Ernakulam , 22 ജൂണ് (H.S.)

മലയാള സിനിമയിലെ അഭിനേതാക്കളുടെ സംഘടനയായ അമ്മയിലെ പ്രശ്നങ്ങള് ഭാരവാഹികളുടെ രാജിക്ക് ശേഷവും രൂക്ഷമാകുന്നു.

പ്രസിഡന്റ് സ്ഥാനത്ത് നിന്ന് രാജി വെച്ചതിന് പിന്നാലെ ശ്വേതാ മേനോന് സംഘടനയുടെ പ്രാഥമിക അംഗത്വത്തില് നിന്നും പോലും രാജിവെക്കാനിടയായത് നടന് ബാബുരാജ് നടത്തിയ വ്യക്തിയധിക്ഷേപമാണെന്നാണ് വിവരം. ശ്വേതയുമായി അടുത്ത വൃത്തങ്ങളെ ഉദ്ധരിച്ച് ഏഷ്യാനെറ്റ് ഓണ്ലൈന് ആണ് ഇത് സംബന്ധിച്ച വാര്ത്ത റിപ്പോര്ട്ട് ചെയ്യുന്നത്.

ശ്വേത പണം വാങ്ങി എന്ന ആരോപണമാണ് ബാബുരാജ് ഉന്നയിച്ചത്. നിയമസഭാ തിരഞ്ഞെടുപ്പില് ബിജെപിക്ക് സ്ഥാനാര്ത്ഥിയെ ഉണ്ടാക്കി നല്കാന് ശ്വേതാ മേനോന് പണം വാങ്ങിയെന്ന് ബാബുരാജ് അമ്മ യോഗത്തില് ആരോപിച്ചു എന്നാണ് വിവരം. ആരോപണങ്ങള് കേട്ട് യോഗത്തില് വെച്ച് ശ്വേത വൈകാരികമായി പൊട്ടിത്തെറിച്ചു എന്നും താന് ഒരു രാഷ്ട്രീയ പാര്ട്ടിയുടെയും ഏജന്റല്ലെന്ന് വ്യക്തമാക്കി എന്നുമാണ് റിപ്പോര്ട്ട്.

തനിക്കെതിരെ ഉയര്ന്നത് പൂര്ണമായും വ്യാജമായ ആരോപണങ്ങളാണ്. ഇതിനെതിരെ കര്ശനമായ നിയമനടപടികള് സ്വീകരിക്കുമെന്നും ശ്വേത വ്യക്തമാക്കിയിട്ടുണ്ട്. സംഘടനയ്ക്കുള്ളിലെ ഗ്രൂപ്പ് പോരുകളും വ്യക്തിപരമായ ആക്ഷേപങ്ങളും അതിരുവിട്ടതോടെയാണ് അമ്മ പ്രാഥമികാംഗത്വം പോലും ശ്വേത മേനോന് രാജി വെച്ചത്. അതേസമയം രാജി വെച്ചതിന് പിന്നാലെ ബാബുരാജ് അടക്കമുള്ളവര്ക്കെതിരെ രൂക്ഷമായ പ്രതികരണമാണ് ശ്വേത നടത്തിയത്.

വലിയ ഗൂഢാലോചനയിലൂടെയും മുന്കൂട്ടി തയ്യാറാക്കിയ അജണ്ടയിലൂടെയുമാണ് താനടക്കമുള്ള ഭരണ സമിതിയെ പുറത്താക്കാന് ചിലര് ശ്രമിച്ചതെന്ന് ശ്വേത പറഞ്ഞു. കുറ്റാരോപിതരായ ചിലരുടെ കൈയിലേക്ക് സംഘടനയെ വീണ്ടും എത്തിക്കാനുള്ള നീക്കമാണ് ജനറല് ബോഡിയില് നടന്നത് എന്നും പാവയായി ഇരുന്നാല് മാത്രമേ സംഘടനയില് ഭരിക്കാന് പറ്റൂ എന്ന നില വന്നതിനാലാണ് വ്യക്തിത്വം പണയം വെക്കാതെ പടിയിറങ്ങുന്നതെന്നും ശ്വേത പറഞ്ഞിരുന്നു.

ഭരണസമിതിയിലെ ട്രഷറര് ഉണ്ണി ശിവപാല് ആരെയും അറിയിക്കാതെ മുങ്ങിയെന്നും അവര് ആരോപിച്ചു. കഴിഞ്ഞ ദിവസമാണ് അമ്മ എക്സിക്യൂട്ടീവ് കമ്മിറ്റി പിരിച്ചുവിട്ടത്. പ്രസിഡന്റ് ശ്വേത മേനോന്, സെക്രട്ടറി കുക്കു പരമേശ്വരന് എന്നിവര് അടങ്ങിയ കമ്മിറ്റിയാണ് പിരിച്ചുവിട്ടത്. അന്സിബ ഹസന് ഉയര്ത്തിയ പ്രശ്നങ്ങളില് കമ്മിറ്റിയ്ക്ക് പരിഹാരം കാണാന് കഴിയാത്തതും കമ്മിറ്റിയ്ക്ക് മറ്റ് അംഗങ്ങളുടെ വിശ്വാസം ആര്ജിക്കാന് സാധിക്കാത്തതുമായിരുന്നു കാരണം.

ഇന്നലെ നടന്ന ജനറല് ബോഡി യോഗത്തില് അവിശ്വാസ വോട്ടെടുപ്പിനും ശ്രമം നടന്നിരുന്നു. ഇതിന് മുന്പ് തന്നെ ശ്വേതയും കൂട്ടരും രാജി പ്രഖ്യാപിക്കുകയും കമ്മിറ്റി പിരിച്ചുവിടുകയുമായിരുന്നു. രമേഷ് പിഷാരടി എംഎല്എ അധ്യക്ഷനായ അഡ്ഹോക്ക് കമ്മിറ്റിയാണ് ഇനി അമ്മയിലെ കാര്യങ്ങള് നോക്കുക.

---------------

Hindusthan Samachar / CHANDHU CHANDRASEKHAR