Thiruvananthapuram , 02 ജൂണ് (H.S.)

പതിനാറാം കേരള നിയമസഭയുടെ പുതിയ ഡെപ്യൂട്ടി സ്പീക്കറായി ഷാനിമോൾ ഉസ്മാൻ തെരഞ്ഞെടുക്കപ്പെട്ടു. യുഡിഎഫ് സ്ഥാനാർഥിയായ ഇവർ 99 വോട്ട് നേടിയാണ് വിജയം സ്വന്തമാക്കിയത്. പ്രതിപക്ഷമായ എൽഡിഎഫിൻ്റെ സ്ഥാനാർഥി മുഹമ്മദ് മുഹ്സിന് 34 വോട്ട് ലഭിച്ചു.

കേരള നിയമസഭയുടെ ചരിത്രത്തിലെ നാലാമത്തെ വനിതാ ഡെപ്യൂട്ടി സ്പീക്കറാണ് ഷാനിമോൾ ഉസ്മാൻ. 35 വർഷത്തിന് ശേഷമാണ് സംസ്ഥാനത്തിന് ഡെപ്യൂട്ടി സ്പീക്കറെ ലഭിക്കുന്നത്. അരൂർ എംഎൽഎയാണ് ഷാനിമോൾ ഉസ്മാൻ. പട്ടാമ്പിയിൽ നിന്നുള്ള സിപിഐ പ്രതിനിധിയാണ് എതിർ സ്ഥാനാർഥിയായ മുഹമ്മദ് മുഹ്സിൻ.

രാവിലെ നിയമസഭയിൽ പ്രത്യേക സമ്മേളനം ചേർന്നു. ഇതിൽ രഹസ്യ ബാലറ്റിലൂടെയാണ് വോട്ടെടുപ്പ് പൂർത്തിയാക്കിയത്. നിലവിലെ കണക്കുകൾ പ്രകാരം യുഡിഎഫിന് സഭയിൽ 102 എംഎൽഎമാരുടെ പിന്തുണയുണ്ട്. അതിനാൽ ഷാനിമോൾ ഉസ്മാൻ്റെ വിജയം നേരത്തെ തന്നെ ഉറപ്പിച്ചതായിരുന്നു. മുൻ തെരഞ്ഞെടുപ്പുകളിൽ നിന്ന് വ്യത്യസ്തമായി വലിയ സസ്പെൻസുകൾ ഉണ്ടായില്ല. വോട്ടെടുപ്പ് നടപടിക്രമങ്ങൾ രാവിലെ തന്നെ പൂർത്തിയായി.

യുഡിഎഫ് എംഎൽഎമാരായ ആബിദ് ഹുസൈൻ തങ്ങൾ, പാലക്കാട് എംഎൽഎ സന്ദീപ് വാര്യർ എന്നിവർ സഭയിൽ ഹാജരായില്ല. എൽഡിഎഫ് അംഗമായ സികെ ഹരീന്ദ്രനും വോട്ടെടുപ്പിൽ പങ്കെടുത്തില്ല. ബിജെപിയുടെ മൂന്ന് എംഎൽഎമാരും വോട്ടെടുപ്പിൽ നിന്ന് പൂർണമായും വിട്ടുനിന്നു. ബിജെപി അംഗങ്ങൾ സഭയിലുണ്ടായിരുന്നെങ്കിലും വോട്ട് ചെയ്യാൻ തയാറായില്ല. ചട്ടപ്രകാരം സഭാ സമ്മേളനം നിയന്ത്രിച്ചിരുന്ന സ്പീക്കർ തിരുവഞ്ചൂർ രാധാകൃഷ്ണനും വോട്ട് ചെയ്തില്ല. യുഡിഎഫിലെ രണ്ട് എംഎൽഎമാരും എൽഡിഎഫിലെ ഒരു എംഎൽഎയുമടക്കം മൂന്ന് പേർ സഭയിൽ എത്തിയിരുന്നില്ല.

ഇരിപ്പിടത്തിലേക്ക് ആനയിച്ചുവോട്ടെടുപ്പിന് ശേഷം പുതിയ ഡെപ്യൂട്ടി സ്പീക്കറെ ഔദ്യോഗികമായി ഇരിപ്പിടത്തിലേക്ക് ആനയിച്ചു. മുഖ്യമന്ത്രിയും പ്രതിപക്ഷ നേതാവും ചേർന്നാണ് ഡെപ്യൂട്ടി സ്പീക്കറെ സ്വീകരിച്ചത്. ഇതനുസരിച്ച് മുഖ്യമന്ത്രി വിഡി സതീശനും പ്രതിപക്ഷ നേതാവ് പിണറായി വിജയനും ഒരുമിച്ചെത്തി. ഇരുവരും ചേർന്ന് ഷാനിമോൾ ഉസ്മാനെ ഡെപ്യൂട്ടി സ്പീക്കറുടെ കസേരയിൽ ഇരുത്തി. ഭരണഘടനാപരമായ ഈ സുപ്രധാന പദവിയിലെത്തുന്നവർക്ക് വലിയ ബാധ്യതയുണ്ടെന്ന് നേതാക്കൾ ഓർമിപ്പിച്ചു. സഭയെ അതീവ നിഷ്പക്ഷമായി നിയന്ത്രിക്കണം. എല്ലാ അംഗങ്ങളോടും തുല്യനീതി കാണിക്കാൻ കഴിയണമെന്നും ആശംസിച്ചു. കഴിഞ്ഞ ദിവസം മുഖ്യമന്ത്രി വിഡി സതീശൻ അടക്കമുള്ള നേതാക്കളുടെ സാന്നിധ്യത്തിലാണ് ഷാനിമോൾ ഉസ്മാൻ നാമനിർദേശ പത്രിക നൽകിയത്. പ്രതിപക്ഷ നേതാവ് പിണറായി വിജയൻ, സിപിഐ നിയമസഭാ കക്ഷി നേതാവ് കെ രാജൻ എന്നിവരുടെ പിന്തുണയോടെയാണ് മുഹമ്മദ് മുഹ്സിനും പത്രിക സമർപ്പിച്ചത്.

നന്ദിപ്രമേയ ചർച്ച തുടങ്ങിപുതിയ ഡെപ്യൂട്ടി സ്പീക്കർ ചുമതലയേറ്റതിന് പിന്നാലെ നിയമസഭയിൽ നന്ദിപ്രമേയ ചർച്ചയ്ക്കും തുടക്കമായി. ഗവർണർ രാജേന്ദ്ര വിശ്വനാഥ് ആർലേക്കർ സഭയിൽ നടത്തിയ നയപ്രഖ്യാപന പ്രസംഗത്തിൻമേലാണ് ചർച്ച തുടങ്ങിയത്. യുഡിഎഫ് സർക്കാരിൻ്റെ പുതിയ വികസന കാഴ്ചപ്പാടുകളും ക്ഷേമപദ്ധതികളും ഗവർണറുടെ പ്രസംഗത്തിലുണ്ടായിരുന്നു. വരുംദിവസങ്ങളിൽ നിയമസഭ വലിയ വാഗ്വാദങ്ങൾക്ക് വേദിയാകുമെന്ന് ഉറപ്പാണ്. പ്രതിപക്ഷ നേതാവ് പിണറായി വിജയൻ്റെ തിരുവനന്തപുരത്തെ വാടക വീട്ടിൽ ഇഡി കഴിഞ്ഞ ദിവസം മിന്നൽ പരിശോധന നടത്തിയിരുന്നു. എൻഫോഴ്സ്മെൻ്റ് ഡയറക്ടറേറ്റ് നടപടി സഭയിൽ ശക്തമായി ഉന്നയിക്കാൻ പ്രതിപക്ഷം തീരുമാനിച്ചിട്ടുണ്ട്. ഇതുസംബന്ധിച്ച് അടിയന്തര പ്രമേയം കൊണ്ടുവരാനും എൽഡിഎഫ് തീരുമാനിച്ചു. കേന്ദ്ര ഏജൻസികളെ ഉപയോഗിച്ച് പ്രതിപക്ഷ നേതാക്കളെ വേട്ടയാടുന്നു എന്നാണ് ഇടതുപക്ഷത്തിൻ്റെ പ്രധാന ആരോപണം.

സംസ്ഥാനത്തെ രൂക്ഷമായ വിലക്കയറ്റം സർക്കാരിനെതിരെ പ്രശ്നമായി പ്രതിപക്ഷം ഉന്നയിക്കും. പൊലീസിൻ്റെ വീഴ്ചകൾ, ക്രമസമാധാന പ്രശ്നങ്ങൾ തുടങ്ങിയവയും സഭയിൽ ഉയർത്തിക്കൊണ്ടുവരും. മുഖ്യമന്ത്രി വിഡി സതീശൻ്റെ നേതൃത്വത്തിലുള്ള യുഡിഎഫ് സർക്കാർ ഈ ആരോപണങ്ങളെ ശക്തമായി നേരിടും. രാഷ്ട്രീയ വിവാദങ്ങൾക്ക് പുറമെ ജനകീയ പ്രശ്നങ്ങൾക്ക് പരമാവധി പ്രാധാന്യം നൽകുമെന്നും മുഖ്യമന്ത്രി വ്യക്തമാക്കി. സഭാ നടപടികൾ വേഗത്തിൽ മുന്നോട്ട് കൊണ്ടുപോകുമെന്നും മുഖ്യമന്ത്രി ഭരണകക്ഷി അംഗങ്ങൾക്ക് ഉറപ്പുനൽകി. പ്രതിപക്ഷ നീക്കങ്ങളെ സഭയിൽ ശക്തമായി പ്രതിരോധിക്കാൻ ഭരണപക്ഷം തീരുമാനിച്ചിട്ടുണ്ട്. ഭരണപക്ഷത്തിൻ്റെ ഈ തീരുമാനത്തിൻ്റെ അടിസ്ഥാനത്തിൽ കൂടിയാണ് സഭാനടപടികൾ പുരോഗമിക്കുന്നത്.

---------------

Hindusthan Samachar / CHANDHU CHANDRASEKHAR