Kelakam, 23 ജൂണ് (H.S.)

കേളകം: മലയോര മേഖലയിൽ നിരന്തരം ഭീതി വിതയ്ക്കുന്ന പുലിയെ പിടികൂടാൻ ജനങ്ങളെയും തദ്ദേശ സ്വയംഭരണ സ്ഥാപനങ്ങളെയും ഏകോപിപ്പിച്ച് വനം വകുപ്പ് നടത്തുന്ന സജീവ ഇടപെടലുകൾക്ക് നാട്ടുകാരുടെ ഭാഗത്തുനിന്നും വലിയ പ്രശംസ. പേരാവൂർ റേഞ്ച് വനം വകുപ്പ് ഉദ്യോഗസ്ഥരുടെ നേതൃത്വത്തിലാണ് കേളകം ഗ്രാമപഞ്ചായത്തിന്റെയും പ്രദേശവാസികളുടെയും സഹകരണത്തോടെ പുലിയെ കണ്ടെത്താനും പിടികൂടാനുമുള്ള ഊർജിതമായ ശ്രമങ്ങൾ ആരംഭിച്ചിരിക്കുന്നത്. നിയമപരമായ നൂലാമാലകൾ മാറ്റിവെച്ച്, ജനങ്ങളുടെ ജീവനും സ്വത്തിനും സംരക്ഷണം നൽകാൻ ഉദ്യോഗസ്ഥർ കാട്ടുന്ന താല്പര്യമാണ് ഇപ്പോൾ കയ്യടി നേടുന്നത്.

മുൻകാലങ്ങളിൽ കേളകം, പേരാവൂർ തുടങ്ങിയ മലയോര മേഖലകളിൽ പുലി, കടുവ തുടങ്ങിയ വന്യമൃഗങ്ങളുടെ സാന്നിധ്യവും വളർത്തുമൃഗങ്ങൾക്ക് നേരെയുള്ള ആക്രമണങ്ങളും പതിവായിരുന്നു. എന്നാൽ അക്കാലങ്ങളിലൊക്കെ വനം വകുപ്പ് സ്വീകരിച്ചിരുന്ന നിസ്സംഗ നിലപാട് ജനങ്ങൾക്കിടയിൽ വലിയ പ്രതിഷേധത്തിന് കാരണമായിരുന്നു. വന്യമൃഗ ശല്യം രൂക്ഷമാകുമ്പോൾ കൂട് സ്ഥാപിക്കണമെന്നോ സിസിടിവി ക്യാമറകൾ വെച്ച് നിരീക്ഷിക്കണമെന്നോ നാട്ടുകാർ ആവശ്യപ്പെടുമ്പോൾ, സാങ്കേതിക തടസ്സങ്ങളും നിയമപരമായ പ്രശ്നങ്ങളും ചൂണ്ടിക്കാട്ടി ഒഴിഞ്ഞുമാറുന്ന രീതിയായിരുന്നു വനം വകുപ്പ് അധികൃതർ പയറ്റിപ്പോന്നിരുന്നത്.

ഇത്തരത്തിലുള്ള ഉദാസീനത മലയോര മേഖലകളിൽ വലിയ ജനകീയ സമരങ്ങൾക്കും വനം വകുപ്പ് ഓഫീസുകൾക്ക് നേരെ പ്രകടനങ്ങൾക്കും വഴിവെച്ചിട്ടുണ്ട്. പലപ്പോഴും ഉദ്യോഗസ്ഥരും നാട്ടുകാരും തമ്മിൽ കടുത്ത സംഘർഷാവസ്ഥ വരെ നിലനിന്നിരുന്ന ഒരു പശ്ചാത്തലമാണ് ഇവിടെ ഉണ്ടായിരുന്നത്. ജനങ്ങളുടെ പ്രതിഷേധം അതിരുകടക്കുമ്പോൾ മാത്രമാണ് താൽക്കാലികമായ എന്തെങ്കിലും നടപടികളിലേക്ക് വനം വകുപ്പ് കടന്നിരുന്നത്.

എന്നാൽ ഈ പഴയ രീതികളിൽ നിന്നെല്ലാം തികച്ചും വ്യത്യസ്തവും മാതൃകാപരവുമായ സമീപനമാണ് ഇപ്പോൾ പേരാവൂർ വനം വകുപ്പ് ഡിവിഷനിൽ നിന്നും ഉണ്ടാകുന്നത്. ജനങ്ങളുടെ ആശങ്ക പൂർണ്ണമായി ഉൾക്കൊണ്ടുകൊണ്ട്, കേളകം പഞ്ചായത്ത് ഭരണസമിതിയേയും നാട്ടുകാരെയും ഒരുമിച്ച് നിർത്തിയാണ് വനം വകുപ്പ് ഇപ്പോൾ പ്രതിരോധ പ്രവർത്തനങ്ങൾ ആസൂത്രണം ചെയ്യുന്നത്. പുലി ഇറങ്ങാൻ സാധ്യതയുള്ള മേഖലകളിൽ കാടുകൾ വെട്ടിത്തെളിക്കുന്നതിനും, നിരീക്ഷണ ക്യാമറകൾ അടിയന്തരമായി സ്ഥാപിക്കുന്നതിനും ഉദ്യോഗസ്ഥർ മുൻകൈ എടുക്കുന്നുണ്ട്.

ജനങ്ങളുടെ ജീവന് ഭീഷണിയാകുന്ന വന്യമൃഗങ്ങളെ പിടികൂടുന്ന കാര്യത്തിൽ നിയമങ്ങളുടെ പേര് പറഞ്ഞ് ഇനി കാലതാമസം വരുത്തില്ലെന്ന ഉറപ്പാണ് അധികൃതർ നൽകുന്നത്. വനം വകുപ്പിന്റെ ഈ പുതിയ ജനകീയ മുഖവും വേഗതയേറിയ പ്രവർത്തനങ്ങളും കേളകം മേഖലയിലെ കർഷകർക്കും സാധാരണക്കാർക്കും വലിയ ആശ്വാസമാണ് പകരുന്നത്. വരും ദിവസങ്ങളിലും ജനപങ്കാളിത്തത്തോടെയുള്ള ഈ തിരച്ചിലും പ്രതിരോധ പ്രവർത്തനങ്ങളും ശക്തമായി മുന്നോട്ട് കൊണ്ടുപോകാനാണ് അധികൃതരുടെ തീരുമാനം.

---------------

Hindusthan Samachar / Roshith K