Thiruvananthapuram, 03 ജൂണ് (H.S.)

തിരുവനന്തപുരം: സി.പി.ഐ.എം കഴക്കൂട്ടം ഏരിയ കമ്മിറ്റി അംഗം എസ്.എസ്. ബിജുവിനെ പാർട്ടിയിൽ നിന്ന് പുറത്താക്കി. ഗുരുതരമായ പാർട്ടി വിരുദ്ധ പ്രവർത്തനങ്ങൾ നടത്തിയെന്ന കണ്ടെത്തലിനെ തുടർന്നാണ് സി.പി.ഐ.എം തിരുവനന്തപുരം ജില്ലാ കമ്മിറ്റിയുടെ അടിയന്തര നടപടി. ബിജു പൂർണ്ണമായും അവസരവാദ രാഷ്ട്രീയത്തിന്റെ ആളാണെന്നും വ്യക്തിപരമായ നേട്ടങ്ങൾക്ക് വേണ്ടി പാർട്ടിയെ ഒറ്റിക്കൊടുത്തുവെന്നും സി.പി.ഐ.എം നേതൃത്വം ആരോപിച്ചു.

വർഷങ്ങളായി കഴക്കൂട്ടം മേഖലയിൽ പാർട്ടിയുടെ പ്രധാന ഭാരവാഹിയായിരുന്ന എസ്.എസ്. ബിജു ഇന്ന് ഔദ്യോഗികമായി ബി.ജെ.പിയിൽ ചേർന്നതിന് തൊട്ടുപിന്നാലെയാണ് പാർട്ടിയുടെ പുറത്താക്കൽ നടപടി വരുന്നത്. സി.പി.ഐ.എമ്മിന്റെ കഴക്കൂട്ടം മുൻ ഏരിയ സെക്രട്ടറിയായും മുൻ സി.ഐ.ടി.യു ഏരിയ പ്രസിഡന്റായും ദീർഘകാലം പ്രവർത്തിച്ചിട്ടുള്ള ബിജുവിന്റെ പാർട്ടി മാറ്റം തലസ്ഥാനത്തെ രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്.

തദ്ദേശ തിരഞ്ഞെടുപ്പിലെ പരാജയവും പാർട്ടിയിലെ വിള്ളലും

എസ്.എസ്. ബിജുവും പാർട്ടി നേതൃത്വവും തമ്മിൽ കഴിഞ്ഞ കുറച്ചുകാലമായി നിലനിന്നിരുന്ന ഭിന്നതകളാണ് ഇപ്പോൾ പരസ്യമായ പുറത്താക്കലിൽ കലാശിച്ചിരിക്കുന്നത്. കഴിഞ്ഞ തദ്ദേശ സ്വയംഭരണ തിരഞ്ഞെടുപ്പിൽ കഴക്കൂട്ടം നിയോജക മണ്ഡലത്തിലെ സൈനിക സ്കൂൾ വാർഡിൽ നിന്ന് ബിജു സി.പി.ഐ.എം സ്ഥാനാർത്ഥിയായി മത്സരിച്ചിരുന്നെങ്കിലും പരാജയപ്പെട്ടിരുന്നു. ഈ പരാജയത്തിന് ശേഷം പാർട്ടി വോട്ടുകൾ കൃത്യമായി സമാഹരിക്കുന്നതിൽ ബിജു പരാജയപ്പെട്ടു എന്ന തരത്തിൽ പ്രാദേശിക കമ്മിറ്റികളിൽ വിമർശനം ഉയർന്നിരുന്നു.

കടകംപള്ളിക്കെതിരെ പ്രവർത്തിച്ചെന്ന് ആരോപണം

കഴിഞ്ഞ നിയമസഭാ തിരഞ്ഞെടുപ്പ് കാലം മുതൽക്കേ ബിജു പാർട്ടിയുമായി അകൽച്ചയിലായിരുന്നുവെന്നാണ് പുറത്തുവരുന്ന വിവരങ്ങൾ. നിയമസഭാ തിരഞ്ഞെടുപ്പ് പ്രചാരണ പ്രവർത്തനങ്ങളിൽ നിന്ന് അദ്ദേഹം പൂർണ്ണമായും വിട്ടുനിന്നിരുന്നു. ഇതേച്ചൊല്ലി പാർട്ടി കമ്മിറ്റികളിൽ ബിജുവിനെതിരെ രൂക്ഷമായ വിമർശനവും അച്ചടക്ക നടപടിയെക്കുറിച്ചുള്ള ചർച്ചകളും നടന്നിരുന്നു.

പ്രധാന ആരോപണം: കഴക്കൂട്ടത്തെ എൽ.ഡി.എഫ് സ്ഥാനാർത്ഥിയായിരുന്ന കടകംപള്ളി സുരേന്ദ്രനെ പരാജയപ്പെടുത്താൻ ബിജു ബി.ജെ.പി നേതൃത്വവുമായി രഹസ്യ ധാരണയുണ്ടാക്കി പ്രവർത്തിച്ചു എന്ന ഗുരുതരമായ ആരോപണമാണ് പാർട്ടി ഉന്നയിക്കുന്നത്.

തിരഞ്ഞെടുപ്പ് സമയത്ത് പാർട്ടി വിരുദ്ധ നിലപാട് സ്വീകരിക്കുകയും എതിർപക്ഷത്തിന് വോട്ട് മറിക്കാൻ ശ്രമിക്കുകയും ചെയ്ത ബിജുവിനെതിരെ അന്ന് മുതൽക്കേ നിരീക്ഷണമുണ്ടായിരുന്നു. ഒടുവിൽ പരസ്യമായി ബി.ജെ.പി അംഗത്വം സ്വീകരിച്ചതോടെ ബിജുവിനെ പാർട്ടിയിൽ വച്ചുപൊറുപ്പിക്കേണ്ടതില്ലെന്ന തീരുമാനത്തിലേക്ക് ജില്ലാ നേതൃത്വം എത്തുകയായിരുന്നു. ഇടതുപക്ഷത്തിന്റെ കോട്ടയായി കരുതപ്പെടുന്ന കഴക്കൂട്ടത്ത് മുൻ ഏരിയ സെക്രട്ടറി തന്നെ ബി.ജെ.പി പാളയത്തിൽ എത്തിയത് വരും ദിവസങ്ങളിൽ വലിയ രാഷ്ട്രീയ വാദപ്രതിവാദങ്ങൾക്ക് വഴിതുറക്കും.

---------------

Hindusthan Samachar / Roshith K