Kochi , 21 ജൂണ് (H.S.)

മലയാള സിനിമയിലെ അഭിനേതാക്കളുടെ സംഘടനയായ ‘അമ്മ’യിൽ (Association of Malayalam Movie Artistes) വീണ്ടും വൻ പ്രതിസന്ധി. കടുത്ത ആഭ്യന്തര തർക്കങ്ങൾക്കും നാടകീയ നീക്കങ്ങൾക്കുമൊടുവിൽ പ്രസിഡന്റ് ശ്വേത മേനോന്റെ നേതൃത്വത്തിലുള്ള 17 അംഗ ഭരണസമിതി കൂട്ടത്തോടെ രാജിവച്ചു. കൊച്ചിയിൽ നടന്ന വാർഷിക ജനറൽ ബോഡി യോഗത്തിൽ ഭരണസമിതിക്കെതിരെ ഉയർന്ന അവിശ്വാസ പ്രമേയവും വരവുചെലവ് കണക്കുകളെച്ചൊല്ലിയുള്ള വാദപ്രതിവാദങ്ങളുമാണ് ഒടുവിൽ കൂട്ടരാജാവിയിലേക്ക് വഴിതുറന്നത്. സംഘടനയുടെ താൽക്കാലിക പ്രവർത്തനങ്ങൾക്കായി പുതിയ അഡ്ഹോക് കമ്മിറ്റി രൂപീകരിക്കാനും യോഗത്തിൽ തീരുമാനമായി.

വരവുചെലവ് കണക്കുകളിൽ തർക്കം; പൊട്ടിത്തെറിയോടെ ജനറൽ ബോഡി

ഞായറാഴ്ച രാവിലെ നടൻ മോഹൻലാൽ ഉദ്ഘാടനം ചെയ്ത ജനറൽ ബോഡി യോഗം തുടക്കം മുതൽക്കേ അശാന്തമായിരുന്നു. ജനറൽ സെക്രട്ടറി കുക്കു പരമേശ്വരൻ അവതരിപ്പിച്ച വാർഷിക റിപ്പോർട്ടിലെയും വരവുചെലവ് കണക്കുകളിലെയും വ്യക്തതക്കുറവ് ചൂണ്ടിക്കാട്ടി പ്രമുഖ താരങ്ങൾ ഉൾപ്പെടെയുള്ള ഒരു വിഭാഗം രംഗത്തെത്തിയതാണ് തർക്കങ്ങൾക്ക് കാരണമായത്. മുൻ സമിതിയുടെ കാലത്തെ സാമ്പത്തിക ഇടപാടുകളിലെ പിഴവുകളും നിലവിലെ ഭരണസമിതിയുടെ പ്രവർത്തന വീഴ്ചകളും യോഗത്തിൽ കടുത്ത വിമർശനങ്ങൾക്ക് കാരണമായി.

ഒരു ഘട്ടത്തിൽ തർക്കം അതിരുകടന്നതോടെ, സംഘടനയുടെ പേര് പൊതുസമൂഹത്തിന് മുന്നിൽ മോശമാവുകയാണെന്ന് കാണിച്ച് ഭരണസമിതി പിരിച്ചുവിടണമെന്ന് അംഗങ്ങൾ ആവശ്യപ്പെട്ടു. ഇതിന് പിന്നാലെയാണ് വേദിയിൽ വച്ച് തന്നെ താൻ രാജിവെക്കുകയാണെന്ന് പ്രസിഡന്റ് ശ്വേത മേനോൻ പ്രഖ്യാപിച്ചത്. തുടർന്ന് എക്സിക്യൂട്ടീവ് കമ്മിറ്റിയിലെ മറ്റ് അംഗങ്ങളും ഒന്നിച്ച് രാജിക്കത്ത് നൽകുകയായിരുന്നു.

ശ്വേത മേനോൻ ‘അമ്മ’യുടെ പ്രാഥമിക അംഗത്വവും രാജിവച്ചു

ഞാൻ ആരുടെയും കൈപ്പാവയായി ഇരിക്കാൻ ആഗ്രഹിക്കുന്നില്ല, സംഘടനയിൽ നിന്ന് പൂർണ്ണമായി പടിയിറങ്ങുകയാണ്.

— ശ്വേത മേനോൻ

പ്രസിഡന്റ് സ്ഥാനം ഒഴിഞ്ഞതിന് പിന്നാലെ ‘അമ്മ’യുടെ പ്രാഥമിക അംഗത്വത്തിൽ നിന്നും താൻ രാജിവെച്ചതായി ശ്വേത മേനോൻ മാധ്യമങ്ങളോട് വ്യക്തമാക്കി. നിലവിലെ ഭരണസമിതിയുടെ കാലത്തെ കണക്കുകൾ കൃത്യമാണെന്നും മുൻ കമ്മിറ്റിയുടെ കാലത്തെ പിഴവുകളാണ് ഇപ്പോഴത്തെ പ്രതിസന്ധിക്ക് കാരണമെന്നും ശ്വേത ആരോപിച്ചു.

അഡ്ഹോക് കമ്മിറ്റി ചുമതലയിലേക്ക്; അടുത്ത തിരഞ്ഞെടുപ്പ് ഉടൻ

ഭരണസമിതി ഒഴിഞ്ഞ സാഹചര്യത്തിൽ ‘അമ്മ’യുടെ ദൈനംദിന പ്രവർത്തനങ്ങൾ തടസ്സപ്പെടാതിരിക്കാൻ അടിയന്തരമായി അഡ്ഹോക് (താൽക്കാലിക) കമ്മിറ്റി രൂപീകരിച്ചു. നടൻ രമേശ് പിഷാരടിയുടെ നേതൃത്വത്തിലുള്ള ഒൻപതംഗ താൽക്കാലിക സമിതിയായിരിക്കും ഇനി സംഘടനയുടെ ഭരണം നിയന്ത്രിക്കുക.

താൽക്കാലിക സമിതിയിലെ മറ്റ് അംഗങ്ങൾ:

-

ജഗദീഷ്

-

കെ.ബി. ഗണേഷ് കുമാർ

-

സുരേഷ് കൃഷ്ണ

-

സിദ്ദിഖ്

-

റോണി ഡേവിഡ്

-

കൃഷ്ണപ്രഭ

-

ആശാ അരവിന്ദ്

-

പാഷാണം ഷാജി, ദേവി ചന്ദന

അടുത്ത ആറ് മാസത്തിനുള്ളിൽ സംഘടനയിൽ പുതിയ തിരഞ്ഞെടുപ്പ് നടത്തി പുതിയ ഭരണസമിതിയെ കണ്ടെത്താനാണ് നിലവിലെ തീരുമാനം. തിരഞ്ഞെടുപ്പ് എന്ന് നടത്തണം എന്നത് സംബന്ധിച്ച തീയതി ഉടൻ പ്രഖ്യാപിക്കും.

ചരിത്രപരമായ ഭരണസമിതിയുടെ അകാല ചരമം

2025 ഓഗസ്റ്റിലാണ് മോഹൻലാൽ ഒഴിഞ്ഞ നേതൃത്വത്തിലേക്ക് ശ്വേത മേനോന്റെ പാനൽ തിരഞ്ഞെടുക്കപ്പെടുന്നത്. ‘അമ്മ’യുടെ ചരിത്രത്തിൽ ആദ്യമായി പ്രസിഡന്റ്, ജനറൽ സെക്രട്ടറി എന്നീ രണ്ട് പ്രധാന പദവികളിലും സ്ത്രീകൾ (ശ്വേത മേനോൻ, കുക്കു പരമേശ്വരൻ) എത്തിയെന്ന പ്രത്യേകത ഈ സമിതിക്കുണ്ടായിരുന്നു. എന്നാൽ ഒരു വർഷം പോലും തികയ്ക്കാൻ സാധിക്കാതെ, വെറും 310 ദിവസത്തെ ഭരണത്തിന് ശേഷമാണ് ഈ സമിതി നാടകീയമായി പടിയിറങ്ങുന്നത്.

---------------

Hindusthan Samachar / Roshith K