Kozhikode, 04 ജൂണ് (H.S.)

കോഴിക്കോട്: കോഴിക്കോട് ഗവ. മെഡിക്കൽ കോളജ് ആശുപത്രിയിൽ വീണ്ടും ഗുരുതരമായ ചികിത്സാപ്പിഴവ് ആരോപണം. വൃക്കയിലെ കല്ല് (കിഡ്നി സ്റ്റോൺ) നീക്കം ചെയ്യാനായി ആശുപത്രിയിൽ പ്രവേശിപ്പിച്ച യുവാവ് മരണമടഞ്ഞ സംഭവത്തിൽ ഡോക്ടർമാർക്കെതിരെ ഗുരുതര ആരോപണങ്ങളുമായി കുടുംബം രംഗത്തെത്തി. നാദാപുരം വാണിമേൽ സ്വദേശിയായ പറമ്പത്ത് റീജിത്ത് (46) ആണ് വ്യാഴാഴ്ച രാവിലെ ചികിത്സയിലിരിക്കെ മരണപ്പെട്ടത്. ശസ്ത്രക്രിയയിൽ ഡോക്ടർമാർക്ക് സംഭവിച്ച ഗുരുതരമായ അനാസ്ഥയാണ് റീജിത്തിന്റെ മരണത്തിന് കാരണമായതെന്നാണ് ബന്ധുക്കളുടെ പരാതി.

ഇടതു വൃക്കയിലെ കല്ല് നീക്കം ചെയ്യാനായി എത്തിയ രോഗിക്ക് മാറി വലതു വൃക്കയിൽ ശസ്ത്രക്രിയ നടത്തിയെന്നും, പിന്നീട് തങ്ങളുടെ അനുവാദമില്ലാതെ രണ്ടാമതും ശസ്ത്രക്രിയയ്ക്ക് വിധേയനാക്കിയെന്നുമാണ് കുടുംബം ആരോപിക്കുന്നത്.

സ്ഥാനം മാറി ശസ്ത്രക്രിയ; കുടുംബത്തിന്റെ അനുമതിയില്ലാതെ രണ്ടാമതും സർജറി

ബന്ധുക്കളുടെ പരാതി പ്രകാരം, ഇടതുഭാഗത്തെ വൃക്കയിലായിരുന്നു റീജിത്തിന് കല്ല് കണ്ടെത്തിയിരുന്നത്. എന്നാൽ കഴിഞ്ഞ വർഷം ഓഗസ്റ്റിൽ നടത്തിയ ആദ്യ കീഹോൾ ശസ്ത്രക്രിയയിൽ ഡോക്ടർമാർ മാറി വലതുഭാഗത്താണ് ശസ്ത്രക്രിയ നടത്തിയത്. സ്ഥാനം മാറി ശസ്ത്രക്രിയ നടത്തിയതോടെ വലതുഭാഗത്ത് കടുത്ത പഴുപ്പും മറ്റ് ശാരീരിക അസ്വസ്ഥതകളും രൂപപ്പെട്ടു. തുടർന്ന് നില വഷളായതോടെ, ഈ വർഷം ഏപ്രിലിൽ കുടുംബാംഗങ്ങളുടെ യാതൊരുവിധ അനുമതിയും വാങ്ങാതെ റീജിത്തിനെ വീണ്ടും രണ്ടാമതൊരു ശസ്ത്രക്രിയയ്ക്ക് കൂടി വിധേയനാക്കുകയായിരുന്നുവെന്ന് ബന്ധുക്കൾ ആരോപിക്കുന്നു.

തുടർന്ന് ആരോഗ്യനില പൂർണ്ണമായും വഷളാവുകയും വ്യാഴാഴ്ച പുലർച്ചെയോടെ റീജിത്ത് മരണത്തിന് കീഴടങ്ങുകയുമായിരുന്നു. ആശുപത്രി അധികൃതരുടെ ഭാഗത്തുനിന്നുണ്ടായ ഈ അനാസ്ഥ കൊലപാതകത്തിന് തുല്യമാണെന്നും കുറ്റക്കാരായ ഡോക്ടർമാർക്കെതിരെ കർശന നിയമനടപടി സ്വീകരിക്കണമെന്നും ആവശ്യപ്പെട്ട് റീജിത്തിന്റെ കുടുംബം മെഡിക്കൽ കോളേജ് സൂപ്രണ്ടിനും പൊലീസിനും ഔദ്യോഗികമായി പരാതി നൽകിയിട്ടുണ്ട്.

സൂപ്രണ്ട് റിപ്പോർട്ട് തേടി; പ്രതിഷേധിച്ച് ബന്ധുക്കൾ

സംഭവം വിവാദമായതോടെ മെഡിക്കൽ കോളേജ് സൂപ്രണ്ട് വിഷയത്തിൽ അടിയന്തരമായി ഇടപെട്ടു. ചികിത്സാപ്പിഴവ് ആരോപണത്തെക്കുറിച്ച് അന്വേഷിച്ച് അടിയന്തരമായി റിപ്പോർട്ട് സമർപ്പിക്കാൻ ആശുപത്രിയിലെ യൂറോളജി വിഭാഗം മേധാവിയോട് സൂപ്രണ്ട് നിർദ്ദേശിച്ചിട്ടുണ്ട്. നിലവിൽ റീജിത്തിന്റെ മൃതദേഹം മെഡിക്കൽ കോളേജ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

ആദ്യം സ്ഥാനം മാറിയാണ് അവർ ശസ്ത്രക്രിയ ചെയ്തത്. പിന്നീട് ഞങ്ങളോട് ചോദിക്കുക പോലും ചെയ്യാതെ രണ്ടാമതും ഓപ്പറേഷൻ തിയേറ്ററിലേക്ക് കയറ്റി. ഈ അനാസ്ഥയ്ക്ക് കാരണക്കാരായവർക്കെതിരെ നടപടി ഉണ്ടാകാതെ മൃതദേഹം ഏറ്റുവാങ്ങില്ല.

— റീജിത്തിന്റെ ബന്ധുക്കൾ

ആശുപത്രി അധികൃതരിൽ നിന്നും പൊലീസിൽ നിന്നും കൃത്യമായ ഉറപ്പും കുറ്റക്കാർക്കെതിരെ നടപടിയും ഉണ്ടാകുന്നതുവരെ മൃതദേഹം ഏറ്റുവാങ്ങില്ലെന്ന ഉറച്ച നിലപാടിലാണ് ബന്ധുക്കളും നാട്ടുകാരും. മെഡിക്കൽ കോളേജ് പൊലീസ് സംഭവത്തിൽ കേസെടുത്ത് അന്വേഷണം ആരംഭിച്ചിട്ടുണ്ട്.

---------------

Hindusthan Samachar / Roshith K