Kochi, 13 ജൂണ് (H.S.)

കൊച്ചി: തിരുവിതാംകൂർ ദേവസ്വം ബോർഡ് മുൻ അഡ്മിനിസ്ട്രേറ്റീവ് ഓഫീസറും വിവാദമായ ശബരിമല സ്വർണക്കൊള്ളക്കേസിലെ മുഖ്യപ്രതികളിലൊരാളുമായ ബി. മുരാരി ബാബു (54) അന്തരിച്ചു. അർബുദ ബാധിതനായി കൊച്ചിയിലെ അമൃത ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെ ശനിയാഴ്ച പുലർച്ചെയായിരുന്നു അന്ത്യം. കഴിഞ്ഞ മൂന്ന് മാസത്തോളമായി രോഗം മൂർച്ഛിച്ചതിനെ തുടർന്ന് ഇദ്ദേഹം വിദഗ്ധ ചികിത്സയിലായിരുന്നു. ചങ്ങനാശേരി പെരുന്ന സ്വദേശിയാണ്.

ശബരിമലയിലെ ഉയർന്ന ഉദ്യോഗസ്ഥ പദവിയിലിരിക്കെ ഉയർന്നുവന്ന ഗുരുതരമായ സാമ്പത്തിക ക്രമക്കേടുകളും സ്വർണക്കവർച്ചാ ആരോപണങ്ങളുമാണ് മുരാരി ബാബുവിനെ വാർത്തകളിൽ നിറച്ചത്. ശബരിമല സ്വർണക്കൊള്ള കേസുമായി ബന്ധപ്പെട്ട് അന്വേഷണസംഘം അറസ്റ്റ് ചെയ്യുന്ന ആദ്യത്തെ ഉയർന്ന ദേവസ്വം ബോർഡ് ഉദ്യോഗസ്ഥനായിരുന്നു ഇദ്ദേഹം.

കേസും അറസ്റ്റും

ശബരിമല ക്ഷേത്രത്തിലെ ദ്വാരപാലക ശില്പങ്ങളിലും ശ്രീകോവിലിന് മുന്നിലെ കട്ടിളപ്പാളിയിലും പതിപ്പിച്ചിരുന്ന തങ്കപ്പാളികൾ മോഷ്ടിച്ചു കടത്തിയെന്ന കേസിലാണ് ഒക്ടോബർ 21-ന് മുരാരി ബാബുവിനെ പ്രത്യേക അന്വേഷണസംഘം അറസ്റ്റ് ചെയ്യുന്നത്. ശ്രീകോവിലിലെ യഥാർത്ഥ സ്വർണ്ണപ്പാളികൾ മാറ്റി പകരം ചെമ്പുപാളികൾ സ്ഥാപിക്കുകയും, ഇത് സ്വർണ്ണം തന്നെയാണെന്ന് വരുത്തിത്തീർക്കാൻ വ്യാജരേഖ ചമച്ചതും മുരാരി ബാബുവാണെന്ന് അന്വേഷണസംഘം കണ്ടെത്തിയിരുന്നു. സ്വർണപ്പാളിയെ 'ചെമ്പ് പാളി' എന്ന് തിരുത്തി എഴുതി ആദ്യമായി വ്യാജരേഖയുണ്ടാക്കിയത് ഇദ്ദേഹമാണെന്ന കണ്ടെത്തലിനെ തുടർന്ന് ദേവസ്വം ബോർഡ് ഇയാളെ സർവീസിൽ നിന്നും സസ്പെൻഡ് ചെയ്തിരുന്നു.

ദ്വാരപാലക ശിൽപ്പ കേസിലും കട്ടിളപ്പാളി കേസിലും ഒന്നിച്ച് പ്രതി ചേർക്കപ്പെട്ട മുരാരി ബാബു 90 ദിവസത്തോളം ജയിൽവാസം അനുഭവിച്ചിരുന്നു. എന്നാൽ, നിശ്ചിത സമയത്തിനകം അന്വേഷണസംഘത്തിന് കോടതിയിൽ കുറ്റപത്രം സമർപ്പിക്കാൻ സാധിക്കാത്തതിനെ തുടർന്ന് കഴിഞ്ഞ ജനുവരി അവസാനത്തോടെ കൊല്ലം വിജിലൻസ് കോടതി ഇയാൾക്ക് സ്വാഭാവിക ജാമ്യം അനുവദിക്കുകയായിരുന്നു.

കർശനമായ ജാമ്യവ്യവസ്ഥകൾ

കോടതി അനുവദിച്ച ജാമ്യത്തിൽ കടുത്ത നിബന്ധനകളാണ് മുൻ അഡ്മിനിസ്ട്രേറ്റീവ് ഓഫീസർക്ക് മേൽ ചുമത്തിയിരുന്നത്. കേസിന്റെ അന്വേഷണവുമായി സഹകരിക്കണമെന്നും, എല്ലാ ആഴ്ചയിലും തിരുവനന്തപുരത്ത് നേരിട്ടെത്തി അന്വേഷണ ഉദ്യോഗസ്ഥർക്ക് മുന്നിൽ ഒപ്പിടണമെന്നതുമായിരുന്നു പ്രധാന വ്യവസ്ഥ. എന്നാൽ ജാമ്യം ലഭിച്ച് പുറത്തിറങ്ങിയതിന് പിന്നാലെ ഇയാളുടെ ആരോഗ്യനില വഷളാവുകയായിരുന്നു.

അർബുദ രോഗബാധയെ തുടർന്ന് യാത്ര ചെയ്യാൻ പോലും കഴിയാത്ത സാഹചര്യമുണ്ടായതോടെ ജാമ്യവ്യവസ്ഥകളിൽ ഇളവ് തേടി ഇയാൾ കോടതിയെ സമീപിച്ചിരുന്നു. രോഗം മൂർച്ഛിച്ച സാഹചര്യവും ചികിത്സാ രേഖകളും പരിഗണിച്ച്, ആഴ്ച തോറുമുള്ള ഒപ്പിടൽ കോടതി മാസത്തിൽ ഒരിക്കൽ എന്ന നിലയിലേക്ക് ചുരുക്കി നൽകുകയായിരുന്നു. ആശുപത്രിയിൽ ചികിത്സയിൽ തുടരവെയാണ് ഇപ്പോൾ അന്ത്യം സംഭവിച്ചിരിക്കുന്നത്.

ഔദ്യോഗിക ജീവിതം

1994-ൽ കേരള പൊലീസിൽ കോൺസ്റ്റബിളായി ജോലിയിൽ പ്രവേശിച്ചാണ് മുരാരി ബാബു ഔദ്യോഗിക ജീവിതം ആരംഭിക്കുന്നത്. കണ്ണൂരിൽ പൊലീസ് പരിശീലനം പൂർത്തിയാക്കുന്നതിന് മുൻപ് തന്നെ ആ ജോലി ഉപേക്ഷിച്ചു. തുടർന്ന് 1997-ലാണ് തിരുവിതാംകൂർ ദേവസ്വം ബോർഡിൽ താൽക്കാലിക ജീവനക്കാരനായി ചേരുന്നത്. പിന്നീട് ഏറ്റുമാനൂർ ക്ഷേത്രത്തിൽ ക്ലർക്കായി സ്ഥിരനിയമനം ലഭിച്ചു.

വൈക്കം, ഏറ്റുമാനൂർ, തിരുനക്കര ക്ഷേത്രങ്ങളിലെ ഉത്സവങ്ങളുമായി ബന്ധപ്പെട്ട് 'സ്പെഷൽ ഓഫീസർ' തസ്തികയിൽ സേവനമനുഷ്ഠിച്ച ശേഷമാണ് ശബരിമലയിലെ അഡ്മിനിസ്ട്രേറ്റീവ് ഓഫീസർ പദവിയിലേക്ക് ഇയാൾ ഉയർന്നത്. സി.ഐ.ടി.യു നിയന്ത്രണത്തിലുള്ള തിരുവിതാംകൂർ ദേവസ്വം എംപ്ലോയീസ് കോൺഫെഡറേഷനിലെ സജീവ അംഗം കൂടിയായിരുന്നു മുരാരി ബാബു. മരണാനന്തര ചടങ്ങുകൾക്കായി ഭൗതികശരീരം പിന്നീട് ബന്ധുക്കൾക്ക് വിട്ടുനൽകും.

---------------

Hindusthan Samachar / Roshith K