Kannur, 20 ജൂണ് (H.S.)

കണ്ണൂർ: മർദനമേറ്റതിനേക്കാൾ വലിയ മാനസിക വേദന സമ്മാനിച്ചത് ആൺസുഹൃത്തിന്റെ മോശം വാക്കുകളായിരുന്നുവെന്ന് തെളിയിക്കുന്ന വിവരങ്ങൾ പുറത്ത്. കണ്ണൂർ പാനൂർ സ്വദേശിയും കോളേജ് അധ്യാപികയുമായ ആദിത്യ (28) ജീവനൊടുക്കിയ സംഭവത്തിൽ ആൺസുഹൃത്ത് ശരണിനെ പോലീസ് അറസ്റ്റ് ചെയ്തു. ആദിത്യയെ നിരന്തരം ശാരീരികമായും മാനസികമായും പീഡിപ്പിച്ചതിനും ആത്മഹത്യാ പ്രേരണയ്ക്കുമാണ് മൊകേരി വള്ളങ്ങാട് സ്വദേശിയായ ശരണിനെതിരെ പാനൂർ പോലീസ് കേസെടുത്തിരിക്കുന്നത്.

സംശയവും മാനസിക പീഡനവും

ആദിത്യയുടെ മറ്റു സൗഹൃദങ്ങളിൽ ശരണിന് കടുത്ത സംശയമുണ്ടായിരുന്നു. ഈ സംശയമാണ് പിന്നീട് ക്രൂരമായ മർദനത്തിലേക്കും അപവാദ പ്രചാരണങ്ങളിലേക്കും വഴിമാറിയത്. ആദിത്യയെ പരസ്യമായി മർദിച്ചിരുന്നതായി പ്രതി ശരൺ പോലീസിന് മൊഴി നൽകിയിട്ടുണ്ട്. തലശ്ശേരി പഴയ ബസ് സ്റ്റാൻഡിന് സമീപത്തുവെച്ച് ഇയാൾ ആദിത്യയെ ക്രൂരമായി മർദിച്ചതിന്റെ സിസിടിവി ദൃശ്യങ്ങളും പോലീസിന് ലഭിച്ചിട്ടുണ്ട്. എന്നാൽ ശാരീരികമായ മർദനത്തേക്കാൾ ആദിത്യയെ തളർത്തിയത് തന്നെ മോശക്കാരിയാക്കി ചിത്രീകരിക്കാനുള്ള ശരണിന്റെ ശ്രമങ്ങളായിരുന്നു.

ആദിത്യയെക്കുറിച്ച് തികച്ചും അപകീർത്തികരവും മോശവുമായ സന്ദേശങ്ങൾ ശരൺ യുവതിയുടെ കുടുംബാംഗങ്ങൾക്ക് അയച്ചിരുന്നു. തന്റെ സ്വഭാവത്തെയും വ്യക്തിത്വത്തെയും ഹനിക്കുന്ന തരത്തിൽ പ്രിയപ്പെട്ടവർക്ക് മുന്നിൽ ശരൺ നടത്തിയ ഈ സൈബർ ആക്രമണവും മോശം വാക്കുകളും ആദിത്യയ്ക്ക് കടുത്ത മനോവിഷമം ഉണ്ടാക്കി. ഈ മാനസികാഘാതം താങ്ങാനാകാതെയാണ് യുവതി വീട്ടിൽ വെച്ച് ജീവനൊടുക്കാൻ ശ്രമിച്ചത്. തുടർന്ന് കണ്ണൂരിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെയായിരുന്നു മരണം സംഭവിച്ചത്. മരണത്തിന് മുൻപ് ആദിത്യ അമ്മയോട് പറഞ്ഞ വാക്കുകൾ കേസിൽ നിർണായക തെളിവായി മാറിയിട്ടുണ്ട്.

വിവാഹാലോചനയിൽ തുടങ്ങിയ ബന്ധം

പത്തു മാസം മുൻപ് വിവാഹാലോചനയുമായി ബന്ധപ്പെട്ടാണ് ശരൺ ആദിത്യയുടെ കുടുംബത്തെ സമീപിക്കുന്നത്. എന്നാൽ പൊരുത്തക്കേടുകൾ കാരണം ആദിത്യയുടെ വീട്ടുകാർ ഈ വിവാഹാലോചനയുമായി മുന്നോട്ട് പോയില്ല. എന്നാൽ വിവാഹം ഉപേക്ഷിച്ചെങ്കിലും, ആദിത്യയെ വിവാഹം കഴിക്കണമെന്ന കടുത്ത ഉദ്ദേശത്തോടെ ശരൺ യുവതിയുമായി വീണ്ടും രഹസ്യമായി സൗഹൃദം സ്ഥാപിക്കുകയായിരുന്നു. പിന്നീട് ആദിത്യ ഈ ബന്ധത്തിൽ നിന്ന് പിന്മാറാൻ ശ്രമിച്ചപ്പോഴാണ് ഇയാൾ ഭീഷണിയുമായി രംഗത്തെത്തിയത്.

ആദിത്യയുടെ മരണത്തിന് പിന്നാലെ ഒളിവിൽ പോയ പ്രതിയെ മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പോലീസ് പിടികൂടിയത്. പ്രതിക്കെതിരെ ആത്മഹത്യാ പ്രേരണ ഉൾപ്പെടെയുള്ള കടുത്ത വകുപ്പുകൾ ചുമത്തിയിട്ടുണ്ട്. സംഭവത്തിൽ ഡിജിറ്റൽ തെളിവുകൾ ഉൾപ്പെടെ ശേഖരിച്ച് വിശദമായ അന്വേഷണം നടത്തിവരികയാണെന്ന് പാനൂർ പോലീസ് അറിയിച്ചു.

---------------

Hindusthan Samachar / Roshith K