Thiruvananthapuram , 04 ജൂണ് (H.S.)

തിരുവനന്തപുരം: സംസ്ഥാനത്തിന്റെ സാമ്പത്തിക സ്ഥിതിയെച്ചൊല്ലി ഭരണ-പ്രതിപക്ഷങ്ങൾ തമ്മിലുള്ള പോരാട്ടം പുതിയ തലത്തിലേക്ക്. യുഡിഎഫ് സർക്കാർ നിയമസഭയിൽ സമർപ്പിക്കുന്ന ധവളപത്രത്തിലെ വാദങ്ങളെ പൂർണ്ണമായും തള്ളിക്കളഞ്ഞുകൊണ്ട് സ്വന്തം നിലയിൽ 'ബദൽ ധവളപത്രം' പുറത്തിറക്കാൻ ഇടതുപക്ഷ ജനാധിപത്യ മുന്നണി (എൽഡിഎഫ്) തീരുമാനിച്ചു. കഴിഞ്ഞ പത്തുവർഷത്തെ എൽഡിഎഫ് ഭരണം കേരളത്തെ കടുത്ത സാമ്പത്തിക പ്രതിസന്ധിയിലേക്കും കടക്കെണിയിലേക്കും തള്ളിവിട്ടുവെന്ന സർക്കാരിന്റെ പ്രചാരണങ്ങൾക്ക് കൃത്യമായ കണക്കുകളിലൂടെ തടയിടുകയാണ് ഈ നീക്കത്തിന്റെ പ്രധാന ലക്ഷ്യം.

എൽഡിഎഫ് യോഗത്തിലാണ് ഇതുസംബന്ധിച്ച തന്ത്രപരമായ തീരുമാനം കൈക്കൊണ്ടത്. സർക്കാരിന്റെ ധവളപത്രത്തിലെ ഓരോ ഖണ്ഡികയും പരിശോധിക്കുകയും, അതിൽ ഉന്നയിക്കുന്ന ആരോപണങ്ങൾക്ക് അക്കമിട്ട് ബദൽ വാദങ്ങളും വസ്തുതകളും നിരത്താനുമാണ് എൽഡിഎഫ് ധാരണയായിട്ടുള്ളത്. വെറുമൊരു രാഷ്ട്രീയ പ്രസ്താവന എന്നതിലുപരി, ധനതത്വശാസ്ത്രജ്ഞരെയും വിദഗ്ധരെയും ഉൾപ്പെടുത്തി കൃത്യമായ സാമ്പത്തിക വിശകലനത്തോടെയായിരിക്കും ബദൽ റിപ്പോർട്ട് തയ്യാറാക്കുക.

പ്രതിരോധം തീർക്കാൻ ഇടത് മുന്നണി

കഴിഞ്ഞ എൽഡിഎഫ് സർക്കാരിന്റെ കാലത്ത് ഖജനാവ് പൂർണ്ണമായും ശൂന്യമാക്കിയെന്നും 'കിഫ്ബി' പോലുള്ള സംവിധാനങ്ങൾ വഴി വരുത്തിവെച്ച ബാധ്യതകൾ സംസ്ഥാനത്തെ തകർത്തുവെന്നുമാണ് പുതിയ യുഡിഎഫ് സർക്കാരിന്റെ പ്രധാന ആക്ഷേപം. എന്നാൽ, തങ്ങൾ ഭരണം ഒഴിഞ്ഞപ്പോൾ ഖജനാവിൽ അയ്യായിരം കോടിയിലധികം രൂപയുടെ നീക്കിയിരിപ്പ് ഉണ്ടായിരുന്നുവെന്നാണ് മുൻ ധനമന്ത്രിമാർ ഉൾപ്പെടെയുള്ള ഇടതു നേതാക്കളുടെ വാദം. കേന്ദ്ര സർക്കാർ കേരളത്തിന് അർഹതപ്പെട്ട വിഹിതങ്ങൾ വെട്ടിക്കുറച്ചതും സാമ്പത്തിക ഉപരോധം ഏർപ്പെടുത്തിയതുമാണ് പ്രതിസന്ധിക്ക് കാരണമായതെന്ന് എൽഡിഎഫ് ബദൽ ധവളപത്രത്തിലൂടെ സ്ഥാപിക്കാൻ ശ്രമിക്കും.

പ്രകൃതിദുരന്തങ്ങളും കോവിഡ് മഹാമാരിയും പിടിച്ചുകുലുക്കിയ ഘട്ടത്തിലും സംസ്ഥാനത്തിന്റെ അടിസ്ഥാന സൗകര്യ വികസനവും ജനക്ഷേമ പദ്ധതികളും മുടങ്ങാതെ മുന്നോട്ട് കൊണ്ടുപോകാൻ കഴിഞ്ഞത് എൽഡിഎഫിന്റെ ബദൽ സാമ്പത്തിക നയങ്ങൾ മൂലമാണെന്ന് മുന്നണി ചൂണ്ടിക്കാണിക്കുന്നു. ഈ യാഥാർത്ഥ്യങ്ങൾ മറച്ചുവെച്ച് ജനങ്ങൾക്കിടയിൽ തെറ്റിദ്ധാരണ പരത്താനാണ് സർക്കാർ ധവളപത്രത്തിലൂടെ ശ്രമിക്കുന്നതെന്നാണ് എൽഡിഎഫ് ആരോപണം.

പോരാട്ടം നിയമസഭയ്ക്ക് അകത്തും പുറത്തും

സർക്കാർ ധവളപത്രം സഭയുടെ മേശപ്പുറത്ത് വെക്കുന്നതോടെ നിയമസഭയ്ക്ക് അകത്തും പുറത്തും ശക്തമായ രാഷ്ട്രീയ പോരാട്ടത്തിനാണ് വഴിതുറക്കുന്നത്. ജനകീയ വികസന മാതൃകകളെ തകർക്കാനും വരാനിരിക്കുന്ന നാളുകളിൽ ജനക്ഷേമ പദ്ധതികളിൽ നിന്ന് പിൻവാങ്ങുന്നതിനായി 'ഖജനാവ് ശൂന്യമാണ്' എന്ന മുൻകൂർ ജാമ്യമെടുക്കാനുമാണ് സർക്കാർ ധവളപത്രത്തെ ഉപയോഗിക്കുന്നതെന്ന് ഇടതുമുന്നണി വിമർശിക്കുന്നു.

സർക്കാർ ഉന്നയിക്കുന്ന സാമ്പത്തിക കണക്കുകളിലെ പൊള്ളത്തരം ജനങ്ങളിലേക്ക് എത്തിക്കാൻ ബദൽ ധവളപത്രം വലിയ രീതിയിൽ പ്രചരിപ്പിക്കാനാണ് എൽഡിഎഫ് ലക്ഷ്യമിടുന്നത്. വരും ദിവസങ്ങളിൽ കേരളത്തിലെ രാഷ്ട്രീയ-സാമ്പത്തിക ചർച്ചകളെ ചൂടുപിടിപ്പിക്കുന്ന ഒന്നായി ഈ 'ധവളപത്ര യുദ്ധം' മാറുമെന്നുറപ്പാണ്.

---------------

Hindusthan Samachar / Roshith K