Enter your Email Address to subscribe to our newsletters
Thiruvananthapuram, 25 ജൂണ് (H.S.)
തിരുവനന്തപുരം: ഏറെ നാളത്തെ കാത്തിരിപ്പിനും വിവാദങ്ങൾക്കും വിരാമമിട്ടുകൊണ്ട് മുഖ്യമന്ത്രി വി.ഡി. സതീശനും കുടുംബവും ഔദ്യോഗിക വസതിയായ ക്ലിഫ് ഹൗസിലേക്ക് താമസം മാറി. അധികാരമേറ്റ് ഒരു മാസത്തിനുശേഷമാണ് മുഖ്യമന്ത്രി ക്ലിഫ് ഹൗസിലേക്ക് മാറുന്നത്. തികച്ചും സ്വകാര്യ ചടങ്ങുകളോടെയാണ് വസതിയിലെ പാലുകാച്ചൽ കർമ്മങ്ങൾ പൂർത്തിയാക്കിയത്.
ലളിതമായ ചടങ്ങുകൾ; ആർക്കും ക്ഷണമില്ലായിരുന്നു
ഔദ്യോഗിക വസതിയിലെത്തിയ മുഖ്യമന്ത്രി വി.ഡി. സതീശനും കുടുംബവും ലളിതമായ രീതിയിലാണ് ചടങ്ങുകൾ നടത്തിയത്. തികച്ചും സ്വകാര്യമായ ചടങ്ങായതിനാൽ മറ്റ് ജനപ്രതിനിധികൾക്കോ, ചീഫ് സെക്രട്ടറി ഉൾപ്പെടെയുള്ള ഉന്നത ഉദ്യോഗസ്ഥർക്കോ ക്ഷണമില്ലായിരുന്നു. മുഖ്യമന്ത്രിയുടെ പേഴ്സണൽ സ്റ്റാഫിലെ അടുത്ത ചില അംഗങ്ങളും അദ്ദേഹത്തിന്റെ ഭാര്യ, മകൾ, സഹോദരി എന്നിവരടങ്ങുന്ന കുടുംബാംഗങ്ങളും മാത്രമാണ് ചടങ്ങിൽ പങ്കെടുത്തത്.
നിശ്ചയിച്ച ശുഭമുഹൂർത്തത്തിലാണ് ക്ലിഫ് ഹൗസിൽ പാലുകാച്ചൽ ചടങ്ങുകൾ നടന്നത്. മാധ്യമപ്രവർത്തകർക്ക് ഉൾപ്പെടെ വസതിക്കുള്ളിലേക്ക് പ്രവേശനമുണ്ടായിരുന്നില്ല.
താമസം മാറാൻ വൈകിയതിലെ 'നീരസം'
സത്യപ്രതിജ്ഞ ചെയ്ത് ദിവസങ്ങൾ കഴിഞ്ഞിട്ടും ഔദ്യോഗിക വസതിയായ ക്ലിഫ് ഹൗസ് വിട്ടുകിട്ടാത്തതിൽ മുൻ മുഖ്യമന്ത്രിയും ഇപ്പോഴത്തെ പ്രതിപക്ഷ നേതാവുമായ പിണറായി വിജയൻ നേരത്തെ പരസ്യമായി നീരസം പ്രകടിപ്പിച്ചിരുന്നു. നിലവിൽ ബേക്കറി ജങ്ഷനിലെ ഒരു വാടകവീട്ടിലാണ് പ്രതിപക്ഷ നേതാവ് താമസിക്കുന്നത്.
കന്റോൺമെന്റ് ഹൗസ് വിട്ടുകിട്ടാത്തതിനെക്കുറിച്ച് പിണറായി വിജയൻ മുൻപ് പ്രതികരിച്ചിരുന്നത് ഇങ്ങനെയാണ്:
നമ്മുടെ കന്റോൺമെന്റ് ഹൗസ് ഇതുവരെ ഒഴിഞ്ഞിട്ടില്ല. ക്ലിഫ് ഹൗസിന്റെ അറ്റകുറ്റപ്പണികൾ നടക്കുകയായിരിക്കും, അതിന്റെ കാലതാമസമായിരിക്കാനാണ് സാധ്യത. തിരഞ്ഞെടുപ്പ് കഴിഞ്ഞയുടനെ ആകാവുന്നത്ര വേഗതയിൽ തന്നെ ക്ലിഫ് ഹൗസ് ഞാൻ ഒഴിഞ്ഞിരുന്നു. മുഖ്യമന്ത്രി അങ്ങോട്ട് പോയിക്കഴിഞ്ഞാൽ ഇവിടെയും ചില അറ്റകുറ്റപ്പണികൾ നടത്തേണ്ടതുണ്ടാകും. അതിനുശേഷമേ അങ്ങോട്ട് മാറാൻ സാധിക്കൂ.
ക്ലിഫ് ഹൗസിന്റെ മിനുകുപണികളും അറ്റകുറ്റപ്പണികളും തീർക്കാൻ എടുത്ത ദീർഘമായ കാലതാമസമാണ് മുഖ്യമന്ത്രിയുടെ താമസം മാറലിനെ വൈകിപ്പിച്ചത്. വി.ഡി. സതീശൻ ക്ലിഫ് ഹൗസിലേക്ക് മാറിയതോടെ കന്റോൺമെന്റ് ഹൗസിലെ അറ്റകുറ്റപ്പണികൾ ഉടൻ ആരംഭിക്കുമെന്നാണ് സൂചന. ഇത് പൂർത്തിയാകുന്നതോടെ പ്രതിപക്ഷ നേതാവ് പിണറായി വിജയൻ കന്റോൺമെന്റ് ഹൗസിലേക്ക് താമസം മാറ്റും.
---------------
Hindusthan Samachar / Roshith K
