Kozhikode, 28 ജൂണ് (H.S.)

കോഴിക്കോട്: പൊതുജനങ്ങളുടെ ആരോഗ്യ സുരക്ഷ ഉറപ്പാക്കുന്നതിന്റെ ഭാഗമായി കോഴിക്കോട് എലത്തൂർ സർക്കിൾ പരിധിയിൽ ഭക്ഷ്യസുരക്ഷാ വകുപ്പ് വ്യാപക പരിശോധന നടത്തി. വിട്ടുവീഴ്ചയില്ലാത്ത പരിശോധനയിൽ മാനദണ്ഡങ്ങൾ പാലിക്കാത്തതും ന്യൂനതകൾ കണ്ടെത്തിയതുമായ നിരവധി സ്ഥാപനങ്ങൾക്കെതിരെയാണ് അധികൃതർ കർശന നടപടി സ്വീകരിച്ചിരിക്കുന്നത്. എലത്തൂർ സർക്കിൾ പരിധിയിലെ ആകെ 136 സ്ഥാപനങ്ങളിലാണ് ഭക്ഷ്യസുരക്ഷാ ഉദ്യോഗസ്ഥർ മിന്നൽ പരിശോധന നടത്തിയത്.

വ്യത്യസ്തമായ ന്യൂനതകളും ശുചിത്വക്കുറവും കണ്ടെത്തിയ 29 സ്ഥാപനങ്ങൾക്ക് വകുപ്പ് നിയമപ്രകാരം നോട്ടീസ് നൽകി. ഗുരുതരമായ നിയമലംഘനങ്ങൾ നടത്തിയ രണ്ട് സ്ഥാപനങ്ങൾക്കെതിരെ നിയമപരമായ കേസ് നടപടികൾ ആരംഭിച്ചിട്ടുണ്ട്. കൂടാതെ, ഒട്ടും തൃപ്തികരമല്ലാത്ത സാഹചര്യത്തിൽ പ്രവർത്തിച്ചിരുന്ന 6 സ്ഥാപനങ്ങളുടെ പ്രവർത്തനം താൽക്കാലികമായി നിർത്തിവെപ്പിച്ചു.

സാംപിളുകൾ ശേഖരിച്ചു; കർശന നിരീക്ഷണം

ഭക്ഷണ സാധനങ്ങളുടെ ഗുണനിലവാരം ശാസ്ത്രീയമായി ഉറപ്പുവരുത്തുന്നതിനായി പരിശോധനയുടെ ഭാഗമായി വിവിധ സ്ഥാപനങ്ങളിൽ നിന്നായി 123 ഭക്ഷ്യ സാംപിളുകൾ ശേഖരിച്ച് ലാബിലേക്ക് അയച്ചിട്ടുണ്ട്. ഇതിന്റെ പരിശോധനാ ഫലം വരുന്ന മുറയ്ക്ക് കൂടുതൽ നടപടികളിലേക്ക് കടക്കുമെന്ന് ഉദ്യോഗസ്ഥർ വ്യക്തമാക്കി.

മത്സ്യ വിപണിയിലെ രാസവസ്തുക്കളുടെ സാന്നിധ്യവും പഴക്കവും കണ്ടെത്താനായി പ്രത്യേക പരിശോധനയും നടന്നു. വിവിധ മത്സ്യ വിൽപനശാലകളിൽ നിന്ന് മുപ്പതോളം സാംപിളുകൾ ശേഖരിച്ച് പരിശോധനയ്ക്ക് വിധേയമാക്കുകയും ഗുണനിലവാരം ഉറപ്പുവരുത്തുകയും ചെയ്തിട്ടുണ്ട്.

സ്കൂളുകളിലും അങ്കണവാടികളിലും പ്രത്യേക പരിശോധന

കുട്ടികളുടെ ആരോഗ്യ സുരക്ഷയ്ക്ക് മുൻഗണന നൽകിക്കൊണ്ട് തലക്കുളത്തൂർ പഞ്ചായത്തിലെ മുഴുവൻ സ്കൂളുകളിലെയും കുടിവെള്ള സാംപിളുകൾ ഉദ്യോഗസ്ഥർ ശേഖരിച്ച് പരിശോധന നടത്തി.

ബോധവൽക്കരണ പരിപാടി: പരിശോധനകൾക്ക് പുറമെ, സ്കൂളുകളിലെയും അങ്കണവാടികളിലെയും ഭക്ഷ്യവസ്തുക്കൾ കൈകാര്യം ചെയ്യുന്ന ജീവനക്കാർക്കായി പ്രത്യേക ബോധവൽക്കരണ പരിപാടിയും ഭക്ഷ്യസുരക്ഷാ വകുപ്പിന്റെ നേതൃത്വത്തിൽ സംഘടിപ്പിച്ചു. ഭക്ഷണം പാകം ചെയ്യുമ്പോഴും വിതരണം ചെയ്യുമ്പോഴും പാലിക്കേണ്ട ശുചിത്വ ശീലങ്ങളെക്കുറിച്ച് ഇവർക്ക് കൃത്യമായ നിർദേശങ്ങൾ നൽകി.

വരും ദിവസങ്ങളിലും എലത്തൂർ സർക്കിൾ പരിധിയിൽ പരിശോധനകൾ കൂടുതൽ ശക്തമായി തുടരുമെന്ന് ഫുഡ് സേഫ്റ്റി ഓഫിസർ സി.എ.വിമൽ അറിയിച്ചു. ഹോട്ടലുകൾ, തട്ടുകടകൾ, ബേക്കറികൾ എന്നിവയുൾപ്പെടെയുള്ള എല്ലാ ഭക്ഷ്യവിൽപ്പന കേന്ദ്രങ്ങളും കൃത്യമായ മാനദണ്ഡങ്ങൾ പാലിക്കണമെന്നും അല്ലാത്തപക്ഷം ലൈസൻസ് റദ്ദാക്കുന്നത് ഉൾപ്പെടെയുള്ള കടുത്ത നടപടികൾ നേരിടേണ്ടിവരുമെന്നും അധികൃതർ മുന്നറിയിപ്പ് നൽകി.

---------------

Hindusthan Samachar / Roshith K