Shrinagar, 25 ജൂണ് (H.S.)

ശ്രീനഗർ: രാജ്യത്തെയാകെ നടുക്കിയ ജമ്മു കശ്മീരിലെ പഹൽഗാം ബൈസരൻ വാലി ഭീകരാക്രമണത്തിന് പിന്നിലെ ഞെട്ടിക്കുന്ന ഡിജിറ്റൽ തെളിവുകളും ആസൂത്രണ വിവരങ്ങളും പുറത്ത്. വിനോദസഞ്ചാരികളെ ക്രൂരമായി ലക്ഷ്യമിട്ടുള്ള ഈ ആക്രമണത്തിന്റെ പദ്ധതികൾ കൃത്യമായി തയ്യാറാക്കിയത് അക്രമം നടക്കുന്നതിന് ഒരാഴ്ച മുൻപ് തന്നെയാണെന്ന് ദേശീയ അന്വേഷണ ഏജൻസി (എൻഐഎ) സമർപ്പിച്ച കുറ്റപത്രത്തിൽ വ്യക്തമാക്കുന്നു. സാധാരണയായി മലകയറ്റത്തിനും പര്യവേക്ഷണങ്ങൾക്കുമായി ഉപയോഗിക്കുന്ന ഒരു ട്രെക്കിങ് മൊബൈൽ ആപ്ലിക്കേഷൻ വഴിയാണ് ഭീകരർ ആക്രമണം നടത്തേണ്ട ലൊക്കേഷനുകൾ കണ്ടെത്തിയതെന്നും എൻഐഎ വ്യക്തമാക്കുന്നുണ്ട്.

ലഷ്കർ-ഇ-തൊയ്ബയുടെയും അതിന്റെ നിഴൽ സംഘടനയായ 'ദി റെസിസ്റ്റൻസ് ഫ്രണ്ടിന്റെയും' (TRF) കമാൻഡറായ പാക് ഹാൻഡ്ലർ സാജിദ് ജാട്ട് അയച്ചുനൽകിയ ഭൂപടങ്ങളും ലൊക്കേഷൻ വിവരങ്ങളും ഭീകരർ ട്രാക്ക് ചെയ്തത് ഈ മൊബൈൽ ആപ്പ് ഉപയോഗിച്ചായിരുന്നു. ശ്രീനഗറിനടുത്തുള്ള ദാച്ചിഗാം വനമേഖലയിൽ നടന്ന 'ഓപ്പറേഷൻ മഹാദേവ്' എന്ന സൈനിക ഏറ്റുമുട്ടലിൽ കൊല്ലപ്പെട്ട പാക് ഭീകരരുടെ ഫോണുകളിൽ നിന്നാണ് ഇതിന്റെ നിർണായക തെളിവുകൾ അന്വേഷണസംഘം കണ്ടെടുത്തത്.

ഡിജിറ്റൽ തെളിവുകളും മാപ്പ് സ്ക്രീൻഷോട്ടുകളും

കൊല്ലപ്പെട്ട ഭീകരരിൽ നിന്ന് സുരക്ഷാ സേന കണ്ടെടുത്ത മൊബൈൽ ഫോണുകൾ വിശദമായ ഫോറൻസിക് പരിശോധനയ്ക്ക് വിധേയമാക്കിയപ്പോഴാണ് ആക്രമണത്തിന്റെ ആസൂത്രണ രേഖകൾ ലഭിച്ചത്. ഏപ്രിൽ 15, 16 തീയതികളിലായി ഭീകരർ എടുത്ത രണ്ട് മാപ്പ് സ്ക്രീൻഷോട്ടുകൾ ഇവരുടെ ഫോണിൽ ഉണ്ടായിരുന്നു. പഹൽഗാമിലെ ബൈസരൻ വാലിക്ക് സമീപമുള്ള കൃത്യമായ ലൊക്കേഷനുകൾ അടയാളപ്പെടുത്തിയവയായിരുന്നു ഇത്. ഈ സമയ സ്റ്റാമ്പുകൾ പരിശോധിച്ചതിൽ നിന്നും ആക്രമണത്തിന് ഒരു വട്ടം മുൻപ് തന്നെ കൃത്യമായ ഗൂഢാലോചന സജീവമായിരുന്നുവെന്ന് എൻഐഎ വിലയിരുത്തുന്നു.

ഭീകരർക്ക് ആക്രമണത്തിനാവശ്യമായ അത്യാധുനിക ആയുധങ്ങളും ഫണ്ടും പാകിസ്താനിൽ നിന്ന് ഡ്രോൺ വഴിയാണ് എത്തിച്ചു നൽകിയത്. കൊല്ലപ്പെട്ട ഭീകരരിൽ ഒരാളായ ഫൈസൽ ജാട്ടിനെ തിരിച്ചറിഞ്ഞ ഒരു സാക്ഷി നൽകിയ മൊഴിയിൽ, ഡ്രോൺ വഴി അതിർത്തി കടന്നെത്തിയ മഞ്ഞ പാക്കറ്റിൽ നിന്ന് 20 പിസ്റ്റളുകളും, 15 ലക്ഷം രൂപയും, ത്രികോണ ആകൃതിയിലുള്ള ബോംബുകളും ഭീകരർ കൈപ്പറ്റിയതായി വ്യക്തമാക്കുന്നുണ്ട്. കൂടാതെ ഭീകരരുടെ ഫോണുകളിൽ നിന്ന് നിരവധി ഫോട്ടോകളും ഡിജിറ്റൽ തെളിവുകളും എൻഐഎ ശേഖരിച്ചു കഴിഞ്ഞു.

പ്രാദേശിക സഹായവും ലക്ഷ്യവും

ബൈസരൻ വാലിയിൽ സിസിടിവി ക്യാമറകളുടെ കവറേജ് കുറവായ ദുർഘടമായ ഭൂപ്രകൃതിയാണ് ആക്രമണത്തിനായി ഭീകരർ തിരഞ്ഞെടുത്തത്. ആക്രമണം നടക്കുന്നതിന് തൊട്ടുമുൻപുള്ള ദിവസം പ്രാദേശിക സഹായികളായ പർവൈസ് അحمد, ബഷീർ അഹമ്മദ് എന്നിവരുടെ മൺകൂരകളിൽ (ധോക്) ഭീകരർക്ക് ഭക്ഷണവും ഒളിത്താവളവും ലഭിച്ചിരുന്നു. ഇവരെയും കേസിൽ എൻഐഎ പ്രതിചേർത്തിട്ടുണ്ട്.

ഏറ്റുമുട്ടലിൽ കൊല്ലപ്പെട്ട പാക് ഭീകരരായ ഫൈസൽ ജാട്ട് (സുലൈമാൻ), ഹബീബ് താഹിർ (ജിബ്രാൻ), ഹംസ അഫ്ഗാനി എന്നിവരാണ് ആക്രമണത്തിന്റെ പ്രധാന സൂത്രധാരർ. വിനോദസഞ്ചാരികളെ ലക്ഷ്യമിട്ട് താഴ്വരയിലെ ടൂറിസം മേഖല തകർക്കാനും വർഗീയ വിള്ളലുകൾ ഉണ്ടാക്കാനുമായിരുന്നു പാകിസ്താൻ സ്പോൺസർ ചെയ്ത ഭീകരർ ശ്രമിച്ചതെന്ന് ജമ്മുവിലെ പ്രത്യേക എൻഐഎ കോടതിയിൽ സമർപ്പിച്ച 1,597 പേജുള്ള കുറ്റപത്രത്തിൽ എൻഐഎ അടിവരയിടുന്നു.

---------------

Hindusthan Samachar / Roshith K