Kasarkod, 15 ജൂണ് (H.S.)

കാസർകോട്: വിപണിയിൽ നിത്യോപയോഗ സാധനങ്ങൾക്ക് വില കുതിച്ചുയർന്നതോടെ ജില്ലയിലെ വിദ്യാലയങ്ങളിൽ ഉച്ചഭക്ഷണ വിതരണം പ്രതിസന്ധിയിലേക്ക്. പാലിനും മുട്ടയ്ക്കും പുറമേ പാചകവാതകത്തിനും ഉൾപ്പെടെ തീവിലയായതാണ് സ്കൂൾ അധികൃതരെയും പ്രധാനാധ്യാപകരെയും കടുത്ത സാമ്പത്തിക പ്രതിസന്ധിയിലാക്കിയിരിക്കുന്നത്. പുതിയ അധ്യയന വർഷം ആരംഭിച്ച് വിദ്യാർഥികൾക്ക് രണ്ട് കറികളോടു കൂടിയ ഉച്ചഭക്ഷണം നൽകിത്തുടങ്ങിയെങ്കിലും, ഇതിനായി സർക്കാർ നിശ്ചയിച്ച തുകയിൽ കാലാനുസൃതമായ വർധനവ് വരുത്താത്തതാണ് പ്രധാന വെല്ലുവിളിയാകുന്നത്.

കഴിഞ്ഞ അധ്യയന വർഷത്തെ വിപണി നിരക്കിന്റെ അടിസ്ഥാനത്തിലാണ് സർക്കാർ ഇപ്പോഴും വിദ്യാലയങ്ങൾക്ക് ഉച്ചഭക്ഷണത്തിനുള്ള പണം അനുവദിക്കുന്നത്. എന്നാൽ അന്നത്തെ വിലയേക്കാൾ ഇരട്ടിയോളമാണ് നിലവിൽ വിപണിയിലെ സാധനങ്ങളുടെ വില. നിത്യേനയുള്ള പച്ചക്കറി, പലചരക്ക് സാധനങ്ങൾ എന്നിവയ്ക്കൊപ്പം കുട്ടികൾക്ക് ആഴ്ചയിൽ രണ്ടുദിവസം പാലും ഒരു ദിവസം മുട്ടയും നൽകേണ്ടതുണ്ട്. പാലിന്റെയും മുട്ടയുടെയും വില വർധിച്ച സാഹചര്യത്തിൽ നിലവിലുള്ള സർക്കാർ ഗ്രാന്റ് ഉപയോഗിച്ച് ഇവ വാങ്ങി നൽകുക എന്നത് സ്കൂൾ നൂൺ ഫീഡിംഗ് കമ്മിറ്റികൾക്ക് താങ്ങാനാകുന്നതിലും അപ്പുറമാണ്.

കടം വാങ്ങി പ്രതിസന്ധി നേരിടുന്ന പ്രധാനാധ്യാപകർ

ഭക്ഷണ വിതരണം മുടങ്ങാതിരിക്കാൻ പല സ്കൂളുകളിലും പ്രധാനാധ്യാപകർ സ്വന്തം കയ്യിൽ നിന്നും പി.ടി.എ ഫണ്ടിൽ നിന്നും പണം കണ്ടെത്തേണ്ട അവസ്ഥയിലാണ്. പാചകവാതക സിലിണ്ടറുകളുടെ വിലവർധനവും പ്രതിസന്ധിയുടെ ആക്കം കൂട്ടുന്നു. സർക്കാർ നൽകുന്ന തുച്ഛമായ തുക കൊണ്ട് വിപണിയിലെ ഈ 'തീവില'യെ പ്രതിരോധിക്കാൻ സാധിക്കില്ലെന്ന് അധ്യാപക സംഘടനകളും ചൂണ്ടിക്കാണിക്കുന്നു.

പാലിനും മുട്ടയ്ക്കും പച്ചക്കറിക്കും വില കുതിച്ചുയരുകയാണ്. പഴയ നിരക്കിലുള്ള ഫണ്ട് കൊണ്ട് കുട്ടികൾക്ക് ഗുണനിലവാരമുള്ള ഭക്ഷണം നൽകുക അസാധ്യമാണ്. പല വിദ്യാലയങ്ങളിലും അധ്യാപകർ കടം വാങ്ങിയാണ് നിലവിൽ പദ്ധതി മുന്നോട്ട് കൊണ്ടുപോകുന്നത്.

— ഒരു സ്കൂൾ പ്രധാനാധ്യാപകൻ

ആവശ്യങ്ങൾ ശക്തം; പരിഹാരം അകലെ

വിദ്യാർഥികളുടെ എണ്ണത്തിനനുസരിച്ച് നിലവിൽ നൽകുന്ന പാചകച്ചെലവ് (കോസ്റ്റ് ഓഫ് കുക്കിംഗ്) അടിയന്തരമായി പുതുക്കി നിശ്ചയിക്കണമെന്നാണ് സ്കൂൾ അധികൃതരുടെ പ്രധാന ആവശ്യം. വിപണിയിലെ യഥാർത്ഥ വിലനിലവാരം കണക്കിലെടുത്ത് തുക അനുവദിച്ചില്ലെങ്കിൽ വരും ദിവസങ്ങളിൽ ഉച്ചഭക്ഷണ പദ്ധതി പൂർണ്ണമായും സ്തംഭിക്കുന്ന അവസ്ഥയിലേക്ക് കാര്യങ്ങൾ നീങ്ങും.

കാസർകോട് ജില്ലയിലെ ഭൂരിഭാഗം പൊതുവിദ്യാലയങ്ങളിലും സാധാരണക്കാരായ കുടുംബങ്ങളിലെ കുട്ടികളാണ് പഠിക്കുന്നത്. അവർക്ക് സ്കൂളിൽ നിന്ന് ലഭിക്കുന്ന ഉച്ചഭക്ഷണം വലിയൊരു ആശ്വാസമാണ്. ഈ സാഹചര്യത്തിൽ, സാമ്പത്തിക പ്രതിസന്ധി മറികടക്കാൻ സർക്കാർ അടിയന്തരമായി ഇടപെടണമെന്നും സ്കൂൾ ഉച്ചഭക്ഷണ ഫണ്ട് കാലാനുസൃതമായി വർധിപ്പിക്കണമെന്നുമാണ് നാട്ടുകാരുടെയും അധ്യാപകരുടെയും ഒരേസ്വരത്തിലുള്ള ആവശ്യം.

---------------

Hindusthan Samachar / Roshith K