ഗേൾസ് ഹയർ സെക്കൻഡറി സ്കൂളിൽ നടന്ന സംസ്ഥാനതല പ്രവേശനോത്സവത്തിന്റെ ഔദ്യോഗിക ഉദ്ഘാടനം മുഖ്യമന്ത്രി വി. ഡി. സതീശൻ നിർവഹിച്ചു. പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ദീന്റെ അധ്യക്ഷതയിലായിരുന്നു ചടങ്ങുകൾ സംഘടിപ്പിച്ചത്.

കേരളത്തിലെ വിദ്യാഭ്യാസ രംഗത്തെ അടിസ്ഥാന സൗകര്യങ്ങളും അക്കാദമിക് നിലവാരവും മെച്ചപ്പെടുത്തിക്കൊണ്ട് സംസ്ഥാനത്തെ ഒരു ആഗോള വിദ്യാഭ്യാസ ഹബ്ബാക്കി മാറ്റുകയാണ് സർക്കാരിന്റെ ലക്ഷ്യമെന്ന് മുഖ്യമന്ത്രി ഉദ്ഘാടന പ്രസംഗത്തിൽ വ്യക്തമാക്കി. ഉന്നത പഠനത്തിനായി വിദേശങ്ങളിലേക്ക് പോകുന്ന അവസ്ഥ മാറി, വിദേശങ്ങളിൽ നിന്നുള്ള വിദ്യാർത്ഥികൾ പഠനത്തിനായി കേരളത്തിലേക്ക് എത്തുന്ന കാലം വിദൂരമല്ലെന്നും അദ്ദേഹം കൂട്ടിച്ചേർത്തു.

'വിദ്യാഭ്യാസ പുരോഗതിക്ക് പിന്നിൽ അമ്മമാരുടെ പങ്ക് വലുത്'

കേരളം കൈവരിച്ച വിദ്യാഭ്യാസ പുരോഗതിയിൽ സമൂഹത്തിലെ അമ്മമാർ വഹിച്ച പങ്ക് വളരെ വലുതാണെന്ന് മുഖ്യമന്ത്രി വി. ഡി. സതീശൻ ഓർമ്മിപ്പിച്ചു. കുട്ടികളുടെ പഠന കാര്യങ്ങളിൽ കൂടുതൽ ശ്രദ്ധ ചെലുത്തുന്നതും അവരുടെ കഴിവുകളെ പ്രോത്സാഹിപ്പിക്കുന്നതും അമ്മമാരാണ്. ഈ ശ്രദ്ധയും കരുതലും കുട്ടികളുടെ വളർച്ചയിൽ നിർണ്ണായക സ്വാധീനം ചെലുത്തുന്നുണ്ടെന്നും അദ്ദേഹം പറഞ്ഞു.

കുട്ടികളുടെ സമഗ്രമായ പുരോഗതിക്കായി അധ്യാപകരും മാതാപിതാക്കളും തമ്മിൽ ശക്തമായ ഒരു സൗഹൃദ ബന്ധം ആവശ്യമാണെന്ന് മുഖ്യമന്ത്രി ചൂണ്ടിക്കാട്ടി. കുട്ടികളുടെ പഠന നിലവാരവും അവരുടെ സഹജമായ കഴിവുകളും അധ്യാപകരും രക്ഷിതാക്കളും പരസ്പരം പങ്കുവെക്കണം. വിദ്യാലയങ്ങളിൽ നിന്നും വീടുകളിൽ നിന്നും ലഭിക്കുന്ന പിന്തുണ ഒരുപോലെ ചേരുമ്പോൾ മാത്രമേ കുട്ടികൾക്ക് അവരുടെ പൂർണ്ണമായ കഴിവ് പുറത്തെടുക്കാൻ സാധിക്കുകയുള്ളൂ എന്നും അദ്ദേഹം ഓർമ്മിപ്പിച്ചു.

ലഹരിക്കെതിരെ ജാഗ്രത വേണം; പുത്തൻ സാങ്കേതികവിദ്യ പ്രയോജനപ്പെടുത്തണം

നിർമ്മിതി ബുദ്ധിയുടെയും (Artificial Intelligence) അറിവുകളുടെയും പുതിയ കാലഘട്ടത്തിൽ അതിവേഗം മാറുന്ന വിജ്ഞാന ലോകത്തെ ശരിയായി ഉപയോഗിക്കാൻ വിദ്യാർത്ഥികൾക്ക് കഴിയണമെന്ന് മുഖ്യമന്ത്രി ആവശ്യപ്പെട്ടു. പുസ്തക വായനയിലൂടെയും അധ്യാപകരിലൂടെയും പുതിയ അറിവുകൾ നേടാൻ കുട്ടികൾ എപ്പോഴും ശ്രമിക്കണം. അതോടൊപ്പം തന്നെ, സമൂഹത്തെ ഗ്രസിച്ചിരിക്കുന്ന ലഹരി എന്ന വലിയ വിപത്തിനെതിരെ വിട്ടുവീഴ്ചയില്ലാത്ത ജാഗ്രത പുലർത്തണമെന്നും ലഹരി പദാർത്ഥങ്ങളോട് ശക്തമായി 'നോ' പറയാൻ കുട്ടികൾക്ക് കഴിയണമെന്നും അദ്ദേഹം ആഹ്വാനം ചെയ്തു.

ചടങ്ങിൽ വെച്ച് മുഖ്യമന്ത്രി 2026-27 അധ്യക്ഷ വർഷത്തെ ഔദ്യോഗിക അക്കാദമിക് കലണ്ടർ പ്രകാശനം ചെയ്തു. തുടർന്ന് സ്കൂളിൽ പുതുതായി എത്തിയ ഒന്നാം ക്ലാസിലെ കുരുന്നുകൾക്ക് പുതിയ ബാഗുകളും പഠനോപകരണങ്ങളും വിതരണം ചെയ്തുകൊണ്ട് അദ്ദേഹം കുട്ടികളെ വിദ്യാലയത്തിലേക്ക് സ്വാഗതം ചെയ്തു.

സംസ്ഥാനത്തുടനീളം വിപുലമായ ആഘോഷങ്ങൾ

സംസ്ഥാനത്തെ എല്ലാ പൊതുവിദ്യാലയങ്ങളിലും അതത് ജില്ലാ-ബ്ലോക്ക് തലങ്ങളിലും വിപുലമായ രീതിയിലാണ് പ്രവേശനോത്സവങ്ങൾ സംഘടിപ്പിച്ചത്. പൊതുവിദ്യാഭ്യാസ വകുപ്പിന്റെ കണക്കുകൾ പ്രകാരം മൂന്ന് ലക്ഷത്തിലധികം കുട്ടികളാണ് ഇത്തവണ പുതുതായി ഒന്നാം ക്ലാസിലേക്ക് പ്രവേശനം നേടിയത്. ഒന്ന് മുതൽ പത്ത് വരെയുള്ള ക്ലാസുകളിലായി 31 ലക്ഷത്തിലധികം വിദ്യാർത്ഥികളാണ് പുത്തൻ അധ്യയന വർഷത്തിൽ വിദ്യാലയങ്ങളിലേക്ക് എത്തിയത്.

എല്ലാ സ്കൂളുകളിലും സൈബർ സുരക്ഷ ഉറപ്പാക്കുന്നതിനായി സൈബർ പോലീസിന്റെ 'കിഡ് ഗ്ലൗ' പ്രൊജക്റ്റിന്റെ ഭാഗമായുള്ള സുരക്ഷാ പ്രതിജ്ഞ കുട്ടികൾക്ക് ചൊല്ലിക്കൊടുത്തു. ഹരിത ചട്ടം (Green Protocol) പൂർണ്ണമായി പാലിച്ചുകൊണ്ടായിരുന്നു വിദ്യാലയങ്ങളിലെ പ്രവേശനോത്സവ ആഘോഷങ്ങൾ സംഘടിപ്പിച്ചത്.

തിരുവനന്തപുരത്ത് നടന്ന ചടങ്ങിൽ മന്ത്രിമാരായ കെ. മുരളീധരൻ, സി. പി. ജോൺ, തിരുവനന്തപുരം മേയർ വി. വി. രാജേഷ്, ജനപ്രതിനിധികൾ, വിദ്യാഭ്യാസ വകുപ്പിലെ ഉന്നത ഉദ്യോഗസ്ഥർ, സാംസ്കാരിക പ്രവർത്തകർ തുടങ്ങിയവർ പങ്കെടുത്തു. വരും ദിവസങ്ങളിൽ വിദ്യാലയങ്ങളിൽ പാഠപുസ്തകങ്ങളുടെയും യൂണിഫോമുകളുടെയും വിതരണം പൂർത്തിയാക്കുമെന്ന് വിദ്യാഭ്യാസ മന്ത്രി എൻ. ഷംസുദ്ദീൻ ചടങ്ങിൽ അറിയിച്ചു.

---------------

Hindusthan Samachar / Roshith K