Kozhikode , 28 ജൂണ് (H.S.)

കോഴിക്കോട്: പ്രധാനമന്ത്രി ആവാസ് യോജന (പി.എം.എ.വൈ) പദ്ധതി പ്രകാരം പാവപ്പെട്ടവർക്ക് വീട് നൽകുന്നതുമായി ബന്ധപ്പെട്ട വിവാദങ്ങളിൽ കടുത്ത നിലപാടുമായി മുസ്ലിം ലീഗ് നേതാവ് കെ.എം ഷാജി. പദ്ധതിയുടെ ഭാഗമായി കേന്ദ്ര സർക്കാരിന്റെ ഔദ്യോഗിക എംബ്ലം വെക്കുന്നതിൽ തെറ്റില്ലെന്നും താൻ അതാണ് ആവശ്യപ്പെട്ടതെന്നും അദ്ദേഹം വാർത്താസമ്മേളനത്തിൽ വ്യക്തമാക്കി. എന്നാൽ താൻ പറയാത്ത കാര്യങ്ങൾ വളച്ചൊടിച്ച് മാധ്യമങ്ങൾ കള്ളം പ്രചരിപ്പിക്കുകയാണെന്ന് ഷാജി ആരോപിച്ചു.

ഫോട്ടോ വിവാദം അടിസ്ഥാനരഹിതം

പദ്ധതി പ്രകാരം നിർമിക്കുന്ന വീടുകളിൽ പ്രധാനമന്ത്രി നരേന്ദ്ര മോദിയുടെ ഫോട്ടോ സ്ഥാപിക്കണമെന്ന് താൻ ആവശ്യപ്പെട്ടു എന്ന രീതിയിൽ വന്ന വാർത്തകളെ കെ.എം ഷാജി പൂർണ്ണമായും തള്ളിപ്പറഞ്ഞു. താൻ എംബ്ലം വെക്കണം എന്നാണ് പറഞ്ഞത്. ആ ലോഗോയിലോ എംബ്ലത്തിലോ പ്രധാനമന്ത്രിയുടെയോ മുഖ്യമന്ത്രിയുടെയോ ഫോട്ടോ ഇല്ല. കേരളത്തിൽ ഇതിനകം തന്നെ ഒരു ലക്ഷത്തിലധികം പി.എം.എ.വൈ വീടുകൾക്ക് സർക്കാർ ലോഗോ വെച്ചിട്ടുണ്ട്. അതിൽ എവിടെയെങ്കിലും പ്രധാനമന്ത്രിയുടെ ചിത്രം കാണിച്ചുതരാൻ സാധിക്കുമോ എന്ന് അദ്ദേഹം വെല്ലുവിളിച്ചു. ഇടതുപക്ഷ ചാനലുകളും ചില മുഖ്യധാര മാധ്യമങ്ങളും വ്യാജ വാർത്തകൾ ചമച്ച് ചർച്ചകൾ ഉണ്ടാക്കുകയാണെന്നും അദ്ദേഹം കുറ്റപ്പെടുത്തി.

പിന്മാറ്റത്തിന് പിന്നിൽ സാമ്പത്തിക പ്രതിസന്ധി

കേരളത്തിൽ കഴിഞ്ഞ 10 വർഷത്തിനിടെ 5 ലക്ഷം വീടുകൾ നൽകിയെന്നാണ് നിയമസഭയിലെ കണക്ക്. ഇതിൽ വലിയൊരു പങ്ക് പി.എം.എ.വൈ പദ്ധതി പ്രകാരം നിർമ്മിച്ചവയാണ്. ഗുണഭോക്താക്കളുടെ വിവരങ്ങളും പദ്ധതിയുടെ ലോഗോയും അവസാന ഗഡു നൽകുന്നതിന് മുൻപ് നിർബന്ധമായും പ്രദർശിപ്പിക്കണമെന്ന് കുടുംബശ്രീയുടെ 2023-ലെ ഒഫീഷ്യൽ സർക്കുലറിലുണ്ടെന്ന് ഷാജി ചൂണ്ടിക്കാട്ടി.

യഥാർത്ഥ വസ്തുത ഇതായിരിക്കെ, എൽ.ഡി.എഫ് സർക്കാർ പെട്ടെന്ന് ഈ കരാറിൽ നിന്ന് പുറകോട്ട് പോയത് കപട ആദർശം കൊണ്ടല്ല, മറിച്ച് സംസ്ഥാന വിഹിതമായി നൽകേണ്ട തുക കൈയ്യിലില്ലാത്തതുകൊണ്ടാണ്. സംസ്ഥാനത്തിന്റെ കടുത്ത സാമ്പത്തിക പ്രതിസന്ധി മറച്ചുവെക്കാൻ കേന്ദ്രത്തിനെതിരെ രാഷ്ട്രീയ ആയുധമാക്കുകയാണ് സർക്കാർ ചെയ്യുന്നത്. അതേസമയം തന്നെ, നാടിന്റെ സംസ്കാരത്തെ തകർക്കുന്ന 'പി.എം ശ്രീ' പോലുള്ള അപകടകരമായ മറ്റു കരാറുകളിൽ ഒരു ഉളുപ്പുമില്ലാതെ ഇതേ സർക്കാർ ഒപ്പുവെച്ചതായും ഷാജി വിമർശിച്ചു.

പാവങ്ങളുടെ അവകാശം തട്ടിയെടുക്കരുത്

പുതുതായി ഒരു ലക്ഷത്തി ഇരുപതിനായിരത്തോളം പാവപ്പെട്ട മനുഷ്യർക്ക് വീട് ലഭിക്കാനുള്ള അവസരമാണ് ഇത്തരം അനാവശ്യ വിവാദങ്ങൾ കാരണം ഇല്ലാതാകുന്നത്. ഒരു എംബ്ലത്തിന്റെ പേര് പറഞ്ഞ് പാവങ്ങൾക്ക് ലഭിക്കേണ്ട ആനുകൂല്യങ്ങൾ തടയുന്നത് സമൂഹത്തോട് ചെയ്യുന്ന വലിയ തെറ്റാണ്. കേന്ദ്ര സർക്കാരായാലും സംസ്ഥാന സർക്കാരായാലും ജനങ്ങൾക്ക് നൽകുന്നത് ജനങ്ങളുടെ നികുതിപ്പണം തന്നെയാണ്.

ദക്ഷിണേന്ത്യൻ സംസ്ഥാനങ്ങളിൽ നിന്ന് ഈടാക്കുന്ന നികുതിയുടെ വലിയൊരു പങ്ക് വടക്കൻ സംസ്ഥാനങ്ങളിലേക്കാണ് പോകുന്നത്. കേരളത്തിന് അർഹമായ കേന്ദ്ര വിഹിതം കുറഞ്ഞുനിൽക്കുന്ന സാഹചര്യത്തിൽ, കിട്ടുന്ന ആനുകൂല്യങ്ങൾ കൂടി രാഷ്ട്രീയ വാശി കാരണം ഇല്ലാതാക്കരുത്. നാല് ലക്ഷത്തോളം രൂപ മാത്രമാണ് ഇപ്പോൾ വീടുപണിക്ക് നൽകാൻ സാധിക്കുന്നത്. ഇത്തരം പ്രതിസന്ധികൾക്കിടയിൽ അനാവശ്യ വിവാദങ്ങൾ ഉണ്ടാക്കി സാധാരണക്കാരുടെ വീടെന്ന സ്വപ്നം തകർക്കരുതെന്നും കെ.എം ഷാജി മാധ്യമങ്ങളോട് ആവശ്യപ്പെട്ടു

---------------

Hindusthan Samachar / Roshith K