Patna , 11 ജൂണ് (H.S.)

പറ്റ്ന: ബിഹാറിലെ നിയമനിർമ്മാണ കൗൺസിൽ (MLC) തിരഞ്ഞെടുപ്പിൽ ഭരണകക്ഷിയായ എൻ.ഡി.എ (NDA) സഖ്യത്തിന് വൻ മുന്നേറ്റം. ആകെയുള്ള പത്ത് സീറ്റുകളിലേക്കും സ്ഥാനാർത്ഥികൾ എതിരില്ലാതെ തിരഞ്ഞെടുക്കപ്പെട്ടു. മുൻ മുഖ്യമന്ത്രി നിതീഷ് കുമാറിന്റെ മകൻ നിഷാന്ത് കുമാർ, പ്രമുഖ ഭോജ്പുരി നടനും ഗായകനുമായ പവൻ സിംഗ് എന്നിവരുൾപ്പെടെയുള്ള പ്രമുഖരാണ് ഇത്തവണ കൗൺസിലിലേക്ക് എതിരില്ലാതെ തെരഞ്ഞെടുക്കപ്പെട്ടത്. നാമനിർദ്ദേശ പത്രിക പിൻവലിക്കാനുള്ള സമയപരിധി അവസാനിച്ചതോടെയാണ് മുഴുവൻ സ്ഥാനാർത്ഥികളും എതിരില്ലാതെ തെരഞ്ഞെടുക്കപ്പെട്ടതായി ഔദ്യോഗിക പ്രഖ്യാപനമുണ്ടായത്.

പത്തിൽ ഒൻപത് സീറ്റുകളും സ്വന്തമാക്കിക്കൊണ്ട് എൻ.ഡി.എ സഖ്യം തിരഞ്ഞെടുപ്പിൽ പൂർണ്ണ ആധിപത്യം സ്ഥാപിച്ചു. പ്രതിപക്ഷമായ രാഷ്ട്രീയ ജനതാദളിന് (RJD) ഒരു സീറ്റ് മാത്രമാണ് ലഭിച്ചത്. എൻ.ഡി.എ സഖ്യത്തിൽ ബി.ജെ.പിക്കും ജനതാദൾ യുണൈറ്റഡിനും (JDU) നാല് സീറ്റുകൾ വീതം ലഭിച്ചപ്പോൾ, എൽ.ജെ.പി (രാംവിലാസ്) ഒരു സീറ്റിൽ വിജയിച്ചു. ജൂൺ 28-ഓടെ നിലവിലുള്ള ഒൻപത് അംഗങ്ങളുടെ കാലാവധി അവസാനിക്കുന്ന സാഹചര്യത്തിലും, മുൻ മുഖ്യമന്ത്രി നിതീഷ് കുമാർ രാജ്യസഭയിലേക്ക് തിരഞ്ഞെടുക്കപ്പെട്ടതിനെ തുടർന്ന് ഒഴിഞ്ഞുകിടന്ന ഒരു സീറ്റിലേക്കുമാണ് തിരഞ്ഞെടുപ്പ് നടന്നത്.

വിജയികളുടെ പട്ടിക താഴെ പറയുന്ന പ്രകാരമാണ്:

ജനതാദൾ യുണൈറ്റഡിൽ (JDU) നിന്ന് നിതീഷ് കുമാറിന്റെ മകൻ നിഷാന്ത് കുമാർ, ഭാരതി മേത്ത, ശിവാനി ദേവി പ്രജാപതി എന്നിവർ തിരഞ്ഞെടുക്കപ്പെട്ടു. നിതീഷ് കുമാർ രാജിവെച്ചതിനെ തുടർന്നുണ്ടായ ഉപതിരഞ്ഞെടുപ്പ് സീറ്റിൽ നിന്ന് ജെ.ഡി.യുവിന്റെ ലലൻ പ്രസാദും വിജയിച്ചു. ബി.ജെ.പി ടിക്കറ്റിൽ ഭോജ്പുരി താരം പവൻ സിംഗ്, സഞ്ജയ് പ്രകാശ് മയൂഖ്, അനിൽ ഠാക്കൂർ, ഷീല പണ്ഡിറ്റ് എന്നിവർ കൗൺസിലിലെത്തി. എൽ.ജെ.പിയിൽ (രാംവിലാസ്) നിന്ന് അഷ്റഫ് അൻസാരി വിജയിച്ചപ്പോൾ ആർ.ജെ.ഡിക്ക് വേണ്ടി സുനിൽ സിംഗ് മാത്രമാണ് വിജയം കണ്ടത്.

ദീപക് പ്രകാശിന് മന്ത്രിസ്ഥാനം നഷ്ടമായേക്കും

തിരഞ്ഞെടുപ്പ് ഫലങ്ങൾ പുറത്തുവന്നതോടെ രാഷ്ട്രീയ ലോക് മോർച്ച (RLD) അധ്യക്ഷൻ ഉപേന്ദ്ര കുശ്വാഹയുടെ മകനും നിലവിലെ ബിഹാർ മന്ത്രിയുമായ ദീപക് പ്രകാശിന്റെ മന്ത്രിസ്ഥാനം പ്രതിസന്ധിയിലായിരിക്കുകയാണ്. മന്ത്രിയായി തുടരുന്നതിന് ആവശ്യമായ ആറുമാസത്തെ ഭരണഘടനാ പരിധി നവംബറിൽ അവസാനിക്കാനിരിക്കെ, ഇത്തവണ ദീപക് പ്രകാശിന് എൻ.ഡി.എ സീറ്റ് നൽകിയിരുന്നില്ല. ഉപേന്ദ്ര കുശ്വാഹ തന്റെ പാർട്ടിയെ ബി.ജെ.പിയിൽ ലയിപ്പിക്കാൻ വിസമ്മതിച്ചതാണ് ഇതിന് പിന്നിലെന്നാണ് സൂചനകൾ.

സഖ്യകക്ഷികളെ ഒന്നിപ്പിക്കുന്നതിന്റെ ഭാഗമായി ബി.ജെ.പി ലയന നിർദ്ദേശം മുന്നോട്ട് വെച്ചിരുന്നെങ്കിലും കുശ്വാഹ അത് നിരസിക്കുകയായിരുന്നു. സ്വന്തം പാർട്ടിയുടെ സ്വതന്ത്ര വ്യക്തിത്വം നിലനിർത്തിക്കൊണ്ട് എൻ.ഡി.എയിൽ തുടരാനാണ് അദ്ദേഹത്തിന്റെ തീരുമാനം. 2025 നവംബറിൽ ദീപക് പ്രകാശിനെ ആദ്യമായി മന്ത്രിസഭയിൽ ഉൾപ്പെടുത്തിയപ്പോഴും ബി.ജെ.പി ഇതേ നിർദ്ദേശം വെച്ചിരുന്നു. അന്ന് കുശ്വാഹ അത് നിരസിച്ചെങ്കിലും ദീപക്കിന്റെ രാഷ്ട്രീയ ഭാവി കണക്കിലെടുത്ത് പിന്നീട് നിലപാട് മാറ്റുമെന്ന പ്രതീക്ഷയിൽ ബി.ജെ.പി അദ്ദേഹത്തെ മന്ത്രിയാക്കുകയായിരുന്നു. എന്നാൽ നിലപാടിൽ ഉറച്ചുനിൽക്കുന്ന കുശ്വാഹ ലയനത്തിനില്ലെന്ന് വ്യക്തമാക്കിയതോടെ ദീപക് പ്രകാശിന് ആറുമാസ കാലാവധി കഴിയുമ്പോൾ മന്ത്രിസ്ഥാനം ഒഴിഞ്ഞുകൊടുക്കേണ്ടി വരും.

ബിഹാർ രാഷ്ട്രീയത്തിൽ വലിയ ചലനങ്ങൾ സൃഷ്ടിക്കുന്നതാണ് ഈ പുതിയ സംഭവവികാസങ്ങൾ. നിതീഷ് കുമാറിന്റെ മകന്റെ സജീവ രാഷ്ട്രീയ പ്രവേശനവും ഭോജ്പുരി താരത്തിന്റെ സാന്നിധ്യവും വരും ദിവസങ്ങളിൽ ബിഹാർ രാഷ്ട്രീയത്തെ കൂടുതൽ ചൂടുപിടിപ്പിക്കും.

---------------

Hindusthan Samachar / Roshith K