Karachi, 28 ജൂണ് (H.S.)

കറാച്ചി: പാകിസ്താനിലെ ഏറ്റവും വലിയ നഗരമായ കറാച്ചിയിൽ പാരാമിലിറ്ററി സേനയായ സിന്ധ് റേഞ്ചേഴ്സിന്റെ ആസ്ഥാനത്തിന് നേരെ ഉണ്ടായ വൻ ഭീകരാക്രമണത്തിൽ നാല് പാകിസ്താൻ സൈനികർ കൊല്ലപ്പെട്ടു. ശനിയാഴ്ച രാത്രി കറാച്ചിയിലെ ജനസാന്ദ്രതയേറിയ ഗുലിസ്ഥാൻ-ഇ-ജൗഹർ പ്രദേശത്തുള്ള ഭിട്ടായി വിങ് ഹെഡ്ക്വാർട്ടേഴ്സിന് നേരെയാണ് ആക്രമണം ഉണ്ടായത്. തുടർന്ന് സുരക്ഷാ സേന നടത്തിയ പ്രത്യാക്രമണത്തിൽ ആറ് ഭീകരരെ വധിക്കുകയും ഒരാളെ ജീവനോടെ പിടികൂടുകയും ചെയ്തു. നിരോധിച്ച ഭീകര സംഘടനയായ തെഹ്രീകെ താലിബാൻ പാകിസ്താന്റെ (ടിടിപി) വിഘടനവാദി ഗ്രൂപ്പായ 'ജമാഅത്തുൽ അഹ്റാർ' ആക്രമണത്തിന്റെ ഉത്തരവാദിത്തം ഏറ്റെടുത്തു.

ശനിയാഴ്ച രാത്രി 8:30 ഓടെയാണ് സംഭവം. കറാച്ചിയിൽ സർവ്വകലാശാലകളും കാലാവസ്ഥാ നിരീക്ഷണ കേന്ദ്രവും സ്ഥിതി ചെയ്യുന്ന പ്രധാന മേഖലയിലാണ് ഈ ക്യാമ്പുള്ളത്. സ്ഫോടകവസ്തുക്കൾ നിറച്ച വാഹനം ഉപയോഗിച്ച് ഭീകരർ ക്യാമ്പിന്റെ പ്രധാന ഗേറ്റിലേക്ക് ഇടിച്ചുകയറ്റുകയായിരുന്നു എന്നാണ് പ്രാഥമിക അന്വേഷണത്തിൽ വ്യക്തമാകുന്നത്.

90 മിനിറ്റ് നീണ്ട കടുത്ത വെടിവെയ്പ്പ്

പ്രധാന കവാടം തകർത്തതിന് പിന്നാലെ ക്യാമ്പിലേക്ക് അതിക്രമിച്ചു കയറിയ ഭീകരർ കയ്യിലുണ്ടായിരുന്ന ഹാൻഡ് ഗ്രനേഡുകൾ സുരക്ഷാ ഉദ്യോഗസ്ഥർക്ക് നേരെ എറിയുകയും തുരുതുരാ വെടിയുതിർക്കുകയും ചെയ്തു. ഇതേത്തുടർന്ന് ക്യാമ്പിൽ വൻ സ്ഫോടനങ്ങളും തീപിടിത്തവുമുണ്ടായി. സിന്ധ് റേഞ്ചേഴ്സ് ഉദ്യോഗസ്ഥർ പെട്ടെന്ന് തന്നെ തിരിച്ചടിച്ചതോടെ പ്രദേശം യുദ്ധക്കളമായി മാറി.

ആക്രമണം കടുത്തതോടെ പാകിസ്താൻ പോലീസിന്റെ സ്പെഷ്യൽ സെക്യൂരിറ്റി യൂണിറ്റും (SSU) ഭീകരവിരുദ്ധ സേനയും (ATF) സിന്ധ് റേഞ്ചേഴ്സിന് സഹായവുമായി ക്യാമ്പിലെത്തി. ഏകദേശം ഒന്നര മണിക്കൂറോളം (90 മിനിറ്റ്) നീണ്ടുനിന്ന കടുത്ത വെടിവെയ്പ്പിനൊടുവിലാണ് ആറ് ഭീകരരെയും വധിക്കാൻ സുരക്ഷാ സേനയ്ക്ക് കഴിഞ്ഞത്. ആക്രമണത്തിൽ ഗുരുതരമായി പരിക്കേറ്റ ഒരു ഭീകരനെ സൈന്യം ജീവനോടെ പിടികൂടിയിട്ടുണ്ട്.

കറാച്ചിയിൽ ഭീതി പരത്തി സ്ഫോടനങ്ങൾ

ആക്രമണം ആരംഭിച്ചപ്പോൾ തന്നെ കറാച്ചി നഗരത്തെ നടുക്കിക്കൊണ്ട് വലിയ സ്ഫോടന ശബ്ദങ്ങൾ കേട്ടതായി പ്രദേശവാസികൾ പറഞ്ഞു. സുരക്ഷ മുൻനിർത്തി അധികൃതർ റേഞ്ചേഴ്സ് ക്യാമ്പും അതിന് ചുറ്റുമുള്ള പ്രധാന റോഡുകളും പൂർണ്ണമായി ഉപരോധിച്ചു. ജനങ്ങളോട് വീടുകളിൽ തന്നെ തുടരാൻ പോലീസ് കർശന നിർദ്ദേശം നൽകിയിരുന്നു. ഏറ്റുമുട്ടൽ നടന്ന സമയത്ത് സുരക്ഷാ കാരണങ്ങളാൽ സമീപ പ്രദേശങ്ങളിലെ വൈദ്യുതി ബന്ധവും വിച്ഛേദിച്ചിരുന്നു. സിന്ധ് പ്രവിശ്യാ മുഖ്യമന്ത്രി മുരാദ് അലി ഷാ സംഭവത്തെക്കുറിച്ച് വിശദമായ അന്വേഷണ റിപ്പോർട്ട് സമർപ്പിക്കാൻ പോലീസ് മേധാവിക്ക് നിർദ്ദേശം നൽകിയിട്ടുണ്ട്.

അഫ്ഗാൻ അതിർത്തി കടന്നുള്ള ഭീകരതയെന്ന് പാകിസ്താൻ

കറാച്ചിയിൽ സമീപകാലത്ത് ഉണ്ടാകുന്ന ഏറ്റവും വലിയ ഭീകരാക്രമണമാണിത്. കറാച്ചി പോലീസ് ഓഫീസിന് നേരെ 2023 ഫെബ്രുവരിയിൽ ഉണ്ടായ ആക്രമണത്തിന് ശേഷം നഗരത്തെ ഞെട്ടിച്ച വലിയ സംഭവമാണിത്. സാധാരണയായി അഫ്ഗാൻ അതിർത്തിയോട് ചേർന്നുള്ള ഖൈബർ പഖ്തൂൺഖ്വ പ്രവിശ്യ കേന്ദ്രീകരിച്ച് പ്രവർത്തിക്കുന്ന ജമാഅത്തുൽ അഹ്റാർ ഭീകരർ കറാച്ചിയിൽ ഇത്തരമൊരു ആക്രമണം നടത്തിയത് സുരക്ഷാ ഏജൻസികളെ ആശങ്കയിലാഴ്ത്തിയിട്ടുണ്ട്.

അഫ്ഗാനിസ്ഥാനിലെ താലിബാൻ സർക്കാർ ടിടിപി ഭീകരർക്ക് സുരക്ഷിത താവളമൊരുക്കുന്നുവെന്ന് പാകിസ്താൻ മിലിറ്ററിയും ഇന്റലിജൻസും നിരന്തരം കുറ്റപ്പെടുത്തുന്നുണ്ട്. അഫ്ഗാനിൽ ഇരുന്ന് ആസൂത്രണം ചെയ്താണ് ഭീകരർ പാകിസ്താനിൽ അതിർത്തി കടന്നുള്ള ആക്രമണങ്ങൾ നടത്തുന്നതെന്നാണ് പാക് അധികൃതരുടെ വാദം. എന്നാൽ അഫ്ഗാൻ താലിബാനും പാകിസ്താൻ താലിബാനും രണ്ട് വ്യത്യസ്ത സംഘടനകളാണ്. ഈ സംഭവത്തോടെ പാകിസ്താനും അഫ്ഗാനിസ്ഥാനും തമ്മിലുള്ള നയതന്ത്ര ബന്ധം കൂടുതൽ വഷളാകാനാണ് സാധ്യത.

---------------

Hindusthan Samachar / Roshith K