Thiruvananthapuram, 11 ജൂണ് (H.S.)

തിരഞ്ഞെടുപ്പ് തോൽവിക്ക് പിന്നാലെ സി.പി.ഐ.എമ്മിനുള്ളിൽ ആഭ്യന്തര കലഹവും സ്വയംവിമർശനവും ശക്തമാകുന്നു. തളിപ്പറമ്പ്, പയ്യന്നൂർ മണ്ഡലങ്ങളിലെ സ്ഥാനാർഥി നിർണയത്തിൽ സംസ്ഥാന നേതൃത്വത്തിന് ഗുരുതരമായ വീഴ്ച സംഭവിച്ചതായി പാർട്ടിയുടെ തിരഞ്ഞെടുപ്പ് അവലോകന (റിവ്യൂ) റിപ്പോർട്ടിൽ വ്യക്തമാക്കുന്നു. കണ്ണൂർ ജില്ലാ കമ്മിറ്റി ശുപാർശ ചെയ്ത സ്ഥാനാർത്ഥികളുടെ പേരുകൾ യാതൊരു പരിശോധനയുമില്ലാതെ അതേപടി അംഗീകരിച്ചു നൽകിയതിലാണ് സംസ്ഥാന നേതൃത്വത്തിന് പിഴവ് സംഭവിച്ചതെന്നാണ് റിപ്പോർട്ടിലെ പ്രധാന വിമർശനം.

നേരത്തെ സ്ഥാനാർഥി നിർണയത്തിൽ സംസ്ഥാന നേതൃത്വത്തിന് യാതൊരുവിധ പിഴവും സംഭവിച്ചിട്ടില്ലെന്ന് പാർട്ടി സംസ്ഥാന സെക്രട്ടറി എം.വി. ഗോവിന്ദൻ പരസ്യമായി ന്യായീകരിച്ചിരുന്ന സ്ഥാനത്താണ്, ഇപ്പോൾ പുറത്തുവന്ന പാർട്ടി റിപ്പോർട്ട് അദ്ദേഹത്തിന്റെ വാദങ്ങളെ പൂർണ്ണമായി തള്ളിക്കളയുന്നത്.

സംസ്ഥാന നേതൃത്വത്തിന് തിരുത്താമായിരുന്നു

പാർട്ടിയുടെ ശക്തമായ കോട്ടകളായ തളിപ്പറമ്പിലും പയ്യന്നൂരിലും പ്രാദേശികമായ വിയോജിപ്പുകൾ നിലനിന്നിരുന്നിട്ടും അത് അവഗണിച്ചതാണ് തിരിച്ചടിയായതെന്ന് റിപ്പോർട്ട് ചൂണ്ടിക്കാണിക്കുന്നു.

-

തളിപ്പറമ്പ് മണ്ഡലം: തളിപ്പറമ്പിൽ പി.കെ. ശ്യാമളയെ സ്ഥാനാർത്ഥിയാക്കിയതിനെതിരെ പ്രാദേശികമായി വലിയ എതിർപ്പുകളുണ്ടായിരുന്നു. പ്രവാസി വ്യവസായിയുടെ ആത്മഹത്യയുമായി ബന്ധപ്പെട്ട് ഉയർന്നുവന്ന വിവാദങ്ങൾ നിലനിൽക്കെ, പി.കെ. ശ്യാമളയുടെ സ്ഥാനാർഥിത്വം തള്ളിക്കളയാൻ സംസ്ഥാന നേതൃത്വത്തിന് പൂർണ്ണ അധികാരവും അവസരവുമുണ്ടായിരുന്നു. എന്നാൽ അതുണ്ടായില്ല.

-

പയ്യന്നൂർ മണ്ഡലം: രക്തസാക്ഷി ഫണ്ട് വിവാദങ്ങളിലടക്കം പേര് കേട്ട ടി.ഐ. മധുസൂദനനെ പയ്യന്നൂരിൽ വീണ്ടും മത്സരിപ്പിക്കുന്നതിനെതിരെയും പാർട്ടിയിൽ അതൃപ്തിയുണ്ടായിരുന്നു. മധുസൂദനനെ മാറ്റിനിർത്തണമെന്ന് പറയാൻ പാർട്ടി സംസ്ഥാന നേതൃത്വം തയ്യാറാകണമായിരുന്നുവെന്നും റിപ്പോർട്ടിൽ പറയുന്നു.

ജില്ലാ കമ്മിറ്റിയുടെ ശുപാർശകളെ കണ്ണടച്ച് വിശ്വസിക്കാതെ, കൃത്യമായ രാഷ്ട്രീയ സാഹചര്യം വിലയിരുത്തി സംസ്ഥാന നേതൃത്വം ഇടപെട്ടിരുന്നെങ്കിൽ ഈ മണ്ഡലങ്ങളിലെ തിരിച്ചടി ഒഴിവാക്കാമായിരുന്നു എന്നാണ് പാർട്ടി ഇപ്പോൾ വിലയിരുത്തുന്നത്.

സി.പി.ഐയ്ക്കെതിരെ കടുത്ത അമർഷം

സ്വന്തം വീഴ്ചകൾ വിലയിരുത്തുന്നതിനൊപ്പം മുന്നണിയിലെ രണ്ടാമത്തെ വലിയ കക്ഷിയായ സി.പി.ഐയ്ക്കെതിരെയും കടുത്ത വിമർശനമാണ് സി.പി.ഐ.എം അവലോകന റിപ്പോർട്ടിൽ ഉന്നയിച്ചിരിക്കുന്നത്. കൊല്ലം ജില്ലയിലെ ചാത്തന്നൂർ, ചടയമംഗലം മണ്ഡലങ്ങളിലേറ്റ കടുത്ത തോൽവിക്ക് കാരണം സി.പി.ഐയുടെ വീഴ്ചയാണെന്ന് റിപ്പോർട്ട് കുറ്റപ്പെടുത്തുന്നു.

ചാത്തന്നൂരിലെയും ചടയമംഗലത്തെയും പരാജയത്തിന്റെ പൂർണ്ണ ഉത്തരവാദിത്തം സി.പി.ഐയ്ക്കാണ്. തിരഞ്ഞെടുപ്പ് പ്രവർത്തനങ്ങളിൽ ഉണ്ടായ ഏകോപനമില്ലായ്മയും പ്രാദേശികമായ വീഴ്ചകളുമാണ് ഈ മണ്ഡലങ്ങൾ നഷ്ടപ്പെടാൻ ഇടയാക്കിയത്. - സി.പി.ഐ.എം റിവ്യൂ റിപ്പോർട്ട് വ്യക്തമാക്കുന്നു.

രാഷ്ട്രീയ പ്രത്യാഘാതങ്ങൾ

സി.പി.ഐ.എമ്മിന്റെ കോട്ടകളായ കണ്ണൂരിലെ മണ്ഡലങ്ങളിൽ പാർട്ടി വിമതർക്കെതിരെ പരാജയം നേരിടേണ്ടി വന്നത് വലിയ രാഷ്ട്രീയ നാണക്കേടാണ് ഉണ്ടാക്കിയിരിക്കുന്നത്. അണികൾക്കിടയിലെ അതൃപ്തിയാണ് തോൽവിക്ക് കാരണമെന്ന് അടിവരയിടുന്നതാണ് ഈ റിവ്യൂ റിപ്പോർട്ട്. സംസ്ഥാന നേതൃത്വത്തെ പ്രതിക്കൂട്ടിലാക്കുന്ന ഈ റിപ്പോർട്ട് വരും ദിവസങ്ങളിൽ സി.പി.ഐ.എമ്മിനുള്ളിലും എൽ.ഡി.എഫ് മുന്നണിക്കുള്ളിലും വലിയ രാഷ്ട്രീയ ചർച്ചകൾക്കും തർക്കങ്ങൾക്കും വഴിതുറക്കുമെന്നുറപ്പാണ്.

---------------

Hindusthan Samachar / Roshith K