Avian, 18 ജൂണ് (H.S.)

എവിയൻ (ഫ്രാൻസ്): ആർട്ടിഫിഷ്യൽ ഇന്റലിജൻസ് (AI) മനുഷ്യരാശിയുടെ വികാസത്തിന് വലിയ സംഭാവനകൾ നൽകുമ്പോഴും അത് ജനങ്ങളെ ശാക്തീകരിക്കുന്നതിനായിരിക്കണം ഉപയോഗിക്കേണ്ടതെന്ന് പ്രധാനമന്ത്രി നരേന്ദ്ര മോദി. ഫ്രാൻസിലെ എവിയനിൽ നടക്കുന്ന ജി7 ഉച്ചകോടിയുടെ ഔട്ട്റീച്ച് സെഷനിൽ സംസാരിക്കുകയായിരുന്നു അദ്ദേഹം. സുരക്ഷിതവും വേഗതയേറിയതും കാര്യക്ഷമവുമായ എഐ വിന്യാസത്തെക്കുറിച്ചുള്ള ചർച്ചയിലാണ് ഇന്ത്യയുടെ മാനവിക കേന്ദ്രീകൃതമായ (MANAV) കാഴ്ചപ്പാട് പ്രധാനമന്ത്രി മുന്നോട്ടുവെച്ചത്. എഐ സാങ്കേതികവിദ്യ ഉൾക്കൊള്ളൽ, സുരക്ഷ, പൊതുനന്മ എന്നീ തത്വങ്ങളിൽ അധിഷ്ഠിതമായിരിക്കണമെന്നും അദ്ദേഹം കൂട്ടിച്ചേർത്തു.

സൈബർ ഇടത്തെ ഇന്ത്യ എപ്പോഴും ഒരു ആഗോള പൊതുനന്മയായാണ് കാണുന്നതെന്ന് പ്രധാനമന്ത്രി ഓർമ്മിപ്പിച്ചു. ജനാധിപത്യ രാജ്യങ്ങൾക്ക് തങ്ങളുടെ നിർണായക വിവര അടിസ്ഥാന സൗകര്യങ്ങൾ സംരക്ഷിക്കുന്നതിനും സൈബർ ഭീഷണികളെ നേരിടുന്നതിനും സഹായകമായ എഐ മോഡലുകൾ ലഭ്യമാകണം. സുരക്ഷ, വേഗത, കാര്യക്ഷമത എന്നിവ ഒരുമിച്ച് കൊണ്ടുപോകുന്ന ഒരു സമഗ്ര സമീപനമാണ് എഐ വികസനത്തിൽ ആവശ്യമെന്നും ഇതിനായി നാല് പ്രധാന നിർദ്ദേശങ്ങൾ അദ്ദേഹം ആഗോള നേതാക്കൾക്ക് മുന്നിൽ വെച്ചു.

എഐ സംവിധാനങ്ങൾ തുടക്കം മുതൽ തന്നെ സുരക്ഷിതമായി രൂപകൽപ്പന ചെയ്യണം (safe-by-design), പൊതുവായ മാനദണ്ഡങ്ങളും നിയന്ത്രണ മാർഗ്ഗനിർദ്ദേശങ്ങളും എഐ വിന്യാസത്തിന് ഒപ്പമുണ്ടാകണം, ഡീപ്ഫേക്കുകൾ, വ്യാജവിവരങ്ങൾ, സൈബർ തട്ടിപ്പുകൾ എന്നിവ നേരിടാൻ ഫലപ്രദമായ ആഗോള സഹകരണം വേണം, എഐ സാങ്കേതികവിദ്യയുടെ നേട്ടങ്ങൾ ഗ്ലോബൽ സൗത്ത് (വികസ്വര രാജ്യങ്ങളിലേക്ക്) രാജ്യങ്ങളിലേക്ക് കൂടി എത്തിക്കണം എന്നിവയാണ് പ്രധാനമന്ത്രി മുന്നോട്ടുവെച്ച നിർദ്ദേശങ്ങൾ. എഐ മനുഷ്യന്റെ കഴിവുകളെ വികസിപ്പിക്കാനും അന്തസ്സ് സംരക്ഷിക്കാനും സഹായിക്കണമെന്നും അദ്ദേഹം വ്യക്തമാക്കി.

ഉച്ചകോടിക്കിടെ യുഎസ് പ്രസിഡന്റ് ഡൊണാൾഡ് ട്രംപുമായി പ്രധാനമന്ത്രി കൂടിക്കാഴ്ച നടത്തി. പശ്ചിമേഷ്യയിൽ സമാധാനം പുനഃസ്ഥാപിക്കാനും സംഘർഷം അവസാനിപ്പിക്കാനും ട്രംപ് നടത്തുന്ന ശ്രമങ്ങളെ മോദി പ്രശംസിച്ചു. ഹോർമുസ് കടലിടുക്കിലെ തടസ്സമില്ലാത്ത വാണിജ്യവും നാവിക സ്വാതന്ത്ര്യവും നിലനിർത്തേണ്ടതിന്റെ പ്രാധാന്യവും ഇരുനേതാക്കളും ചർച്ച ചെയ്തു.

2025 ഫെബ്രുവരിയിലെ കൂടിക്കാഴ്ചയ്ക്ക് ശേഷം ഇന്ത്യ-യുഎസ് കോംപാക്റ്റ് (COMPACT) കരാറിന് കീഴിലുണ്ടായ പുരോഗതി ഇരുനേതാക്കളും വിലയിരുത്തി. പ്രതിരോധം, തന്ത്രപ്രധാന സാങ്കേതികവിദ്യകൾ, ഊർജ്ജം, ഉഭയകക്ഷി വ്യാപാരം എന്നീ മേഖലകളിലെ വികസനത്തെ അവർ സ്വാഗതം ചെയ്തു. ഇടക്കാല ഉഭയകക്ഷി വ്യാപാര കരാറിലെ ചർച്ചകളിൽ കൈവരിച്ച പുരോഗതിയിൽ ഇരുനേതാക്കളും സംതൃപ്തി പ്രകടിപ്പിക്കുകയും, ഇത് വേഗത്തിൽ പൂർത്തിയാക്കാൻ ഉദ്യോഗസ്ഥർക്ക് നിർദ്ദേശം നൽകുകയും ചെയ്തു. യുഎസ് വ്യാപാര പ്രതിനിധി ജാമിസൺ ഗ്രീർ അടുത്ത ആഴ്ച ഇതിനായി ഇന്ത്യ സന്ദർശിക്കും. ഇന്ത്യ-യുഎസ് സമഗ്ര ആഗോള തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്താനുള്ള പ്രതിജ്ഞാബദ്ധത പ്രധാനമന്ത്രി മോദിയും പ്രസിഡന്റ് ട്രംപും വീണ്ടും ആവർത്തിച്ചു.

---------------

Hindusthan Samachar / Roshith K