Kottarakkara, 23 ജൂണ് (H.S.)

കൊട്ടാരക്കര: കൊല്ലം കൊട്ടാരക്കര നീലേശ്വരത്ത് നാടിനെ നടുക്കിയ ദാരുണമായ വാഹനാപകടം. അമിതവേഗതയിലെത്തിയ ടിപ്പർ ലോറി നിയന്ത്രണം വിട്ട് ബസ് കാത്തുനിന്ന വിദ്യാർത്ഥികൾ ഉൾപ്പെടെയുള്ള യാത്രക്കാരുടെ ഇടയിലേക്ക് പാഞ്ഞുകയറി മറിഞ്ഞു. അപകടത്തിൽ ഒരു വിദ്യാർത്ഥി ഉൾപ്പെടെ മൂന്ന് പേർ മരണപ്പെട്ടു. രണ്ട് പേരുടെ നില അതീവ ഗുരുതരമായി തുടരുകയാണ്. ചൊവ്വാഴ്ച രാവിലെ 7.15 ഓടെയാണ് നാടിനെ നടുക്കിയ ഈ സംഭവം ഉണ്ടായത്.

സ്കൂളുകളിലേക്കും കോളേജുകളിലേക്കും പോകാനായി നിരവധി വിദ്യാർത്ഥികളും മറ്റ് യാത്രക്കാരും നീലേശ്വരത്തെ ബസ് സ്റ്റോപ്പിൽ കാത്തുനിൽക്കുമ്പോഴായിരുന്നു അമിതവേഗതയിലെത്തിയ ടിപ്പർ ലോറി ദുരന്തം വിതച്ചത്. ടിപ്പർ ലോറിയുടെ അമിതവേഗതയാണ് ഇത്രയും വലിയൊരു ദുരന്തത്തിന് കാരണമായതെന്ന് സംഭവസ്ഥലത്തുണ്ടായിരുന്ന ദൃക്സാക്ഷികൾ പറയുന്നു.

മരണപ്പാച്ചിലിനൊടുവിൽ ബസ് സ്റ്റോപ്പിലേക്ക്

അപകടത്തിന്റെ ഭീകരത വ്യക്തമാക്കുന്ന വിവരങ്ങളാണ് നാട്ടുകാർ പങ്കുവെക്കുന്നത്. അമിതവേഗതയിലെത്തിയ ടിപ്പർ ലോറി ആദ്യം റോഡിലൂടെ പോവുകയായിരുന്ന ഒരു സ്കൂട്ടറിനെ ഇടിക്കുകയായിരുന്നു. സ്കൂട്ടറിനെ ഇടിച്ച ആഘാതത്തിൽ തന്നെ ടിപ്പർ ലോറി റോഡിൽ നന്നായി ഉലഞ്ഞു. ഈ സമയം ടിപ്പറിൽ ലോഡ് ചെയ്തിരുന്ന മണ്ണ് ഒരു സൈഡിലേക്ക് ചരിഞ്ഞ് റോഡിലേക്ക് മറിഞ്ഞുവീണിരുന്നു.

എന്നാൽ ഇതിനുശേഷവും വേഗത നിയന്ത്രിക്കാൻ ലോറിക്കായില്ല. നിയന്ത്രണം പൂർണ്ണമായും നഷ്ടപ്പെട്ട ടിപ്പർ ലോറി റോഡരികിലെ ഒരു മതിലിൽ ഇടിച്ചു. ആ ശക്തമായ ഇടിച്ചിലിൽ മതിൽ പൂർണ്ണമായും തകർന്നു. തുടർന്നും മുന്നോട്ട് പാഞ്ഞ ലോറി, തൊട്ടടുത്തുള്ള ബസ് സ്റ്റോപ്പിലേക്ക് പാഞ്ഞു കയറി മറിയുകയായിരുന്നു.

അടിയിൽപ്പെട്ട് കുട്ടികൾ; രക്ഷാപ്രവർത്തനം യുദ്ധകാലാടിസ്ഥാനത്തിൽ

അപകടസമയത്ത് പന്ത്രണ്ടോളം പേർ ബസ് സ്റ്റോപ്പിൽ ഉണ്ടായിരുന്നുവെന്നാണ് വിവരം. ലോറി പാഞ്ഞു വരുന്നത് കണ്ട് ചിലർ ഓടിമാറിയതിനാൽ വലിയൊരു ദുരന്തം ഒഴിവായി. എന്നാൽ, ഓടിമാറാൻ സാവകാശം ലഭിക്കാതിരുന്നവരാണ് അപകടത്തിൽപ്പെട്ടത്. പൂർണ്ണമായും മറിഞ്ഞ ലോറിയുടെയും ടൺ കണക്കിന് മണ്ണിന്റെയും അടിയിൽ കുട്ടികൾ ഉൾപ്പെടെയുള്ളവർ അകപ്പെടുകയായിരുന്നു.

ലോറി മറിഞ്ഞ ഉടൻ തന്നെ നാട്ടുകാർ ഓടിയെത്തി രക്ഷാപ്രവർത്തനം ആരംഭിച്ചു. തുടർന്ന് കൊട്ടാരക്കരയിൽ നിന്നും പോലീസും ഫയർഫോഴ്സും സ്ഥലത്തെത്തി യുദ്ധകാലാടിസ്ഥാനത്തിൽ കുട്ടികളെ പുറത്തെടുക്കാനുള്ള ശ്രമങ്ങൾ നടത്തി. ജെ.സി.ബി ഉപയോഗിച്ച് മണ്ണും ലോറിയുടെ ഭാഗങ്ങളും മാറ്റിയാണ് ആളുകളെ പുറത്തെടുത്തത്. രക്ഷാപ്രവർത്തനത്തിനിടയിൽ കുട്ടികളുടെ സ്കൂൾ ബാഗുകളും പുസ്തകങ്ങളും ചിതറിക്കിടക്കുന്ന ദയനീയ കാഴ്ചയാണ് സംഭവസ്ഥലത്തുണ്ടായിരുന്നത്.

മൂന്ന് ജീവനുകൾ പൊലിഞ്ഞു; രണ്ട് പേർ അതീവ ഗുരുതരം

അപകടത്തിൽ ഗുരുതരമായി പരിക്കേറ്റ മൂന്ന് പേരാണ് മരണപ്പെട്ടത്. ഇതിൽ ഒരാൾ നീലേശ്വരം സ്വദേശിയും അധ്യാപകനുമായ ഹരിലാൽ ആണെന്ന് തിരിച്ചറിഞ്ഞിട്ടുണ്ട്. മരിച്ചവരിൽ ഒരാൾ പത്താം ക്ലാസ് വിദ്യാർത്ഥിയായ പാർത്ഥിപ് ആണെന്നും വിവരമുണ്ട്. മൂന്നാമത്തെയാളെ തിരിച്ചറിയാനുള്ള ശ്രമങ്ങൾ തുടരുകയാണ്.

അപകടത്തിൽ പരിക്കേറ്റ മറ്റ് അഞ്ച് പേരെ ഉടൻ തന്നെ കൊട്ടാരക്കര താലൂക്ക് ആശുപത്രിയിലും സമീപത്തെ മറ്റ് സ്വകാര്യ ആശുപത്രികളിലും പ്രവേശിപ്പിച്ചു. ഇതിൽ രണ്ട് പേരുടെ നില അതീവ ഗുരുതരമായി തുടരുകയാണ്. പരിക്കേറ്റ മറ്റ് കുട്ടികളുടെ നില തൃപ്തികരമാണെന്ന് ആശുപത്രി അധികൃതർ അറിയിച്ചു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ടിപ്പർ ലോറികളുടെ അമിതവേഗതക്കെതിരെ പ്രദേശത്ത് വലിയ തോതിലുള്ള ജനരോഷമാണ് ഉയരുന്നത്.

---------------

Hindusthan Samachar / Roshith K