Thiruvananthapuram , 22 ജൂണ് (H.S.)

തിരുവനന്തപുരം: പുതിയ യു.ഡി.എഫ് സര്ക്കാരിന്റെ ആദ്യ പുതുക്കിയ ബജറ്റിനെതിരെ നിയമസഭയില് കടുത്ത പരിഹാസവും വിമര്ശനവുമായി എല്.ഡി.എഫ് പ്രതിനിധി വി. ജോയ് എം.എൽ.എ. മുഖ്യമന്ത്രി വി.ഡി. സതീശൻ അവതരിപ്പിച്ച ബജറ്റ് വെറും വാക്കുകളുടെ കസറത്ത് മാത്രമാണെന്ന് അദ്ദേഹം കുറ്റപ്പെടുത്തി. പദപ്രയോഗങ്ങള് കൊണ്ട് വിസ്മയം തീര്ത്ത ഒരു ബജറ്റാണിതെന്നും, ആ 'വിസ്മയം' എന്ന വാക്കിന് താഴെ നമ്മൾ അടിവരയിട്ട് തന്നെ വായിക്കേണ്ടി വരുമെന്നും വി. ജോയ് നിയമസഭയില് പരിഹസിച്ചു.

കേരളത്തിന്റെ തീരദേശ മേഖലകളെ സ്വകാര്യ മേഖലയ്ക്ക് കൈമാറാനുള്ള ബജറ്റിലെ നിര്ദ്ദേശങ്ങള്ക്കു പിന്നില് വലിയ അഴിമതിയും നിഗൂഢമായ ഇടപാടുകളും (ഡീലുകള്) ഉണ്ടെന്നാണ് പ്രതിപക്ഷത്തിന്റെ ആരോപണം. ബജറ്റിലെ പ്രഖ്യാപനങ്ങളെ കോർത്തിണക്കി നിരവധി ചോദ്യങ്ങളാണ് വി. ജോയ് ഭരണപക്ഷത്തിന് നേരെ ഉയർത്തിയത്.

തീരദേശ ഡീലും മംഗലാപുരം ബന്ധവും: ചോദ്യങ്ങളുമായി വി. ജോയ്

ബജറ്റിൽ പ്രഖ്യാപിച്ച വലിയ പദ്ധതികൾക്ക് പിന്നിൽ അണിയറയിൽ നടന്ന ചില വിദേശ-സ്വദേശ ചർച്ചകൾ ഉണ്ടെന്ന് വി. ജോയ് ആരോപിച്ചു. യു.ഡി.എഫ് സർക്കാർ കൊണ്ടുവന്ന 'മിഷന് സമുദ്ര' അടക്കമുള്ള പദ്ധതികളുടെ മറവില് കേരളത്തിന്റെ തീരദേശം മൊത്തമായി തീറെഴുതി കൊടുക്കാനാണ് ശ്രമം നടക്കുന്നത്. ഇതിനായി നടന്ന ഡീലുകള്ക്ക് മംഗലാപുരവുമായി എന്തെങ്കിലും തരത്തിലുള്ള ബന്ധമുണ്ടോ എന്ന് വ്യക്തമാക്കാന് സര്ക്കാര് തയ്യാറാകണമെന്ന് വി. ജോയ് ആവശ്യപ്പെട്ടു.

ഇതിനുപുറമെ, സംസ്ഥാനത്ത് വലിയ രാഷ്ട്രീയ കോളിളക്കം സൃഷ്ടിച്ച ശബരിമല സ്വര്ണക്കൊള്ള കേസുമായി ബന്ധപ്പെട്ടും അദ്ദേഹം ഗുരുതരമായ ആരോപണം ഉന്നയിച്ചു. ശബരിമല സ്വര്ണക്കൊള്ള കേസില് പ്രത്യേക അന്വേഷണ സംഘം (SIT) ചോദ്യം ചെയ്ത ഒരു പ്രമുഖ വ്യക്തിയുമായി ഈ ബജറ്റിലെ പല ഡീലുകള്ക്കും ബന്ധമുണ്ടോ എന്നും വി. ജോയ് നിയമസഭയില് പരസ്യമായി ചോദ്യം ചെയ്തു. കടലോര പ്രദേശങ്ങള് സ്വകാര്യ നിക്ഷേപകര്ക്ക് വിട്ടുകൊടുക്കുന്നതിന് പിന്നില് ഇത്തരക്കാരുടെ ഇടപെടലുകളുണ്ടെന്ന സംശയമാണ് അദ്ദേഹം പ്രകടിപ്പിച്ചത്.

ക്ഷേമ പെൻഷനിൽ സ്വയം വിമർശനവും മുന്നറിയിപ്പും

ബജറ്റ് പ്രസംഗത്തിനിടെ ക്ഷേമ പെന്ഷന് വിഷയത്തില് സ്വന്തം മുന്നണിയുടെ വീഴ്ചകള് ചൂണ്ടിക്കാട്ടി വി. ജോയ് നടത്തിയ സ്വയം വിമര്ശനവും ശ്രദ്ധേയമായി. വാക്ക് പാലിക്കുന്ന കാര്യത്തില് യു.ഡി.എഫ് പരാജയമാണെന്ന് അദ്ദേഹം ഓർമ്മിപ്പിച്ചു.

ക്ഷേമ പെന്ഷന് 3000 രൂപയാക്കുമെന്ന് ജനങ്ങള്ക്ക് ഉറപ്പുനല്കിയ എല്.ഡി.എഫ് സർക്കാരിന് ഭരണത്തിന്റെ അവസാന കാലത്ത് പോലും അത് 2000 രൂപയായി മാത്രമേ ഉയര്ത്താന് കഴിഞ്ഞുള്ളൂ. ജനങ്ങള്ക്ക് നല്കിയ വാക്ക് പൂര്ണ്ണമായി പാലിക്കാന് കഴിയാതിരുന്നതുകൊണ്ടാണ് ഞങ്ങള് ഇന്ന് ഈ പ്രതിപക്ഷ നിരയില് ഇരിക്കേണ്ടി വന്നത്. ആ ഗതി നാളെ നിങ്ങള്ക്കും വരാം എന്ന് മറക്കരുത്.

— വി. ജോയ് എം.എൽ.എ

വാക്ക് വാക്കാണെന്ന് നിരന്തരം പറയുന്ന യു.ഡി.എഫ് സര്ക്കാര്, അധികാരത്തിലെത്തിയിട്ടും ക്ഷേമ പെന്ഷന് തുക കാര്യക്ഷമമായി വിതരണം ചെയ്യുന്നതിലും പ്രഖ്യാപനങ്ങള് നടപ്പിലാക്കുന്നതിലും വലിയ പരാജയമാണെന്ന് അദ്ദേഹം കൂട്ടിച്ചേര്ത്തു. വരും ദിവസങ്ങളിലും ഈ തീരദേശ-സ്വർണ്ണക്കൊള്ള ഇടപാട് ആരോപണങ്ങൾ സഭയ്ക്കുള്ളിലും പുറത്തും വലിയ രാഷ്ട്രീയ ചർച്ചകൾക്ക് വഴിതുറക്കുമെന്നുറപ്പാണ്.

---------------

Hindusthan Samachar / Roshith K