Newdelhi , 28 ജൂണ് (H.S.)

ന്യൂഡൽഹി: നിലവിലെ ചാമ്പ്യന്മാരായ അർജന്റീന 2026 ഫിഫ ലോകകപ്പിൽ തങ്ങളുടെ അപരാജിത കുതിപ്പ് തുടരുകയാണ്. ഗ്രൂപ്പ് ഘട്ടത്തിലെ അവസാന മത്സരത്തിലും തകർപ്പൻ വിജയം നേടിയതോടെ, കളിച്ച മൂന്ന് മത്സരങ്ങളും വിജയിച്ച് ഗ്രൂപ്പ് ചാമ്പ്യന്മാരായാണ് അർജന്റീന നോക്കൗട്ട് റൌണ്ടിലേക്ക് യോഗ്യത നേടിയത്. ഈ വിജയക്കുതിപ്പിന് മുന്നിൽ നിന്ന് നയിക്കുന്നത് മറ്റാരുമല്ല, ഇതിഹാസ താരം ലയണൽ മെസ്സി തന്നെയാണ്. ജോർദാനെതിരെ നടന്ന മത്സരത്തിലും ഗോൾ വേട്ട തുടർന്ന മെസ്സി, ഫുട്ബോൾ ചരിത്രത്തിൽ മറ്റാർക്കും നേടാനാകാത്ത ഒരു അപൂർവ്വ റെക്കോർഡും സ്വന്തം പേരിൽ കുറിച്ചു.

തുടർച്ചയായ ഏഴ് ലോകകപ്പ് മത്സരങ്ങളിൽ ഗോൾ നേടുന്ന ചരിത്രത്തിലെ ആദ്യത്തെ താരം എന്ന റെക്കോർഡാണ് ലയണൽ മെസ്സി സ്വന്തമാക്കിയത്. ഖത്തർ ലോകകപ്പിലെ അവസാന മത്സരങ്ങളിലെ ഫോം നിലവിലെ ലോകകപ്പിലും മെസ്സി തുടരുകയായിരുന്നു.

ഗോൾഡൻ ബൂട്ട് റേസിൽ മുന്നിൽ

ഈ ലോകകപ്പിൽ കളിച്ച മൂന്ന് മത്സരങ്ങളിൽ നിന്ന് മാത്രമായി മെസ്സി ഇതുവരെ 6 ഗോളുകൾ നേടിക്കഴിഞ്ഞു. ആദ്യ മത്സരത്തിൽ ഹാട്രിക്കും, രണ്ടാമത്തെ മത്സരത്തിൽ ഇരട്ട ഗോളും (ബ്രേസ്) നേടിയ മെസ്സി, ജോർദാനെതിരെയുള്ള മത്സരത്തിലും വലകുലുക്കി. നിലവിൽ ടൂർണമെന്റിലെ ഗോൾഡൻ ബൂട്ട് റേസിൽ ഏറ്റവും മുന്നിലാണ് മെസ്സി.

അൾജീരിയ, ഓസ്ട്രിയ, ജോർദാൻ എന്നീ ടീമുകൾക്കെതിരെയാണ് ഗ്രൂപ്പ് ഘട്ടത്തിൽ അർജന്റീന വിജയം കൊയ്തത്. ചാമ്പ്യന്മാർ എവിടെയാണോ നിർത്തിയത് അവിടെ നിന്ന് തന്നെ വീണ്ടും തുടങ്ങി എന്ന രീതിയിലാണ് അർജന്റീനയുടെ ഇപ്പോഴത്തെ പ്രകടനം.

മെസ്സിയെ എന്തുകൊണ്ട് ആദ്യ ഇലവനിൽ ഉൾപ്പെടുത്തിയില്ല?

ജോർദാനെതിരെയുള്ള മത്സരത്തിന്റെ ലൈനപ്പ് പുറത്തുവന്നപ്പോൾ മെസ്സി ആദ്യ ഇലവനിൽ ഇല്ലായിരുന്നു എന്നത് ആരാധകരെ അൽപ്പം ആശങ്കയിലാഴ്ത്തിയിരുന്നു. എന്നാൽ നോക്കൗട്ട് മത്സരങ്ങൾക്ക് മുന്നോടിയായി താരത്തിന് കൃത്യമായ വിശ്രമം നൽകാനും ഫ്രഷ് ആയി നിലനിർത്താനും വേണ്ടിയാണ് ഈ തീരുമാനമെന്ന് അർജന്റീനയുടെ പരിശീലകൻ ലയണൽ സ്കലോണി വ്യക്തമാക്കിയിരുന്നു.

ലിയോ നാളത്തെ മത്സരത്തിൽ പകരക്കാരനായിട്ടായിരിക്കും ഇറങ്ങുക. അടുത്ത റൌണ്ടിൽ ആരെ നേരിടും എന്നതിനെ അടിസ്ഥാനമാക്കിയല്ല ഈ തീരുമാനം. ജോർദാൻ മികച്ചൊരു എതിരാളിയാണ്, ഒരു മത്സരത്തെയും ഞങ്ങൾ നിസ്സാരമായി കാണുന്നില്ല. കഴിഞ്ഞ മത്സരത്തിലെ ചില കാര്യങ്ങൾ മെച്ചപ്പെടുത്താനാണ് ഞങ്ങൾ ശ്രമിക്കുന്നത്. - മത്സരത്തിന് മുന്നോടിയായി സ്കലോണി പറഞ്ഞു.

പിന്നീട് പകരക്കാരനായി കളത്തിലിറങ്ങിയാണ് മെസ്സി അർജന്റീനയ്ക്കായി ഗോൾ നേടിയതും ചരിത്ര റെക്കോർഡ് സ്വന്തമാക്കിയതും.

അടുത്ത പോരാട്ടം കേപ് വെർഡെയ്ക്കെതിരെ

ഗ്രൂപ്പ് ഘട്ടത്തിലെ ആധികാരിക വിജയങ്ങൾക്ക് ശേഷം അർജന്റീന ഇനി റൌണ്ട് ഓഫ് 32 പോരാട്ടത്തിനാണ് തയ്യാറെടുക്കുന്നത്. ജൂലൈ 4-ന് നടക്കുന്ന മത്സരത്തിൽ അദ്ഭുത കുതിപ്പ് നടത്തുന്ന കേപ് വെർഡെ (Cabo Verde) ആണ് അർജന്റീനയുടെ എതിരാളികൾ. നിലവിലെ ഫോമിൽ ചാമ്പ്യന്മാർ അടുത്ത ഘട്ടവും എളുപ്പത്തിൽ കടക്കുമെന്നാണ് ആരാധകരുടെ പ്രതീക്ഷ. ലയണൽ മെസ്സിയുടെ ഈ സ്വപ്നതുല്യമായ ഫോം വരും മത്സരങ്ങളിലും തുടരുമെന്ന പ്രതീക്ഷയിലാണ് ഫുട്ബോൾ ലോകം.

---------------

Hindusthan Samachar / Roshith K