Thiruvananthapuram, 18 ജൂണ് (H.S.)

തിരുവനന്തപുരം: കേരളത്തിൽ അധികാരമേറ്റ യുഡിഎഫ് സർക്കാരിന്റെ ആദ്യ ബജറ്റ് നാളെ നിയമസഭയിൽ അവതരിപ്പിക്കും. ധനകാര്യ വകുപ്പിന്റെ ചുമതല കൂടിയുള്ള മുഖ്യമന്ത്രി വി ഡി സതീശനാണ് പുതുക്കിയ ബജറ്റ് സഭയിൽ സമർപ്പിക്കുക. തിരഞ്ഞെടുപ്പ് വേളയിൽ മുന്നണി മുന്നോട്ടുവെച്ച വൻ പ്രഖ്യാപനങ്ങളും ജനപ്രിയ ഗ്യാരണ്ടികളും ബജറ്റിൽ ഇടംപിടിക്കുമോ എന്നാണ് ഇപ്പോൾ കേരളസമൂഹം ഉറ്റുനോക്കുന്നത്. കടുത്ത സാമ്പത്തിക പ്രതിസന്ധികൾക്കിടയിലും ക്ഷേമപ്രവർത്തനങ്ങളും നാടിന്റെ അടിസ്ഥാന സൗകര്യവികസനവും ഒരുമിച്ച് കൊണ്ടുപോകുകയെന്ന പ്രഖ്യാപിത നയത്തിനാകും യുഡിഎഫ് സർക്കാർ ഈ ബജറ്റിലൂടെ തുടക്കമിടുക.

ക്ഷേമപെൻഷൻ വർധനവും ഗ്യാരണ്ടികളും

യുഡിഎഫിന്റെ തിരഞ്ഞെടുപ്പ് പ്രചാരണങ്ങളിലെ പ്രധാന വാഗ്ദാനങ്ങളിലൊന്നായിരുന്നു സാമൂഹ്യ ക്ഷേമപെൻഷനുകളുടെ വർധനവ്. നിലവിലുള്ള പെൻഷൻ തുക വർധിപ്പിക്കുന്നതിനൊപ്പം അത് കൃത്യസമയത്ത് ഗുണഭോക്താക്കളിൽ എത്തിക്കാനുള്ള കൃത്യമായ പദ്ധതികൾ നാളത്തെ ബജറ്റിൽ ഉണ്ടാകുമെന്നാണ് കരുതപ്പെടുന്നത്. ഇതോടൊപ്പം സാധാരണക്കാരായ ജനങ്ങൾക്ക് ആശ്വാസം പകരുന്ന മറ്റ് ചില ഗ്യാരണ്ടികളും ധനമന്ത്രി കൂടിയായ മുഖ്യമന്ത്രി പ്രഖ്യാപിച്ചേക്കും.

വികസനവും ജനക്ഷേമവും ഒരുമിച്ച്

അടിസ്ഥാന സൗകര്യവികസന മേഖലയിൽ വലിയ കുതിച്ചുചാട്ടം ലക്ഷ്യമിടുമ്പോൾ തന്നെ പാവപ്പെട്ടവന്റെ കണ്ണീരൊപ്പുന്ന ക്ഷേമപദ്ധതികൾക്ക് തുല്യ പ്രാധാന്യം നൽകുമെന്നാണ് സർക്കാരിന്റെ നയം. കൊച്ചി മെട്രോയുടെ അടുത്ത ഘട്ടങ്ങളിലേക്കുള്ള വികസനവും മറ്റ് നഗരങ്ങളിലെ യാത്രാസൗകര്യങ്ങൾ മെച്ചപ്പെടുത്തുന്നതിനുള്ള പദ്ധതികളും വികസന അജണ്ടയിൽ മുൻപന്തിയിലുണ്ട്. കൊച്ചി മെട്രോയ്ക്ക് പുറമെ തിരുവനന്തപുരം, കോഴിക്കോട് ലൈറ്റ് മെട്രോ പദ്ധതികൾ സംബന്ധിച്ച നിർണായക പ്രഖ്യാപനങ്ങളും നാളത്തെ ബജറ്റിൽ പ്രതീക്ഷിക്കുന്നുണ്ട്.

കർഷകർക്കും ആരോഗ്യമേഖലയ്ക്കും ഊന്നൽ

സംസ്ഥാനത്തെ കർഷക സമൂഹം നേരിടുന്ന പ്രതിസന്ധികൾക്ക് പരിഹാരം കാണാൻ ബജറ്റിൽ പ്രത്യേക പാക്കേജുകളോ ആനുകൂല്യങ്ങളോ ഉണ്ടായേക്കും. റബ്ബർ ഉൾപ്പെടെയുള്ള നാണ്യവിളകളുടെ തറവില വർധിപ്പിക്കുക, കാർഷിക കടങ്ങൾക്കുള്ള ഇളവുകൾ, കർഷക പെൻഷൻ എന്നിവയാണ് കർഷക സംഘടനകൾ പ്രധാനമായും ആവശ്യപ്പെടുന്നത്. ഇതോടൊപ്പം കോവിഡിന് ശേഷമുള്ള ആരോഗ്യപരിപാലന രംഗത്തെ വെല്ലുവിളികൾ നേരിടാൻ സർക്കാർ ആശുപത്രികളുടെ നവീകരണവും സേവന നിലവാരം ഉയർത്തലും ലക്ഷ്യമിട്ടുള്ള വലിയ പ്രഖ്യാപനങ്ങൾ ആരോഗ്യമേഖലയിലും ഉണ്ടായേക്കുമെന്നാണ് വിലയിരുത്തൽ.

കടുത്ത സാമ്പത്തിക പരിമിതികൾക്കുള്ളിൽ നിന്നുകൊണ്ട് വികസന കാഴ്ചപ്പാടുകൾ എങ്ങനെ നടപ്പിലാക്കുമെന്ന വലിയൊരു വെല്ലുവിളിയാണ് മുഖ്യമന്ത്രി വി ഡി സതീശന് മുന്നിലുള്ളത്. എങ്കിലും ജനങ്ങൾക്ക് നൽകിയ ഉറപ്പുകൾ പാലിച്ചുകൊണ്ട് തനതായൊരു വികസന മാതൃകയ്ക്ക് ഈ ആദ്യ ബജറ്റിലൂടെ സർക്കാർ അടിത്തറയിടുമെന്നാണ് അണികളും പൊതുജനങ്ങളും ഒരുപോലെ വിശ്വസിക്കുന്നത്. നാളെ രാവിലെ ഒൻപത് മണിയോടെയാണ് നിയമസഭയിൽ ബജറ്റ് അവതരണം ആരംഭിക്കുക.

---------------

Hindusthan Samachar / Roshith K