Kolkota, 21 ജൂണ് (H.S.)

കൊൽക്കത്ത: പന്ത്രണ്ടാമത് അന്താരാഷ്ട്ര യോഗ ദിനത്തിൽ ലോകത്തിന് മാതൃകയായി പ്രധാനമന്ത്രി നരേന്ദ്ര മോദി പശ്ചിമ ബംഗാളിലെ കൊൽക്കത്തയിൽ യോഗാഭ്യാസത്തിന് നേതൃത്വം നൽകി. കൊൽക്കത്തയിലെ ചരിത്രപ്രസിദ്ധമായ റെഡ് റോഡിൽ നടന്ന വിപുലമായ ചടങ്ങിൽ മുപ്പതിനായിരത്തോളം വരുന്ന ജനങ്ങൾക്കൊപ്പം പ്രധാനമന്ത്രിയും യോഗാസനങ്ങൾ പങ്കിട്ടു. 'ആരോഗ്യകരമായ വാർദ്ധക്യത്തിന് യോഗ' (Yoga for Healthy Ageing) എന്നതായിരുന്നു 2026-ലെ അന്താരാഷ്ട്ര യോഗ ദിനത്തിന്റെ ഔദ്യോഗിക പ്രമേയം. ശാരീരികക്ഷമത നിലനിർത്താനും മാനസിക ഉല്ലാസം ഉറപ്പാക്കാനും യോഗയെ ഒരു ജീവിതചര്യയാക്കി മാറ്റേണ്ടതിന്റെ പ്രാധാന്യമാണ് ഈ വർഷത്തെ പ്രമേയം അടിവരയിടുന്നത്.

ഭാരതത്തിന്റെ ആത്മീയ പാരമ്പര്യത്തിൽ ബംഗാളിനുള്ള പങ്കിനെ പ്രകീർത്തിച്ചുകൊണ്ടാണ് പ്രധാനമന്ത്രി ചടങ്ങിനെ അഭിസംബോധന ചെയ്തത്. ലോകത്തിന് യോഗയെ പരിചയപ്പെടുത്തിയ രാമകൃഷ്ണ പരമഹംസർ, സ്വാമി വിവേകാനന്ദൻ, ലാഹിരി മഹാശയ തുടങ്ങിയ മഹത്തുക്കളുടെ പുണ്യഭൂമിയാണ് ബംഗാളെന്നും ഇവിടെവച്ച് സമൂഹയോഗയിൽ പങ്കെടുക്കാൻ കഴിഞ്ഞത് സമാനതകളില്ലാത്ത ആത്മീയ അനുഭവമാണെന്നും അദ്ദേഹം പറഞ്ഞു. യോഗയെ വെറുമൊരു ഒരു ദിവസത്തെ പരിപാടിയായി ഒതുക്കാതെ വർഷം മുഴുവൻ നീണ്ടുനിൽക്കുന്ന ശീലമാക്കണമെന്നും 'യോഗ 365' എന്ന പദ്ധതിയിലൂടെ ഇതിനായുള്ള പ്രവർത്തനങ്ങൾ സർക്കാർ ഉറപ്പാക്കുമെന്നും മോദി കൂട്ടിച്ചേർത്തു. 30 വയസ്സിലുണ്ടായിരുന്നതിനേക്കാൾ ഊർജ്ജസ്വലതയോടെ 50-ാം വയസ്സിലും, 20 വയസ്സിലുണ്ടായിരുന്നതിനേക്കാൾ ഫ്ലെക്സിബിലിറ്റിയോടെ 40-ാം വയസ്സിലും ജീവിക്കാൻ യോഗ മനുഷ്യനെ പ്രാപ്തനാക്കുമെന്നും പ്രധാനമന്ത്രി ഓർമ്മിപ്പിച്ചു.

രാജ്യത്തിന്റെ വിവിധ ഭാഗങ്ങളിലും വിദേശത്തുള്ള ഇന്ത്യൻ എംബസികളുടെ നേതൃത്വത്തിലും വിപുലമായ രീതിയിലാണ് ഇത്തവണ യോഗ ദിനം ആഘോഷിച്ചത്. ഡൽഹിയിൽ കരസേനാ മേധാവിയായി നിയമിതനായ ലഫ്റ്റനന്റ് ജനറൽ ധീരജ് സേത്ത് യോഗ സെഷനുകൾക്ക് നേതൃത്വം നൽകിയപ്പോൾ, ലഡാക്കിലെ പാംഗോങ് ത്സോ തടാകക്കരയിൽ കഠിനമായ തണുപ്പിനെ അവഗണിച്ച് ഐ.ടി.ബി.പി (ITBP) സൈനികർ യോഗാസനങ്ങൾ ചെയ്തത് ശ്രദ്ധേയമായി. ഗുജറാത്തിലെ വഡോദരയിൽ അക്വാ യോഗയും (വെള്ളത്തിനടിയിലെ യോഗ) ഈ യോഗ ദിനത്തിലെ പ്രധാന ആകർഷണങ്ങളിൽ ഒന്നായിരുന്നു. ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു, ഉത്തർപ്രദേശ് മുഖ്യമന്ത്രി യോഗി ആദിത്യനാഥ്, രാജസ്ഥാൻ മുഖ്യമന്ത്രി ഭജൻലാൽ ശർമ്മ തുടങ്ങിയ പ്രമുഖരും അതത് സംസ്ഥാനങ്ങളിലെ ചടങ്ങുകളിൽ പങ്കെടുത്തു. ലോകമെമ്പാടുമുള്ള 2500-ലധികം വേദികളിലാണ് ഇത്തവണ ഭാരതീയ യോഗാഭ്യാസത്തിന്റെ പ്രാധാന്യം വിളിച്ചോതിക്കൊണ്ട് ആഗോളതലത്തിൽ കൂട്ടായ്മകൾ സംഘടിപ്പിച്ചത്.

---------------

Hindusthan Samachar / Roshith K