Thiruvananthapuram , 11 ജൂണ് (H.S.)

തിരുവനന്തപുരം: സംസ്ഥാനത്ത് വീണ്ടും നിപ വൈറസ് ആശങ്കകൾ ഉയരുന്ന പശ്ചാത്തലത്തിൽ, ജനങ്ങൾ അനാവശ്യമായി ഭയപ്പെടേണ്ട സാഹചര്യമില്ലെന്ന് മുൻ ആരോഗ്യമന്ത്രി കെ.കെ. ശൈലജ. എന്നാൽ രോഗവ്യാപനം തടയുന്നതിനായി അതീവ ജാഗ്രത പുലർത്തേണ്ടതുണ്ടെന്നും അവർ ഓർമ്മിപ്പിച്ചു. മാധ്യമപ്രവർത്തകരോട് സംസാരിക്കവെയാണ് സംസ്ഥാനത്തെ നിലവിലെ സാഹചര്യങ്ങളെക്കുറിച്ചും പ്രതിരോധ പ്രവർത്തനങ്ങളെക്കുറിച്ചും മുൻ ആരോഗ്യമന്ത്രി നിലപാട് വ്യക്തമാക്കിയത്.

കേരളത്തിലെ ആരോഗ്യരംഗം മുൻപത്തേക്കാൾ ശക്തമാണെന്നും ഏത് സാഹചര്യത്തെയും നേരിടാൻ സജ്ജമാണെന്നും കെ.കെ. ശൈലജ പറഞ്ഞു. മുൻപ് നിപ പൊട്ടിപ്പുറപ്പെട്ട കാലഘട്ടത്തിൽ നിന്ന് വ്യത്യസ്തമായി, ഇന്ന് രോഗത്തെ പ്രതിരോധിക്കാൻ കൃത്യമായ പ്രോട്ടോകോളും കൃത്യമായ ആക്ഷൻ പ്ലാനും നിലവിലുണ്ട്. ഒരു പോസിറ്റീവ് കേസ് റിപ്പോർട്ട് ചെയ്യപ്പെടുമ്പോൾ തന്നെ, അത് മറ്റ് ആളുകളിലേക്ക് പടരാതിരിക്കാൻ ആവശ്യമായ എല്ലാ നടപടികളും സ്വീകരിക്കാൻ ആരോഗ്യ വകുപ്പിന് സാധിക്കുമെന്നും അവർ കൂട്ടിച്ചേർത്തു.

നിപയോ കോവിഡോ പോലുള്ള പകർച്ചവ്യാധികൾ ഏത് സർക്കാർ അധികാരത്തിലിരിക്കുന്നു എന്ന് നോക്കിയല്ല വരുന്നത്. പ്രകൃതിയിലെയും അന്തരീക്ഷത്തിലെയും മാറ്റങ്ങൾക്കനുസരിച്ച് ഇത്തരം രോഗങ്ങൾ ഉണ്ടാകാം. എന്നാൽ അതിനെ എങ്ങനെ നേരിടുന്നു എന്നതാണ് പ്രധാനം. മുൻകാല അനുഭവങ്ങളുടെ വെളിച്ചത്തിൽ രൂപീകരിച്ച ശക്തമായ പ്രോട്ടോകോൾ ഇപ്പോൾ നമുക്കുണ്ട്. - കെ.കെ. ശൈലജ വ്യക്തമാക്കി.

രോഗം പകരുന്നത് തടയാൻ ആവശ്യമായ മുൻകരുതലുകൾ സ്വീകരിക്കുക എന്നതാണ് ഏറ്റവും പ്രധാനം. ആരോഗ്യ പ്രവർത്തകരുടെ നിർദ്ദേശങ്ങൾ കൃത്യമായി പാലിക്കണം. യാതൊരുവിധത്തിലുള്ള വീഴ്ചയോ കൃത്യവിലോപമോ ആരുടെ ഭാഗത്തുനിന്നും ഉണ്ടാകരുത്. അതീവ ജാഗ്രതയോടെയും ഒത്തൊരുമയോടെയും വേണം ഈ സാഹചര്യത്തെ നേരിടാൻ.

ആദ്യമായി കേരളത്തിൽ നിപ ബാധിച്ച സമയത്ത് വലിയ ആശങ്കകൾ ഉണ്ടായിരുന്നുവെങ്കിലും മികച്ച പ്രതിരോധ പ്രവർത്തനങ്ങളിലൂടെ അതിനെ നിയന്ത്രിക്കാൻ സാധിച്ചിട്ടുണ്ട്. ആ അനുഭവ സമ്പത്ത് നമുക്ക് മുന്നിലുണ്ട്. അതിനാൽ പരിഭ്രാന്തി പരത്താതെ, വ്യക്തിശുചിത്വവും സാമൂഹിക അകലവും പാലിച്ച്, ലക്ഷണങ്ങൾ കണ്ടാൽ ഉടനടി ചികിത്സ തേടാൻ എല്ലാവരും തയ്യാറാകണമെന്നും മുൻ ആരോഗ്യമന്ത്രി ഓർമ്മിപ്പിച്ചു.

---------------

Hindusthan Samachar / Roshith K