Bhopal, 18 ജൂണ് (H.S.)

ഭോപ്പാൽ: തൃണമൂൽ കോൺഗ്രസ് (TMC) ദേശീയ ജനറൽ സെക്രട്ടറി അഭിഷേക് ബാനർജിക്ക് കനത്ത നിയമപരമായ തിരിച്ചടി. ബിജെപി നേതാവ് ആകാശ് വിജയ്വർഗിയ നൽകിയ മാനനഷ്ടക്കേസിൽ അഭിഷേക് ബാനർജിക്കെതിരെ പുറപ്പെടുവിച്ചിരുന്ന അറസ്റ്റ് വാറണ്ടിന്മേലുള്ള ഇടക്കാല സ്റ്റേ മധ്യപ്രദേശ് ഹൈക്കോടതി നീക്കി. കേസ് തുടരാൻ ഹർജിക്കാരന് താൽപ്പര്യമില്ലെന്ന് ചൂണ്ടിക്കാട്ടിയാണ് ജസ്റ്റിസ് പ്രമോദ് കുമാർ അഗർവാൾ അധ്യക്ഷനായ ബെഞ്ച് അഭിഷേകിന്റെ ഹർജി തള്ളിയത്. ഇതോടെ കേസിൽ അഭിഷേക് ബാനർജിക്കെതിരെയുള്ള അറസ്റ്റ് ഉൾപ്പെടെയുള്ള നടപടികളുമായി വിചാരണ കോടതിക്ക് മുന്നോട്ടുപോകാം.

ഹർജിയിൽ വാദം ഉന്നയിക്കാൻ അഭിഷേക് ബാനർജിയുടെ അഭിഭാഷകന് കോടതി നിരവധി അവസരങ്ങൾ നൽകിയിരുന്നു. എന്നാൽ കോടതിയുടെ ഒന്നാം റൗണ്ടിലും തൊട്ടുപിന്നാലെയുള്ള പാസ്സോവർ റൗണ്ടിലും ഹർജിക്കാരന് വേണ്ടി ആരും ഹാജരായില്ല. കേസ് നടത്തുന്നതിൽ ഹർജിക്കാരന് താല്പര്യമില്ലെന്ന് വിലയിരുത്തിയ ഹൈക്കോടതി ഹർജി തള്ളുകയും ഉത്തരവിന്റെ പകർപ്പ് അടിയന്തരമായി വിചാരണ കോടതിക്ക് അയക്കാൻ നിർദ്ദേശിക്കുകയുമായിരുന്നു. ഭോപ്പാലിലെ പ്രത്യേക എംപി-എംഎൽഎ (MP-MLA) കോടതി പുറപ്പെടുവിച്ചിരുന്ന അറസ്റ്റ് വാറണ്ടിന്മേൽ 2025 നവംബർ 12-ന് അനുവദിച്ച ഇടക്കാല സ്റ്റേയാണ് ഇതോടെ റദ്ദാക്കപ്പെട്ടത്.

വിവാദ പരാമർശവും നിയമപോരാട്ടവും

2020 നവംബറിൽ കൊൽക്കത്തയിൽ നടന്ന ഒരു രാഷ്ട്രീയ റാലിക്കിടെയാണ് കേസിനാസ്പദമായ സംഭവം നടക്കുന്നത്. മുതിർന്ന ബിജെപി നേതാവ് കൈലാഷ് വിജയ്വർഗിയയുടെ മകനും ബിജെപി നേതാവുമായ ആകാശ് വിജയ്വർഗിയയെ അഭിഷേക് ബാനർജി പൊതുവേദിയിൽ വെച്ച് 'ഗുണ്ട' എന്ന് വിശേഷിപ്പിച്ചു എന്നതായിരുന്നു പരാതി. ഈ പരാമർശത്തിൽ പ്രകോപിതനായ ആകാശ് വിജയ്വർഗിയ ഭോപ്പാലിലെ പ്രത്യേക എംപി-എംഎൽഎ കോടതിയെ സമീപിക്കുകയായിരുന്നു.

തുടർന്ന് കേസിന്റെ വിചാരണാ വേളയിൽ അഭിഷേക് ബാനർജി നിരന്തരമായി കോടതിയിൽ ഹാജരാകാതിരുന്നതിനെ വിചാരണ കോടതി കർശനമായി വിമർശിച്ചിരുന്നു. തുടർച്ചയായ ഈ അസാന്നിധ്യത്തെ തുടർന്നാണ് ഭോപ്പാലിലെ എംപി-എംഎൽഎ കോടതി അഭിഷേക് ബാനർജിക്കെതിരെ അറസ്റ്റ് വാറണ്ട് പുറപ്പെടുവിച്ചത്. ഈ വാറണ്ടിനെതിരെ അഭിഷേക് ബാനർജി ഹൈക്കോടതിയെ സമീപിച്ച് സ്റ്റേ വാങ്ങുകയായിരുന്നു.

ഇപ്പോൾ ഹൈക്കോടതി സ്റ്റേ നീക്കിയ പശ്ചാത്തലത്തിൽ, വിചാരണ കോടതിക്ക് വാറണ്ട് നടപ്പിലാക്കാനും തുടർനടപടികളിലേക്ക് കടക്കാനും പൂർണ്ണ അധികാരമുണ്ട്. രാഷ്ട്രീയമായി ഏറെ പ്രാധാന്യമുള്ള ഈ കേസിൽ പശ്ചിമ ബംഗാൾ മുഖ്യമന്ത്രി മമതാ ബാനർജിയുടെ അനന്തരവൻ കൂടിയായ അഭിഷേക് ബാനർജി ഇനി എന്ത് നിയമപരമായ നീക്കമായിരിക്കും നടത്തുക എന്നത് ദേശീയ രാഷ്ട്രീയത്തിൽ ഉറ്റുനോക്കപ്പെടുന്നു.

---------------

Hindusthan Samachar / Roshith K