Kolkota, 15 ജൂണ് (H.S.)

കൊൽക്കത്ത: പശ്ചിമ ബംഗാൾ ഭരണകക്ഷിയായ തൃണമൂൽ കോൺഗ്രസിനെ (TMC) പ്രതിസന്ധിയിലാഴ്ത്തി പാർട്ടിയിലെ ആഭ്യന്തര കലഹം പുതിയ തലത്തിലേക്ക്. പാർട്ടി ദേശീയ ജനറൽ സെക്രട്ടറി അഭിഷേക് ബാനർജി എട്ടാം ക്ലാസിൽ പഠിക്കുമ്പോൾ എല്ലാ വിഷയങ്ങൾക്കും പരാജയപ്പെട്ട വ്യക്തിയാണെന്ന ഗുരുതര ആരോപണവുമായി വിമത തൃണമൂൽ എം.പി കാകോലി ഘോഷ് ദസ്തിദാറിന്റെ മകൻ ഡോ. ബൈദ്യനാഥ് ഘോഷ് ദസ്തിദാർ രംഗത്തെത്തി. അഭിഷേക് ബാനർജിയിൽ നിന്ന് ആരും മാന്യത പ്രതീക്ഷിക്കേണ്ടതില്ലെന്നും ബൈദ്യനാഥ് തന്റെ എക്സ് (X) ഹാൻഡിലിലൂടെ തുറന്നടിച്ചു.

ബംഗാൾ മുഖ്യമന്ത്രി മമത ബാനർജി ഉൾപ്പെടെയുള്ള മുതിർന്ന തൃണമൂൽ നേതാക്കൾക്കെതിരെ ബൈദ്യനാഥ് നിയമനടപടി സ്വീകരിച്ചതിന് തൊട്ടുപിന്നാലെയാണ് ഈ പുതിയ വെളിപ്പെടുത്തൽ. ബരാസത് നിയമസഭാ മണ്ഡലത്തിൽ മത്സരിക്കാൻ താൻ ടിക്കറ്റ് ചോദിച്ചു എന്ന തൃണമൂൽ നേതൃത്വത്തിന്റെ വാദങ്ങളെയും അദ്ദേഹം പൂർണ്ണമായി തള്ളി.

'അംഗീകാരമില്ലാത്ത കോളജിലെ ബിരുദധാരി; മാന്യത പ്രതീക്ഷിക്കരുത്'

അഭിഷേക് ബാനർജിയുടെ വിദ്യാഭ്യാസ യോഗ്യതയെയും പാരമ്പര്യത്തെയും പരിഹസിച്ചുകൊണ്ടാണ് ഡോ. ബൈദ്യനാഥ് പോസ്റ്റിട്ടത്. നവ നളന്ദ സ്കൂളിൽ പഠിക്കുമ്പോൾ എട്ടാം ക്ലാസിൽ അഭിഷേക് എല്ലാ വിഷയങ്ങൾക്കും തോറ്റിരുന്നുവെന്നും, പിന്നീട് അംഗീകാരമില്ലാത്ത ഐ.ഐ.പി.എം (IIPM) എന്ന സ്ഥാപനത്തിൽ നിന്നാണ് ബിരുദം പൂർത്തിയാക്കിയതെന്നും ബൈദ്യനാഥ് ആരോപിച്ചു.

അഭിഷേകിന്റെ അമ്മായി (മമത ബാനർജി) പിഎച്ച്.ഡി നേടിയത് ഈസ്റ്റ് ജോർജിയ സർവകലാശാലയിൽ നിന്നാണ്. അതുകൊണ്ട് തന്നെ അവരുടെ ഐടി സെല്ലിലുള്ളവർ രോഗബാധിതരായ ആളുകളെയും അവരുടെ രൂപത്തെയും നോക്കി പരിഹസിക്കുന്നതിൽ അത്ഭുതപ്പെടാനില്ല. അവരിൽ നിന്ന് മാന്യത പ്രതീക്ഷിക്കുന്നത് തെറ്റാണ്, ബൈദ്യനാഥ് കുറിച്ചു.

തൃണമൂലിൽ കലാപക്കൊടി ഉയർത്തിയ തന്റെ അമ്മ കാകോലി ഘോഷ് ദസ്തിദാറിനെ അദ്ദേഹം ശക്തമായി പ്രതിരോധിച്ചു. മമതയുടെ പിന്തുണയില്ലാതെ തന്നെ എം.പിയോ എം.എൽ.എയോ ആകാൻ യോഗ്യതയുള്ള വ്യക്തിയായിരുന്നു അമ്മയെന്നും, എന്നിട്ടും മമതയുടെ രാഷ്ട്രീയ പ്രസ്ഥാനത്തെ വിശ്വസിച്ച് വർഷങ്ങളോളം ത്യാഗവും കഷ്ടപ്പാടും സഹിച്ചുവെന്നും അദ്ദേഹം കൂട്ടിച്ചേർത്തു. അമ്മ കാകോലി ജെ.ഇ.ഇ (JEE) പരീക്ഷ പാസായ ആദ്യ തലമുറയിലെ വനിതകളിൽ ഒരാളാണെന്നും കൊൽക്കത്തയിലെ ആർ.ജി കർ മെഡിക്കൽ കോളജിലും ലണ്ടനിലെ കിങ്സ് കോളജിലും പരിശീലനം നേടിയ പ്രശസ്ത ഡോക്ടറാണെന്നും ബൈദ്യനാഥ് ഓർമ്മിപ്പിച്ചു. തന്റെ അമ്മ വ്യാജ സർവകലാശാലകളിൽ നിന്ന് പിഎച്ച്.ഡി എടുത്തിട്ടില്ലെന്നും ശാരദ, റേഷൻ, അധ്യാപക നിയമനം, കൽക്കരി, കന്നുകാലി കടത്ത് തുടങ്ങിയ അഴിമതി കേസുകളിൽ ഒന്നും ഭാഗമല്ലെന്നും അദ്ദേഹം മമത ബാനർജിയെ ലക്ഷ്യമിട്ട് പറഞ്ഞു.

മമതയ്ക്കും നേതാക്കൾക്കുമെതിരെ അപകീർത്തി കേസ്

മനശാസ്ത്രജ്ഞനായ ഡോ. ബൈദ്യനാഥ് ഘോഷ്, മമത ബാനർജിക്ക് പുറമെ കല്യാൺ ബാനർജി, സൗഗത റോയ്, മഹുവ മൊയ്ത്ര, സോണാലി ഗുഹ എന്നീ പ്രമുഖ തൃണമൂൽ നേതാക്കൾക്കെതിരെയും നിയമനടപടി സ്വീകരിച്ചിട്ടുണ്ട്. താനും അമ്മയും പതിവായി മദ്യപിക്കാറുണ്ടെന്ന നേതാക്കളുടെ പ്രസ്താവനയ്ക്കെതിരെയാണ് അദ്ദേഹം രംഗത്തെത്തിയത്. അടിസ്ഥാനരഹിതമായ ഇത്തരം ആരോപണങ്ങൾ ഉന്നയിച്ച നേതാക്കൾ പരസ്യമായി മാപ്പ് പറയണമെന്നും അല്ലാത്തപക്ഷം ശക്തമായ മാനനഷ്ടക്കേസുമായി മുന്നോട്ട് പോകുമെന്നും ബൈദ്യനാഥ് വ്യക്തമാക്കി.

തൃണമൂൽ നേരിടുന്നത് ചരിത്രത്തിലെ ഏറ്റവും വലിയ പ്രതിസന്ധി

പാർട്ടിക്ക് അകത്ത് അഭിഷേക് ബാനർജിയുടെ ഏകാധിപത്യ നിലപാടുകൾക്കെതിരെ വലിയ രീതിയിലുള്ള അതൃപ്തിയാണ് പുകയുന്നത്. തൃണമൂലിന്റെ ആകെപ്പെയുള്ള 28 ലോക്സഭാ എം.പിമാരിൽ 20 പേരും നിലവിൽ പാർട്ടി നേതൃത്വത്തിനെതിരെ തിരിഞ്ഞിരിക്കുകയാണ്. പശ്ചിമ ബംഗാൾ നിയമസഭയിലും പാർട്ടി വലിയ പ്രതിസന്ധി നേരിടുന്നുണ്ട്. പാർട്ടിയിൽ നിന്ന് പുറത്താക്കപ്പെട്ട റിതബ്രത ബാനർജിക്ക് 64 എം.എൽ.എമാരുടെ പിന്തുണയുണ്ടെന്നാണ് വിവരം. ഇദ്ദേഹത്തെ സഭയിലെ പ്രതിപക്ഷ നേതാവായി (LoP) പ്രഖ്യാപിച്ചതും മമത ബാനർജിക്ക് കനത്ത തിരിച്ചടിയായി മാറിയിരിക്കുകയാണ്. വരും ദിവസങ്ങളിൽ കൂടുതൽ നേതാക്കൾ പാർട്ടി വിടുമെന്നാണ് സൂചനകൾ.

---------------

Hindusthan Samachar / Roshith K