Newdelhi , 02 ജൂണ് (H.S.)

ന്യൂഡൽഹി: ഇന്ത്യയിലെ യുവജനങ്ങൾക്കിടയിൽ തരംഗമായി മാറിയ ജനകീയ കൂട്ടായ്മയായ 'കോക്രോച്ച് ജന്റാ പാർട്ടി' (CJP) പുതിയ രാഷ്ട്രീയ നീക്കങ്ങളിലേക്ക്. രാജ്യത്തെ ഞെട്ടിച്ചുകൊണ്ട് ഒരു പ്രമുഖ വ്യക്തി ഉടൻ തന്നെ കോക്രോച്ച് ജന്റാ പാർട്ടിയിൽ ചേരുമെന്ന് പാർട്ടി ഔദ്യോഗികമായി അറിയിച്ചു. എന്നാൽ ഈ വ്യക്തി ആരാണെന്നത് സംബന്ധിച്ച യാതൊരു സൂചനയും വെളിപ്പെടുത്താൻ സിജെപി നേതൃത്വം ഇതുവരെ തയ്യാറായിട്ടില്ല. ഇത് സംബന്ധിച്ചുള്ള സസ്പെൻസ് നിലനിർത്തിക്കൊണ്ടുതന്നെ, കേന്ദ്ര സർക്കാരിനെതിരെ ശക്തമായ തെരുവ് യുദ്ധത്തിന് ഒരുങ്ങുകയാണ് പാർട്ടി.

ദേശീയ തലത്തിൽ വലിയ വിവാദമായി മാറിയ നീറ്റ് (NEET) പരീക്ഷാ ക്രമക്കേടുകളിലും ചോദ്യപേപ്പർ ചോർച്ചയിലും പ്രതിഷേധിച്ചാണ് കോക്രോച്ച് ജന്റാ പാർട്ടി കേന്ദ്രത്തിനെതിരെ തിരിയുന്നത്. പരീക്ഷാ നടത്തിപ്പിലെ വൻ വീഴ്ചയുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ അടിയന്തരമായി രാജിവെക്കണമെന്നാണ് പാർട്ടിയുടെ പ്രധാന ആവശ്യം. ഈ ആവശ്യം ഉന്നയിച്ച് രാജ്യതലസ്ഥാനത്ത് വൻ പ്രക്ഷോഭ പരിപാടികൾ സംഘടിപ്പിക്കാനാണ് പാർട്ടി തീരുമാനം.

അമേരിക്കയിൽ നിന്നും ജൂൺ 6-ന് അഭിജിത് ദീപ്കെ ഡൽഹിയിലെത്തും

പ്രക്ഷോഭങ്ങൾക്ക് നേരിട്ട് നേതൃത്വം നൽകുന്നതിനായി കോക്രോച്ച് ജന്റാ പാർട്ടിയുടെ സ്ഥാപകനും പ്രമുഖ സോഷ്യൽ മീഡിയ സ്ട്രാറ്റജിസ്റ്റുമായ അഭിജിത് ദീപ്കെ ജൂൺ 6-ന് ഡൽഹിയിൽ എത്തും. നിലവിൽ അമേരിക്കയിലുള്ള അദ്ദേഹം ജൂൺ 6 ശനിയാഴ്ച രാവിലെ ഡൽഹി വിമാനത്താവളത്തിൽ ഇറങ്ങുമെന്നാണ് സോഷ്യൽ മീഡിയയിലൂടെ അറിയിച്ചിരിക്കുന്നത്.

ഡൽഹിയിൽ എത്തിയ ശേഷം പ്രവർത്തകരെയും വിദ്യാർത്ഥികളെയും ഒപ്പം കൂട്ടി പാർലമെന്റ് സ്ട്രീറ്റ് പോലീസ് സ്റ്റേഷനിലെത്തി ജന്തർ മന്തറിൽ സമാധാനപരമായി പ്രതിഷേധിക്കാനുള്ള അനുമതി തേടുമെന്ന് അഭിജിത് വ്യക്തമാക്കി. ലക്ഷക്കണക്കിന് വിദ്യാർത്ഥികളുടെ ഭാവി തുലാസിലാക്കിയ നീറ്റ് പരീക്ഷാ വിവാദത്തിൽ കേന്ദ്രമന്ത്രിയുടെ രാജിയിൽ കുറഞ്ഞതൊന്നും തങ്ങൾ സ്വീകരിക്കില്ലെന്നും, വ്യവസ്ഥിതിയെ ജനങ്ങളോട് മറുപടി പറയാൻ പ്രേരിപ്പിക്കേണ്ട സമയമാണിതെന്നും അദ്ദേഹം തന്റെ വീഡിയോ സന്ദേശത്തിൽ ആവശ്യപ്പെട്ടു.

ചീഫ് ജസ്റ്റിസിന്റെ വിവാദ പരാമർശങ്ങൾക്ക് മറുപടിയായി രൂപീകൃതമായ സിജെപി, ചുരുങ്ങിയ ദിവസങ്ങൾ കൊണ്ട് കോടിക്കണക്കിന് ഫോളോവേഴ്സിനെ നേടി രാജ്യത്തെ പ്രധാന രാഷ്ട്രീയ പാർട്ടികളെപ്പോലും അമ്പരപ്പിച്ചിരുന്നു. ഓൺലൈൻ ഇടങ്ങളിൽ മാത്രം ഒതുങ്ങിനിന്ന ഈ യുവജന മുന്നേറ്റം ഇപ്പോൾ ആദ്യമായി തെരുവിലേക്ക് ഇറങ്ങുകയാണ്. വിദ്യാഭ്യാസ മന്ത്രിയുടെ രാജി ആവശ്യപ്പെട്ടുള്ള ഓൺലൈൻ പെറ്റീഷനുകൾക്ക് പിന്നാലെ, ജൂൺ 6 മുതൽ ജന്തർ മന്തറിൽ ആരംഭിക്കുന്ന പ്രക്ഷോഭ പരിപാടികൾ ദേശീയ രാഷ്ട്രീയത്തിൽ പുതിയൊരു കൊടുങ്കാറ്റിന് വഴിവെക്കുമെന്നാണ് വിലയിരുത്തപ്പെടുന്നത്. വരും ദിവസങ്ങളിൽ പാർട്ടിയിലേക്ക് കടന്നുവരുന്ന ആ 'പ്രമുഖ വ്യക്തി' ആരായിരിക്കുമെന്നതിനെക്കുറിച്ചുള്ള ചർച്ചകളും സജീവമാണ്.

---------------

Hindusthan Samachar / Roshith K