Alapuzha , 15 ജൂണ് (H.S.)

ആലപ്പുഴ: മുൻ മുഖ്യമന്ത്രി പിണറായി വിജയനും മന്ത്രിമാരും സഞ്ചരിച്ച നവകേരള ബസിന് സമീപം പ്രതിഷേധിച്ച യൂത്ത് കോൺഗ്രസ് - കെഎസ്യു പ്രവർത്തകരെ ക്രൂരമായി മർദ്ദിച്ച സംഭവത്തിൽ കേസ് അന്വേഷിക്കുന്ന പ്രത്യേക അന്വേഷണ സംഘത്തിന് (SIT) നിർണായക വിവരങ്ങൾ ലഭിച്ചു. പ്രതിഷേധക്കാരെ അടിച്ചൊതുക്കാൻ ഗൺമാനും സുരക്ഷാ ഉദ്യോഗസ്ഥർക്കും പ്രത്യേക നിർദേശം ലഭിച്ചിരുന്നു എന്ന സൂചനയാണ് എസ്ഐടിയ്ക്ക് ഇപ്പോൾ ലഭിച്ചിരിക്കുന്നത്.

ആലപ്പുഴയിൽ വെച്ച് നിലവിലെ എ.ഡി. തോമസ് എം.എൽ.എ, യൂത്ത് കോൺഗ്രസ് നേതാവ് അജയ് ജ്യുവൽ കുര്യാക്കോസ് എന്നിവരെ തല്ലിച്ചതയ്ക്കാൻ സുരക്ഷാ ഉദ്യോഗസ്ഥർക്ക് കൃത്യമായ നിർദേശം നൽകിയത് ആരാണെന്ന് കണ്ടെത്താനുള്ള ശ്രമത്തിലാണ് അന്വേഷണസംഘം. വരും ദിവസങ്ങളിൽ ഈ വഴിയിലേക്കായിരിക്കും അന്വേഷണം നീങ്ങുക.

ഉദ്യോഗസ്ഥരെ ചോദ്യം ചെയ്തപ്പോൾ ലഭിച്ച സൂചനകൾ

മുൻ മുഖ്യമന്ത്രിയുടെ ഗൺമാൻ അനിൽ കുമാർ ഉൾപ്പെടെയുള്ള സുരക്ഷാ ഉദ്യോഗസ്ഥരെ കഴിഞ്ഞ മൂന്ന് ദിവസങ്ങളിലായി എസ്ഐടി വിശദമായി ചോദ്യം ചെയ്തിരുന്നു. പ്രതികളെ ഒന്നിച്ചിരുത്തിയും ഒറ്റയ്ക്കൊറ്റയ്ക്ക് ഇരുത്തിയുമായിരുന്നു ക്രൈംബ്രാഞ്ച് ഓഫീസിലെ ചോദ്യം ചെയ്യൽ നടപടികൾ. ഈ ഘട്ടത്തിലാണ് മുകളറ്റത്തു നിന്നുള്ള നിർദേശ പ്രകാരമാണ് തങ്ങൾ പ്രവർത്തിച്ചതെന്ന സൂചനകൾ ഉദ്യോഗസ്ഥരിൽ നിന്നും അന്വേഷണസംഘത്തിന് ലഭിക്കുന്നത്. നവകേരള ബസ് കടന്നുപോയതിന് ശേഷവും സുരക്ഷാ വാഹനത്തിൽ നിന്നിറങ്ങി ഉദ്യോഗസ്ഥർ പ്രതിഷേധക്കാരെ മർദ്ദിച്ചതിൽ അസ്വാഭാവികതയുണ്ടെന്ന് എസ്ഐടി വിലയിരുത്തിയിരുന്നു.

ഫോൺ കോൾ വിവരങ്ങൾ ശേഖരിക്കും; കൂടുതൽ നടപടികളിലേക്ക്

മർദ്ദനം നടത്തുന്നതിലേക്ക് നയിച്ച സാഹചര്യങ്ങളും ഇതിന് പിന്നിലെ ഗൂഢാലോചനയും പുറത്തുകൊണ്ടുവരുന്നതിനായി പ്രതികളായ ഉദ്യോഗസ്ഥരുടെ ഫോൺ കോൾ വിവരങ്ങൾ (CDR) ശേഖരിക്കാൻ എസ്ഐടി തീരുമാനിച്ചിട്ടുണ്ട്. സംഭവദിവസവും അതിന് തൊട്ടടുത്ത ദിവസങ്ങളിലും ഇവർ ആരെയൊക്കെയാണ് ബന്ധപ്പെട്ടത്, ആരിൽ നിന്നൊക്കെയാണ് ഫോൺ കോളുകൾ വന്നത് എന്നത് സംബന്ധിച്ച വിശദമായ ശാസ്ത്രീയ തെളിവുകൾ ഇതോടെ ശേഖരിക്കാൻ സാധിക്കും.

ഡിജിറ്റൽ തെളിവുകളും ദൃശ്യങ്ങളും ഫോൺ രേഖകളും ഉൾപ്പെടെയുള്ള വിശദമായ തെളിവുകൾ പൂർണ്ണമായി ശേഖരിച്ച ശേഷം പ്രതികളെ വീണ്ടും ചോദ്യം ചെയ്യാൻ വിളിച്ചുവരുത്തും.

അറസ്റ്റ് നടപടികളിലേക്ക് കടക്കും: വിശദമായ തെളിവ് ശേഖരണത്തിന് ശേഷം രണ്ടാം ഘട്ടമായി പ്രതികളെ വിളിച്ചുവരുത്തുമ്പോൾ അറസ്റ്റ് ഉൾപ്പെടെയുള്ള കർശനമായ നിയമനടപടികളിലേക്ക് കടക്കാനാണ് പ്രത്യേക അന്വേഷണ സംഘത്തിന്റെ തീരുമാനം.

നിലവിൽ പ്രതികൾക്ക് കോടതി മുൻകൂർ ജാമ്യം അനുവദിച്ചിട്ടുള്ളതിനാൽ ചോദ്യം ചെയ്യലിന് ശേഷം നോട്ടീസ് നൽകി വിട്ടയച്ചിരിക്കുകയാണ്. കള്ളക്കേസുകൾ ചമച്ച് പ്രതികളെ രക്ഷിക്കാൻ മുൻപ് ശ്രമം നടന്നതായി കണ്ടെത്തിയതിനെ തുടർന്നാണ് പുതിയ യുഡിഎഫ് സർക്കാർ അധികാരമേറ്റയുടൻ കേസ് അന്വേഷിക്കാൻ പ്രത്യേക അന്വേഷണ സംഘത്തെ (SIT) ചുമതലപ്പെടുത്തിയത്. വധശ്രമം (IPC 308) ഉൾപ്പെടെയുള്ള ഗുരുതര വകുപ്പുകളാണ് ഇപ്പോൾ പ്രതികൾക്കെതിരെ ചുമത്തിയിരിക്കുന്നത്.

---------------

Hindusthan Samachar / Roshith K