Victoria, 27 ജൂണ് (H.S.)

വിക്ടോറിയ: ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതൽ ശക്തമാക്കുകയെന്ന ലക്ഷ്യത്തോടെ പ്രധാനമന്ത്രി നരേന്ദ്ര മോദി സെയ്ഷെൽസിൽ എത്തിച്ചേർന്നു. സെയ്ഷെൽസ് തലസ്ഥാനമായ വിക്ടോറിയയിലെ അന്താരാഷ്ട്ര വിമാനത്താവളത്തിൽ ഇറങ്ങിയ പ്രധാനമന്ത്രിക്ക് ഊഷ്മളമായ സ്വീകരണമാണ് ലഭിച്ചത്. സമുദ്ര സുരക്ഷയിലും പ്രാദേശിക സഹകരണത്തിലും നിർണായക ചർച്ചകൾ ലക്ഷ്യമിട്ടുള്ള മൂന്ന് ദിവസത്തെ ഔദ്യോഗിക സന്ദർശനത്തിനായാണ് അദ്ദേഹം ദ്വീപ് രാഷ്ട്രത്തിൽ എത്തിയത്.

വിമാനത്താവളത്തിൽ സെയ്ഷെൽസ് പ്രസിഡന്റ് ഡോ. പാട്രിക് ഹെർമിനി പ്രധാനമന്ത്രിയെ നേരിട്ടെത്തി സ്വീകരിച്ചു. തുടർന്ന് പ്രധാനമന്ത്രിക്ക് ആചാരപരമായ ഗാർഡ് ഓഫ് ഓണർ നൽകി ആദരിച്ചു. സെയ്ഷെൽസ് പ്രസിഡന്റിന്റെ ഊഷ്മളമായ സ്വീകരണത്തിന് നന്ദി അറിയിച്ച പ്രധാനമന്ത്രി, സെയ്ഷെൽസ് ഇന്ത്യയുടെ വിശ്വസ്ത സമുദ്ര പങ്കാളിയും ഇന്ത്യൻ മഹാസമുദ്രത്തിലെ അടുത്ത സുഹൃത്തുമാണെന്ന് സോഷ്യൽ മീഡിയ പ്ലാറ്റ്ഫോമായ എക്സിലൂടെ (ട്വിറ്റർ) വ്യക്തമാക്കി. ഇരുരാജ്യങ്ങളിലെയും ജനങ്ങളുടെ ക്ഷേമത്തിനായി ദീർഘകാലമായുള്ള ഉഭയകക്ഷി സഹകരണം കൂടുതൽ ശക്തമാക്കാൻ ഈ സന്ദർശനം സഹായിക്കുമെന്നും അദ്ദേഹം പ്രത്യാശ പ്രകടിപ്പിച്ചു.

വിമാനത്താവളത്തിൽ തടിച്ചുകൂടിയ ഇന്ത്യൻ പ്രവാസി സമൂഹവും പ്രധാനമന്ത്രിക്ക് ആവേശോജ്ജ്വലമായ സ്വീകരണമാണ് ഒരുക്കിയത്. പ്രവാസികളുടെ സ്നേഹത്തിന് നന്ദി പറയുന്നതായി പ്രധാനമന്ത്രി സ്വീകരണത്തിന്റെ ചിത്രങ്ങൾ പങ്കുവെച്ചുകൊണ്ട് കുറിച്ചു. ഇരു ജനാധിപത്യ രാജ്യങ്ങളും തമ്മിലുള്ള ശക്തമായ ജനകീയ ബന്ധത്തിന്റെ തെളിവാണ് ഈ സ്വീകരണമെന്ന് വിദേശകാര്യ മന്ത്രാലയം വിലയിരുത്തി.

ബ്രിട്ടനിൽ നിന്ന് സ്വാതന്ത്ര്യം നേടിയതിന്റെ അമ്പതാം വാർഷികം (ഗോൾഡൻ ജൂബിലി) ആഘോഷിക്കുന്ന വേളയിലാണ് പ്രധാനമന്ത്രി സെയ്ഷെൽസിൽ എത്തിയിരിക്കുന്നത് എന്ന പ്രത്യേകതയുമുണ്ട്. ഈ ചരിത്രപരമായ ദേശീയ ദിന ആഘോഷങ്ങളിൽ മുഖ്യാതിഥിയായാണ് നരേന്ദ്ര മോദി പങ്കെടുക്കുന്നത്. സമുദ്ര മേഖലയിലെ സുരക്ഷയും വളർച്ചയും ലക്ഷ്യമിട്ടുള്ള ഇന്ത്യയുടെ 'മഹാസാഗർ' (MAHASAGAR) നയത്തിലും ഗ്ലോബൽ സൗത്ത് (Global South) രാജ്യങ്ങളുടെ കൂട്ടായ്മയിലും സെയ്ഷെൽസിന് വലിയ പ്രാധാന്യമുണ്ടെന്ന് യാത്ര തിരിക്കുന്നതിന് മുൻപ് പ്രധാനമന്ത്രി വ്യക്തമാക്കിയിരുന്നു.

സന്ദർശനത്തിനിടെ പ്രസിഡന്റ് ഡോ. പാട്രിക് ഹെർമിനിയുമായി പ്രധാനമന്ത്രി ഉന്നതതല ചർച്ചകൾ നടത്തും. സമുദ്ര സുരക്ഷ, വികസന സഹകരണം, പ്രതിരോധ പങ്കാളിത്തം എന്നിവയുൾപ്പെടെയുള്ള വിവിധ വിഷയങ്ങൾ ഇരുനേതാക്കളും അവലോകനം ചെയ്യും. കൂടാതെ സെയ്ഷെൽസ് ദേശീയ അസംബ്ലിയെ അഭിസംബോധന ചെയ്ത് പ്രധാനമന്ത്രി സംസാരിക്കുമെന്നും വിദേശകാര്യ മന്ത്രാലയം അറിയിച്ചു. 2015-ന് ശേഷം പ്രധാനമന്ത്രി നരേന്ദ്ര മോദി സെയ്ഷെൽസിൽ നടത്തുന്ന ആദ്യ ഔദ്യോഗിക സന്ദർശനമാണിത്.

---------------

Hindusthan Samachar / Roshith K