Kozhikode, 25 ജൂണ് (H.S.)

കോഴിക്കോട്: സ്കൂൾ വിദ്യാർത്ഥികൾക്കിടയിലെ ലഹരി ഉപയോഗത്തെക്കുറിച്ച് ആശങ്കപ്പെടുത്തുന്ന മറ്റൊരു ഞെട്ടിക്കുന്ന വാർത്ത കൂടി പുറത്തുവരുന്നു. കോഴിക്കോട് താമരശ്ശേരിയിൽ പത്താം ക്ലാസ് വിദ്യാർത്ഥിയുടെ സ്കൂൾ ബാഗിലെ വാട്ടർ ബോട്ടിലിൽ നിന്ന് നാടൻ ചാരായം കണ്ടെത്തി. പതിവ് പരിശോധനയ്ക്കിടയിലാണ് അധ്യാപകർ വിദ്യാർത്ഥിയുടെ വാട്ടർ ബോട്ടിലിൽ വെള്ളത്തിന് പകരം മദ്യം കണ്ടെത്തിയത്. സംഭവം പുറത്തറിഞ്ഞതോടെ വലിയ രീതിയിലുള്ള ആശങ്കയിലാണ് രക്ഷിതാക്കളും നാട്ടുകാരും.

കഴിഞ്ഞ കുറച്ചു ദിവസങ്ങളായി സ്കൂളിലെ ചില വിദ്യാർത്ഥികൾ മദ്യം ഉൾപ്പെടെയുള്ള ലഹരി പദാർത്ഥങ്ങൾ ഉപയോഗിക്കുന്നുണ്ടെന്ന രീതിയിൽ അധ്യാപകർക്ക് ചില രഹസ്യവിവരങ്ങൾ ലഭിച്ചിരുന്നു. കുട്ടികളുടെ പെരുമാറ്റത്തിൽ സംശയം തോന്നിയതിനെ തുടർന്ന് അധ്യാപകർ കൃത്യമായ നിരീക്ഷണം നടത്തിവരികയായിരുന്നു. ഇതിന്റെ അടിസ്ഥാനത്തിലാണ് പത്താം ക്ലാസ് വിദ്യാർത്ഥികളുടെ ബാഗുകൾ വിശദമായി പരിശോധിക്കാൻ സ്കൂൾ അധികൃതർ തീരുമാനിച്ചത്. തുടർന്നാണ് ഒരു വിദ്യാർത്ഥിയുടെ ബാഗിലെ വാട്ടർ ബോട്ടിൽ തുറന്ന് നോക്കിയപ്പോൾ അതിൽ നാടൻ ചാരായം അടങ്ങിയിരിക്കുന്നതായി കണ്ടെത്തിയത്.

സഹപാഠിയാണ് ചാരായം എത്തിച്ചു നൽകിയത്!

വാട്ടർ ബോട്ടിലിൽ നാടൻ ചാരായം കണ്ടെത്തിയതോടെ അധ്യാപകർ വിദ്യാർത്ഥിയെ വിശദമായി ചോദ്യം ചെയ്തു. അപ്പോഴാണ് കൂടുതൽ ഞെട്ടിക്കുന്ന വിവരങ്ങൾ പുറത്തുവന്നത്. തന്റെ സഹപാഠിയായ മറ്റൊരു വിദ്യാർത്ഥിയാണ് തനിക്ക് ഈ ചാരായം എത്തിച്ചു നൽകിയതെന്നാണ് കുട്ടി അധ്യാപകർക്ക് നൽകിയ മറുപടി.

തുടർന്ന് നടത്തിയ അന്വേഷണത്തിൽ സ്കൂളിലെ മറ്റ് ചില കുട്ടികൾക്കും ഇത്തരത്തിൽ ചാരായം എത്തിച്ചു നൽകിയിട്ടുണ്ടെന്ന അതീവ ഗുരുതരമായ വിവരവും അധ്യാപകർക്ക് ലഭിച്ചിട്ടുണ്ട്. വിദ്യാർത്ഥികൾക്ക് ഇത്ര എളുപ്പത്തിൽ നാടൻ ചാരായം എവിടെ നിന്നാണ് ലഭിക്കുന്നത് എന്നതിനെക്കുറിച്ച് കൃത്യമായ സൂചനകൾ ഇനിയും ലഭ്യമായിട്ടില്ല. കുട്ടികളെ മുൻനിർത്തി സ്കൂൾ പരിസരങ്ങളിൽ ലഹരി മാഫിയ സജീവമാണോ എന്ന സംശയവും ഇതോടെ ശക്തമായിരിക്കുകയാണ്.

സംഭവത്തിന്റെ ഗൗരവം കണക്കിലെടുത്ത് സ്കൂൾ അധികൃതർ ഉടൻ തന്നെ വിവരം താമരശ്ശേരി പൊലീസിനെ അറിയിച്ചു. വിവരമറിഞ്ഞ് സ്കൂളിലെത്തിയ പൊലീസ് സംഘം അധ്യാപകരിൽ നിന്നും കുട്ടികളിൽ നിന്നും വിവരങ്ങൾ ശേഖരിച്ചിട്ടുണ്ട്. ലഹരി മാഫിയയുടെ കണ്ണി കുട്ടികളിലേക്ക് എങ്ങനെയെത്തി എന്നതിനെക്കുറിച്ചും, വിദ്യാർത്ഥികൾക്ക് ചാരായം എത്തിച്ചു നൽകിയ ഉറവിടത്തെക്കുറിച്ചും പൊലീസ് അതീവ ഗൗരവത്തോടെയാണ് അന്വേഷിക്കുന്നത്. വരും ദിവസങ്ങളിൽ രക്ഷിതാക്കളുടെയും അധ്യാപകരുടെയും സാന്നിധ്യത്തിൽ കുട്ടികളെ കൂടുതൽ കൗൺസിലിംഗിന് വിധേയമാക്കാനും കടുത്ത ലഹരി വിരുദ്ധ ബോധവൽക്കരണ പരിപാടികൾ സ്കൂളുകളിൽ സംഘടിപ്പിക്കാനും അധികൃതർ ആലോചിക്കുന്നുണ്ട്.

---------------

Hindusthan Samachar / Roshith K